【第一章：吵大鑊】
我辭職時，封「辭職信」入面咪提到，
10年前，我同兩位拍檔因為一件無聊嘢而吵大鑊，
搞到我當晚就即刻想辭職唔撈嘅？
今日就講下當年呢件無聊事…
話說當年2010年，
我哋出緊一張叫《黑紙》嘅「偽文學雜誌」
白紙一張寫滿字，
每月一張，每張一蚊，
全港只有Kubrick書店等共七個地點有售。
（當年送貨都係我哋三個走勻全港九自己送）
（後來每年都會轉一次主題，2011年開始在全香港7-Eleven有售）
去到年尾，儲落12期《黑紙》，
我哋打算喺2011年夏天出一本2010結集，叫「Bookset」。
貫徹我哋山寨式經營，
我哋三個加埋幾位朋友，
連夜開通宵，人手將12期《黑紙》逐張逐張入落本Bookset度。
嗰陣大家仲返緊另外一份全職，
夜晚十一二點放咗工先去入，
入咗好多好多好多晚，
入到個個都懷疑人生。
有一晚，佢兩個仲喺商台返緊工，
得我同其他人，
入下入下，我突然間發覺，開始有好多bookset嘅質量好差，
個皮花花地，同埋有啲刮痕喺上面。
我決定即刻開晒所有箱嚟check多次，
嗰陣我哋第一批預計整大概幾千至10000本（？唔係好幾記得實數）
用咗幾個鐘Check完之後我決定DQ近一半數量…
係好傷，但唔通賣啲次貨俾讀者咩。
當我筋疲力盡，返屋企嘅時候，
我就打電話俾佢哋兩個，
話俾佢哋聽呢個噩耗（有一半bookset唔要得）。
然後佢哋兩個表示，
佢哋好想去現場了解下，
睇吓係咪真係咁差，
同睇下有咩辦法解決。
我當下無啦啦就short咗，勁火滾，
當時覺得佢哋唔信我嘅judgement，
我覺得再check係浪費時間，我好嬲，嬲到喊
掉咗部電話唔想同佢兩個傾。
第一，我份人真係好躁，
第二，嗰幾晚真係做到好攰好崩潰，
所以當時冇諗咁多，
發咗佢哋爛渣。
當然事後諗返起，
無啦啦話俾佢哋聽要DQ一半貨，
佢哋一定係覺得好突然，
想去check真啲都好正常。
當晚凌晨四五點，我哋已經透過電話講和，
主要都係我道歉啦好似（諗諗吓唔記得佢哋有冇）。
佢哋亦話返俾我聽，佢哋有自己去check，大部份都同意我嘅決定，
（因為佢兩個都係唔願意賣一啲次貨俾讀者嘅人啦當然）
後來後來，
關於呢件事，
都係開心的回憶：
有好多好多讀者嚟支持我哋，
一日就賣晒啲bookset（靚貨）。
依家諗返起都仲係好多謝當年呢啲讀者，
嗰陣時大熱天時，
即使我哋已經不斷幫佢哋撥涼，俾水佢哋飲，
但都仲係好熱好熱好熱（我記得當年有個女仔暈低咗…嚇死）
要你哋排咁耐隊，你哋都冇怨言，
好感激你哋，俾咗呢個美好回憶我。
更多故事在Instagram：Lam1Hey
（圖：2010年版本的《黑紙》及Bookset）
