Bali 的傳統新年
今次去峇里島撞正 Nyepi Day，即係當地嘅新年。佢哋新年正日個個唔出得街，要留喺屋企靜思，仲冇Wi-Fi添！不過新年前一晚就有大型慶祝活動，好多街道都有巡遊表演。
一路坐車見到好多當地人頭頂托住個盤，好似我哋中國人啲盆菜咁，佢哋嗰隻就多啲生果同鮮花。最犀利係，佢哋會一路揸綿羊仔一路個頭頂住個盤！我哋仲目擊一個當地女子自己一個人一路揸車一路個頭頂住個盤添！
正日Nyepi Day 嗰日我哋全日都要留喺酒店，可以用泳池同做 spa。所有職員都着返自己民族衫，唔使着制服，又可以帶埋屋企人一齊返工。其實原本當日所有峇里人都唔准返工，機場都關閉，只有部份大型酒店可以豁免。
除咗冇得上網之外，講嘢都要細細聲，夜晚唔准開燈，如果你開燈就要刪窗簾。晚餐係自助餐，我咁大個女都係第一次食熄燈自助餐… 到有一刻真係黑到睇唔到啲嘢食，酒店先開返幾盞微弱嘅燈。
夜晚我哋返房睇電視，好在仲有HBO可以睇吓戲。十一點幾行出露台，嘩！出面真係漆黑一片，全城唔開燈，要好小心翼翼咁行，伸手不見五指。環保組織搞所謂 “Earth Hour”都只不過係熄燈一小時，峇里 Nyepi Day 仲勁，全日唔開燈，夠曬環保！
之前好驚嗰日會好悶，最後我同男友都好慶幸有經歷過咁特別嘅新年，好好享受一下難得嘅寧靜～
註：今年 Nyepi Day 係3月7日，不過好似農曆咁年年都會唔同㗎，多數係三月，下次去Bali要留意啦！
#bali #nyepiday #balitravel #travel #culture #旅遊 #峇里島 #插畫 #手繪 #illustration #drawing #gouache
