《就算住劏房都要買部大電視，說服自己間屋裝得到咁大部電視，其實間屋唔細》
最近我家姐再一次搬屋，然後佢好proud of 自己好精明，用左一個至抵價買左個好大嘅電視機。我就恥笑佢，你屋企其實稍為拉過筋，你坐喺梳化，伸手都掂到對面岸嘅電視機，買咁大，更加睇唔清楚「whole picture」，你個電視機咁大，電視機入面個人同觀眾個真人差唔多大嘅時候，其實好難睇。呢件事係咩？冇咁大個頭就唔好戴咁大頂帽。但香港地嘅核心價值就係明知屋細都要買大電視，買左大電視，就可以彌補到間屋細嘅缺陷架啦。
然後我今日去hysan，終於都明其實人人都「明知屋細，都要買大電視」...
喺hysan 通往誠品個條電梯，望過對面，見到SOGO 門口個部好大好大好大嘅大電視，雖然呢件事已經喺個社會發生左好耐，但到今時今日，我依然覺得好「不可思議」...
其實兩棟樓嘅距離咁窄，你裝個咁大嘅電視，所有人都會好似入戲院買第一行咁，咁近個mon 咁大，點睇呢？
然後大家都覺得冇問題，繼續齊齊做戲院第一行觀眾...
而原來廣告商都覺得冇問題...
望住個咁大嘅電視機，我見到一個廣告，係一個叫人環保嘅廣告，寫住plastic free，叫大家少D 用膠，真係好可笑，本身個電視安喺條咁窄嘅巷，逼大家做戲院第一行觀眾，已經係唔環保啦。
然後，更奇妙嘅野出現啦，佢pop up 左行字出來，寫住「Advertising space sponsored by WWF」...
原來WWF 呢個環團都比錢呢個咁唔環保，做成光害嘅大電視。
你話香港地係幾咁冇奇不有。
屋企細買大電視來說服自己，屋企其實唔細，可以裝個咁大嘅電視點會細?
SOGO 裝個大電視喺條巷度其實都睇到，睇到局部都係睇到
宣傳環保用唔環保嘅channel，更加加強件事嘅對比張力，更加留意到佢，呢D 咪有宣傳效果囉。
PS. 個日同家姐討論過，以前宜室宜居係有教人點買一部岩自己屋企嘅電影機，佢話你坐喺梳化，單眼伸出一隻手，手握拳頭，見到拳頭cover 到個電視Mon，先唔傷視力，然後我家姐話點會cover 到？其實佢呢個問題，唔應該問點會cover 到？佢應該問「點解我間屋咁細？」，你需知道，你間屋夠大，就會cover 到。唔係串你家姐，呢D 就係香港人需要嘅motivation，激獎法激到你買到層大嘅樓，我呢D 真係用力良苦。
（圖為2018年3月WWF 喺SOGO 賣熄燈1小時廣告）
