5月26日93A上的非禮事件
強烈譴責九巴處理不當
Update: 14/06/2017
已報警
今天早上我去了警局報案，女警幫我錄口供後亦尋得該司機，詢問後知道司機沒有目擊過程，只能暫告一段落，給了我一個警處檔案編號，如果有一日撞返該非禮疑犯，可以立即報警。
對於九巴，我已重新電話投訴及在網上留言投訴，再Facebook msg 九巴嚴正要求跟進事件，剛收到回覆說會找專人跟進，暫未有後續回覆。
這件事上牽涉的人士眾多，在此致歉。尤其收到該司機的inbox, 知道對他亦造成困擾，在此我鄭重向您道歉。在九巴的投訴中，我特別註明了希望不要追究司機，我明白司機的做法，亦希望大家可以理性討論如何更佳地處理這些事，但不要攻擊司機，司機和我都是受害者之一。
另一方面，自己的情緒亦受到極大困擾，相信大家看留言，代入後就會明白。如果說事件其他人士會受到身邊人評論和詢問，我相信完全公開自己身分，接受所有輿論的我，壓力會更大。
最後，我自知不能完完全全去除大家對我的懷疑，什至有些陰謀論的疑惑。但對比起用假account 不公開身分的人，我自覺已經很勇敢，而且亦問心無愧。勿忘初衷，如果在看的你會因為這件事而提高警覺，那我所受的一切就變得有價值了。
--------------------------------
（以下是一篇長文，懇請有意保護女性的人看下去，歡迎share，抱歉太生氣，語氣很激動）
5月26日，我一返公司就沖去洗頭，因為在巴士上發生非禮事件！
當日我如常在樓下搭巴士93A返工，一上車就做低頭族check 公司野，坐係上層偏中後位置，冇太留意身邊發生既事。
行車中途，巴士司機突然走上上層，同坐正我後面既男人講：先生，你唔洗驚。喇，一係你就而家落車，一係我就要報警嫁喇。
該男子立即話：對唔住。然後就衝佐落車而司機亦落返去繼續行車。
當時所有乘客都望一望，車長咩都冇講就趕佐個人落車。由於我地後面都冇任何人，相信冇人知究竟司機睇到咩。
然後我就係度諗究竟咩事呢？忽發奇想摸下自己條馬尾！！！濕晒又亂晒既！？？由於我係臨出門口先紮馬尾，啫係有梳頭，一落樓就上車，完全諗唔到有咩可能無啦啦濕成咁又亂成咁！！！我覺得好嘔心又好嬲，就即刻衝落去問司機：司機，請問你見到啲咩？岩岩位男乘客有冇對我做佐啲咩？司機答：冇，冇呀，放心。
我真係覺得好奇怪，但果下傻豬佐冇再追問，唯有嬲豬一副好想喊既樣，扁晒咀咁返公司，一返去就衝去洗頭！！
我越諗越唔開心，朋友話不如打返去投訴，司機有機會放走佐個非禮慣犯嫁喎！其實我都好想知發生咩事，有咩事係可以報警又可以放走佢？就算司機睇唔到佢對我做啲咩，係咪睇到佢自己做緊啲不道德行為？結果我立即打返去九巴客服，請佢地調查後回覆我，當時係一位曾姓先生接聽。
兩星期後，我仲未得到回覆，又怕係之前自己飛佐收唔到電話，所以打返去問，結果係一位女士接聽，check 完發現曾先生留錯我電話，調查已完成但曾生已收工，會叫曾先生回覆返我。
直至6月10日朝早，終於收到曾先生電話，簡單黎講佢既調查結果得一句：司機唔肯透露佢見到啲咩，但你頭髮既事係唔關該位男士事。
我反問：司機唔肯透露？咁請問你地九巴有咩內部守則，司機見到啲咩，係可以有權力趕一個乘客落車，而呢件事其實可以報警？
曾先生：呢個我答你唔到。
我繼續：咁你咁大間公司，都唔需要了解一下究竟發生咩事，司機要趕人落車？
曾先生：我地真係了解佐，但呢個係司機同該名男士之間既事。
（What? 而家我懷疑關我事喎！）
我：你地係咪有啲巴士有CCTV, 睇唔睇到咩事？
曾：係有啲巴士有，但我唔肯定果架有冇。
我終於爆發：下！啫係你hea 我啦！而家連該巴士有冇閉路電視都答我唔到，即係根本冇深入調查！
成件事太唔make sense 我直接同佢講：我而家同你講緊疑似非禮事件，係刑事案黎，唔該你地認真啲，我完全接受唔到你既答覆！我有理由懷疑你地係知道啲野而唔敢話我知，懷疑你地係包庇緊一個非禮男！
曾：咁啫係你唔滿意呢個答覆？
我：係！完全唔滿意！請你係三日內比一個確實嘅答覆我，我要一個完完整整嘅解釋！
曾：下？三日？我哋要時間調查喎，我都要放假喎！
我：下！先生，我等左你地兩個星期啦！你同我講你要放假，我唔使放假咩？仲有，呢件事已經困擾左我好耐，仲要等到幾時？
曾：咁呀.... 咁..
