《臭雞方程式》
Follow開我嘅讀者都知，我最近被人狙擊，仲被賜名三鳩蛆、三奸姐、39姐。（個人最鐘意39姐，3939，又易打又順口。）我呢條仆街都笑鳩得人多喇，只能講得一句出得嚟行預咗要還。事情令到好多朋友都好擔心，等我同大家簡單解釋一下發生咩事啦。
首先係單向嘅私怨，我被幾名喺瑞典居住嘅港人以「唔照手足意思share瑞典港人集會文宣、已讀不回」為名討伐。早喺運動發生前，嗰名有心人已經一早Cap晒我story，居心顯然易見。（瑞典華人，尤其香港人個圈子其實好細，我知係邊個搞事，但我做三家姐呢幾年間學識咗開名公審人係唔啱，我幾年前都犯過呢個錯，所以盡量都唔想開名喇。）關於集會，我同我老公都有出席，不過唔想post喺自己平台暴露行蹤畀對家。都係嗰句啦，斯德哥爾摩識睇中文嘅華人個圈子係好細。喺瑞典間期，我一直私下都有約香港朋友出去貼海報貼街招，但我從來冇喺social media上提過。呢幾年間我學會將網絡上嘅工作同私生活分開。貼街招冇提，或者會有人屌我咁撚驚就唔好貼，到我提又話我攞光環，呢類操作耳熟能詳。
事情越演越烈，突然冒出一堆以一位經常喺Facebook微博間、簡體繁體間彈出彈入嘅中年Rich woman為首嘅團體。呢個團體每日都花好多時間去分析我一言一行，翻箱倒籠將我歷年所有出過嘅文章斷章取義。有啲指控仲關乎到我嗰位做水警嘅姐夫，想像力好到話我一直聽讀者心事就係為過料畀黑警。唔止咁，佢仲拉住一大堆指控，每日都身體力行嚟我度留言，又拉大隊去我出版社度留言，要人回應事件否則不罷休。
早喺呢場運動前，Q&A聆聽讀者心事我一向都有做。我亦堅信黑警會落地獄。由於篤魁呢個指控太嚴重，所以我早已另外公開回應咗。不過佢既然狙擊得，又點會只狙擊一樣呢？
廣東人做雞嘅方法有好多，但將一個女人嘅置諸死地嘅方法只有一個，就係做鳩佢係雞。公式大家都心中有數，不外乎話佢整容、貪錢、出身貧賤、私生活唔檢點。首先當然係要攻擊佢嘅外表，一係話佢醜，一係就話佢整容。一不離二，講完個樣當然要講身材，胸大就話你肥，胸細就話你飛機場，胸有肉地但你唔肥呢？咁你啲奶必定係假嘅，好噁心好虛偽啊！最後一招當然係要話你嘅私生活唔檢點。咩話，唔係處女？人人馬上化身網上聖母，將怒火狠狠敲喺佢老公新買畀佢嘅iPhone鍵盤上面，審判呢位陌生賤人所犯下嘅淫蕩罪。
以上嘅招數有邊個唔識，問題係依家已經係2019年，喺連港豬都經已醒覺嘅時代，點解仲會有一堆人冥頑不靈，用臭雞方程式去數臭一個女人。
作為一個成年人，變靚有咩問題？講粗口有咩問題？著低胸衫有咩問題？同男朋友扑嘢有咩問題？學歷又可以去評定一個人嘅品格咩？嗰啲乜撚嘢高官，學歷夠高啦啩，日日四點鐘擘大眼講大話，又有值得人尊敬嗎？我喺2016年就已經公開表態覺得整容冇問題（詳見《華健妹》一文，記得睇晒），內在美固然重要，但只專注內在美而忽略外在美都係一種膚淺（詳見《願我十八廿二就懂的事》第163頁）。一個人如果能夠承擔金錢同手術嘅風險，整完自己又開心咗，why not？矽膠從來唔會令一個人變得虛偽，但匿埋喺電腦後面，用聖人嘅標準向其他人指手劃腳就好撚虛偽。
好笑嘅係依家網上一堆自稱識得我，但其實十鳩幾年冇聯絡、或者根本唔識唔熟嘅人，喺網絡世界度大講一啲不負責任嘅說話，對我依家嘅存在去加鹽加醋。唔止批評我人格，神通廣大到連我同我老公嘅愛都可以否定。所謂嘅知情人士啊，如果你認為我唔埋你堆、唔同你聯絡就已經等於得罪你，所以你就要咁樣抹黑我的話，你嘅行動只係再一次證明我呢個決定係有幾正確。
每個人嘅人生都係屬於自己，一個人嘅價值亦從來係取決於自己。而唔係由一啲同你根本素未謀面，或者只係萍水相逢嘅人去衝量。我哋嚟到呢個地球咁辛苦做人，從來唔係為咗令全世界去鐘意自己，而係搵到同志同道合嘅人一齊行。成世流流長，總會遇到人渣，自己亦有犯錯嘅時候。重要嘅係而家嘅你同你心中所相信嘅事，而唔係一啲閒雜人等腦裡面嘅殘影。被人攻擊當然唔開心，我都曾經因為呢件事傷心失落過。但繼續好好活下去，努力成為一個更好嘅人，先係對付惡言好最好反擊。
附上快樂的外國雞照片一張。
q粗口 在 男人食堂- 廣東話粗口的替代品：Q、L、春[預告] (TVB) 的八卦
TVB綜藝娛樂節目《男人食堂》 - 廣東話 粗口 的替代品： Q 、L、春[預告]節目主頁：http://programme.tvb.com/foodandtravel/eatlamen/myTV節目重 ... ... <看更多>