MOX 無回音🥳🥳🥳。
今日有兩單 VB 界大新聞，規佬趁放工得閒講兩句。利申：冇收錢，話說在前頭啦下。
第一單，當然係渣打、 PCCW 同攜程聯手創辦嘅 Mox 開業。同中銀嘅 Livi 相似， Mox 都係只限指定已預先登記人士開戶。客觀效果係控制申請嘅流量，唔好隊冧系統固然重要，後面 AML/KYC 嗰班唔好做唔切、搞到成堆 backlog 都好緊要。
咁， Mox 有咩賣點？其實接近係集百家之大成：
首有 Mastercard 嘅 Debit Card ，優惠期內回贈高達 5% (上限 HKD 1,000 ，即係大家存五千 [更正：係兩萬] 蚊入去用晒佢就得) ，日後恒常 1% rebate 冇上限，聽落都 okay 。
其次係首 100 萬港元存款年利率有一厘。唔錯啦， WeLab 啲 GoSave 小巴三個月定期都落到 0.95% 咯。加上張 Debit Card 可以喺銀通機免費提款，又可以上網買嘢，算係齊集 ZA 同 WeLab 兩家人嘅優點。
係冇 Livi 嘅銀聯 QR code 囉，但規佬本身都少用，冇所謂。
等我排到隊開戶口，到時再講下個 UX 係點啦。
- - -
另一單，係 WeLab 架飄搖定存小巴飛街。
9.8 厘做兩個月定期，上限一萬港紙，係吸引嘅。然後一呼百應，好撚多人去開戶口，又好撚多人捕住社交平台等住上嗰架限載 50 人嘅「小巴」，唔知以為瘋狂 F5 搶購新 iPhone 定口罩。
結果呢，咪就係拖冧 server 囉。同埋好撚柒鳩多人搶唔到個靚 offer 而深深不忿。
嗱，注意返，我啲形容詞係指人數眾多，唔係話參與者乜乜物物。今時今日戴少個頭盔都好容易食死貓。 (雖然戴咗都唔係 bullet-proof)
從 WeLab Facebook 專頁可見，網民係㷫過火屎嘅。各種各樣指控都有，例如話嘥人時間、喺一段長時間無法提供服務、道歉時提供補償是常識吧⋯⋯之類。
一方面，我覺得冇咁大個頭，真係唔好戴咁大頂帽。 WeLab Bank 開業至今上客量相當理想，但 server 容量始終有限，有冇必要為咗搞綽頭而自製系統壓力測試？ I doubt.
另一方面，定存優惠九厘八看似好勁，但其實兩個月後都係收返百六蚊左右。你吹到 22 日都準確捕足攞盡三千幾蚊高息當然巧威威，但時間成本都係成本喎。規佬就真係唔得閒咁樣守株待「套」。
At the end of the day ，有人做生意，而生意做唔切，招呼唔到，咪去第二間食囉。講緊食飯呢啲基本需要喎。做少個定存，就真係唔會少咁忽肉嘅。好彩啲嘅，抽中早兩日上市嗰隻樽裝水新股 (然後賣埋) ，比得上連坐 22 日高息小巴啦。
無論係存戶抑或銀行，都係出於求財 (唔會有人諗住做人世啩？) ，撲唔到演唱會飛，一係放棄，一係買黃牛。做唔到定存，食餐好嘅，聽日或者有更好嘅理財機會呢，係咪？
- - -
更多規佬深入分析及賴叔文章，盡在 Patreon
https://www.patreon.com/shuklai
- - -
直入式廣告：《中環攻略》電子書，五萬字帶你遊遍銀行金融界
https://www.penana.com/story/65999
#hk #hongkong #blogger