結果我出絕招：其實我係傳媒黎，我已經忍無可忍，三日內唔該比個答案我，否則我會將呢件事公開，你地公司做法好有問題！
我真係再忍唔住：曾生，你係男人你唔明。我係一個成人都算，如果係一個中學學生妹呢？有冇諗過會有幾大陰影？（而我冇講出聲既係，我仲係中學生果時都有試過係93A上被非禮）
事件到昨日(6月12日)，我又搭93A返工，上返當日司機既車，其實事後我都搭過佢既車，雖然佢戴住太陽眼鏡，但我諗佢都認得我，間中有對望下咁。作為一個傳媒人，面對九巴如此是是但但既回覆，我決定要親自調查，結果我搭到去尾站，親口問司機當日發生咩事。期間我有錄音，但唔想影響司機，我將內容打出黎：
我：司機，我諗你記得我啦，我想問返當日究竟發生咩事。
司機：「好抱歉，當日我行緊車冇時間同你詳細發生咩事。其實當日件事係咁既，有個女乘客A行落黎同我講：司機呀，上層後排有個男人係度作出一D 不雅既行為。
然後我同佢講：咁呀，我一陣埋站上去睇下發生咩事，咁我地可以去警局報案，但你要做證人落口供，可能要Ｄ時間喎。
女乘客A：咁呀，我趕時間喎。
司機：咁一係咁啦，如果佢引起你既不安，我一陣埋站上去趕佢走啦。
女乘客A：咁好啦，司機你處理啦。
直至馬油塘村就埋站上上層，但我上去果陣，見唔到該女士描述，坐後排戴住Headphone既男人，但就到你(啫係我呀Fran呀)身後有一個戴眼鏡著啡色恤衫既男人。」
我：啫係佢已經調佐位坐我後面啦。
司機：係呀！當時我都好謹慎，即刻行埋去望一望佢有冇咩異常行為，但當時佢冇作出咩動作，但就神情呆滯咁。所以果一刻我就同佢講：先生，你係咪需要離開呢架車，如果唔係我就報警，咁結果佢道歉，就比佢走佐。然後我都同返女乘客A講，咁大家諗住佢走佐就算。
我知道你好擔心，如果果一刻我見到佢做緊不雅動作，我一定會報警，但當時我見唔到任何野。
我：其實架車係冇CCTV?
司機：架車冇嫁，所以目擊者咁樣講，我唯有趕走佢唔好搞到其他乘客先。
我：cs 有冇問返你？其實我當日問你係因為feel 到頭髮有野，我知道果個texture唔係水黎，你咁樣講完我都好肯定果d係咩黎。
司機：下？cs 早一個星期問過下我。我真係唔知道佢有影響到你，如果我一早知道影響佐你我就一定唔會比佢走，好對唔住。
事件直到昨日，幾乎100%肯定當時發生咩事，我已經向身邊警察朋友查詢佐，得到既答案當然係：而家好難入佢嫁喇，主要證據都冇佐。我接受司機既解釋同道歉，而比九巴客服曾先生既三日期限係到今日(6月13日)下午六時，岩岩５點鐘終於再打黎喇。
今次曾先生繼續同我講：我地再問佐車長嫁喇，佢都係冇透露發生咩事？
我：下？冇透露？我唔相信司車唔肯講喎！
曾：真係冇講。
我：尋日我搭返該司機架車，我已經當面問佐佢，洗唔洗我講返你聽咩事呀？
曾：好呀。
我：個男人係巴士上層打飛機，射到ｄ精液係我個頭度呀！因為你地hea 佐我咁耐，而家我被非禮我都追究唔到呀！！！你地處理手法好有問題呀！！！
成件事，曾生一d feel sorry 既感覺都比唔到我，我直接問佢咩post，我一定會公開投訴九巴同佢，佢仲話自己係投訴組主任！！我真係忍唔住同佢講：投訴組主任？你真係做得好好呀呢份工！
有人可能唔明我點解咁嬲，當日我返公司講，個個女同事都試過被非禮！
而我都係十歲開始經歷過不同既非禮事件，而係九巴，93A上都唔係第一次！因為93A我讀書搭到而家出黎做野搭佐十幾年！最近台灣房思琪事件我都好留意，完全唔明白係現今社會點解仲有咁多不道德既事發生，而且覺得好平常，完全冇考慮到對女性既影響可以有幾大！原來唔單止台灣多，香港都好多！！！ 而且連啲咁大既機構都唔會保護乘客，出佐事只係想搏我唔搞大件事，hea 佐我話冇事就算！究竟呢個咩世界！？！？
對於九巴既處理手法，作為事主既我有以下既公開公開譴責：
1. 是是但但
成件事，係非禮，有人投訴，竟然可以咁是但。九巴上冇cctv，冇人肯定我發生佐咩事，點解可以實牙實齒話：你頭髮上既野唔關個男人事！？ 而且由司機口中得知，客服是廢的，完全沒有跟進事件。(有不少身邊朋友都同我講，九巴就係咁是但，一定要寫信去官方先會認真受理)
2. 漠視法紀，間接縱容非禮犯
車上作出不雅行為已經係刑事案件，絕不能姑息，應該報案，唔應該有放走佢既可能性發生！內部管理同教育需要加強，令司機知道這些事的嚴重性，尤其近日風化案如此多，這些人，不雅行為冇人理，射精到女仔頭髮冇人理，下次就敢摸女仔，甚至強姦！
3. 客服完全不合邏輯
我不是第一次向九巴投訴，只能說每次得到的答案都很是但，以前我都算，今次係非禮，曾生都能答得如此不合邏輯，我對此極度不滿，希望有關方面比我一個官方既解釋！客服係一間公司對客既部門，絕對影響公司形象，請問九巴方面是否完全不顧形象？
作為一位普通女性，我仲有以下說話想公開：
1. 女人要站出來
好多時，我地會覺得多一事不如少一事，諗住冇影響到人就算，但正正係呢種想法，令我地縱容了這些男人！當我發現身邊所有女性都試過不同程度的被性騷擾，甚至非禮，我不禁在想：難道個個男人都試過性騷擾人？我相信答案是否定的，因為這些渣男是慣犯，一日不嚴懲，只會繼續犯案，愈來愈大膽！我希望每一位女性（當然男性都要），都知道我地有社會責任，不能夠姑息這班男人！若見到不雅行為不立即制止，然後今次就苦了我的頭髮。
有朋友問我怕不怕公開自己的樣子，錯的不是我我怕什麼！而且更應該做一個榜樣，女人不要怕！
2. 企業的社會責任
交通工具，公眾場合，好多時都係非禮案既案發地點，點解咁高科技既香港，連cctv 都仲未裝晒？企業都有社會責任保護公眾免受傷害，無論是非禮、偷竊等等，這些證據很重要！
3. 不是我們的錯
好多時發生呢d事，我們都會自責，什至懷疑自己：或者唔係呢？可能佢冇心嫁呢？冇咁核突掛？佢可能唔小心掂到我嫁啫？
我都會覺得自己傻豬佐，早知一早唔洗頭即刻去報警化驗！但錯不在我們，最錯是那些犯案的渣男！還有不停在保護著他們的社會和無知的人群！我們的力量或許很小，但絕不能放棄，也不需要自責！
作為一位傳媒人，深知法律途徑已經不能幫助我，唯有希望公開呢件事，讓公眾知道這些事每天都在我們身邊發生，希望利用網上力量令大家更警惕，更保護自己，也希望社會能夠幫助我們這些無助的女性。就算是一位男士，試想想你的女朋友、老婆，甚至是女兒發生這些事，怎麼能夠容忍！！！
最後，我知又會有人問點解我自己唔留意呀，點解咁唔小心呀，首先，頭髮(尤其是紮起佐)係冇知覺既，而我都真係冇第三隻眼生係後面既。
不過你地啱呀，係呀，我真係好錯！！我錯在以為係巴士好安全，錯在以為香港係一個安全既地方！！原來香港通街都係非禮男，通街都會有人隨時非禮我！！！
(平日這個page我很少寫不開心的事，但這邊也有很多女性，希望你們留意，這個post 歡迎share！)
msg檔案 在 msg檔案手機2023-在Facebook/IG/Youtube上的焦點新聞和 ... 的八卦
msg檔案 手機2023-在Facebook/IG/Youtube上的焦點新聞和熱門話題資訊，找線上開msg檔,msg檔案mac,msg檔案手機在2022年該注意什麼？msg檔案手機在2023的熱門內容就在年度 ... ... <看更多>