《傳說有一粒制...個名叫「可加可減機制」》
呢個世界有粒制，叫「可加可減機制」。
依粒制嘅奧妙之處係寫住「可加」、「可減」，但實際上就「只加」、「不減」。
地下鐵忠誠地表現出一間「公司」嘅原則，有錢總是要搵的。
基於「可加可減機制」，每年檢討，年年加價。
不過，人哋可是有一條「方程式」在背後撐腰的，並不是亂加！我哋都係讀書人，要包容要體諒！
而決定佢價格調整幅度嗰條「方程式」就係
「0.5 *綜合消費物價指數變動 + 0.5 *工資指數變動 – 生產力因素」
望落好Fair，
同埋啲中央831框架一樣，都係帶有明確學術味道，加埋成萬九幾字嘅經濟論述，總括就係一句「係咁架啦！吹呀？照跟啦望！」
當然咁講好似太粗魯，唔夠文明，我哋換個說法，就係「呢條方程式係不能撼動嘅。」幾霸氣？
好，講講條方程式，「綜合消費物價指數變動」簡單啲講即係「物價有無升」，類近通漲。你睇下出面啲樓價，同茶記個55蚊Set Lunch，大概都Feel到近年係升到媽媽聲。
而「工資指數變動」，即係普遍大家人工加幾多啦。你可能心諗：「What？我無加過喎！」孩子別傻，有加嘅，仲加好多添！不過唔係加俾你咁解啫！
香港係「有錢人把玩無錢人」嘅世界，佢哋要控制個「工資指數變動」唔太難嘅，加人工俾個高層，好過加俾你成Team啦！
你開始驚啦！
「哇，咁港鐵咪加硬價囉？？」
NO！
仲有一項「生產力因素」可以減減佢！只要「生產力因素」個數值夠大！港鐵就可以減價啦！
好嘢！！政府叻叻豬！！
咁「生產力因素」嘅數字係點得嚟嘅呢？
有請福建大學經濟學教授個朋友阿強：
「係一個設定值...依情況改變..」
嗯...阿強你可以返返後台先。
再有請政界猛人，人稱「政壇垃圾筒」嘅劉生：
「呃，即係咁...係一個有規劃嘅藍圖底下，特區政府喺依項政策入面，喺以務實同長遠嘅目光去考慮一個住盤嘅未來發展。對於你依個問題，有關局會向公眾諮議，之後向市民陳情。再經由中央、界王神、小閻君、里維兵長、NERV、安西教練...」
人嚟！拖佢去焚化爐唔該！
咁到底「生產力因素」係點設定嘅呢？
得出嘅答案只有一句「同港鐵盈利表現有關」，How To有關？
無人知。甚至梁振英條粉皮都未必知。
換句講，佢鍾意點Set都得。
佢點Set，我哋咪點Sad囉，習慣架啦。
當一條方程式有項咁唔明朗嘅因素出現...條方程式仲有無價值？
以前地鐵依類機構可以自主票價，但每次加價都要經行政會議和立法會審議。
但一撳咗依粒「可加可減機制」，只要乎合「方程式」，每年就可以話加就加。
如果我哋啲打工仔都可以行「可加可減機制」就好囉！自己決定加薪定減薪！
不過我就話一定唔Work，點解？
因為我哋面對住競爭。
係架，我自己加到一萬七千，阿強就話一萬四千OK。
你就「可加可減」，老闆亦「可請可炒」。
但地鐵唔同，公用服務機構，只此一家。
香港市民無咩選擇，紅隧香港仔隧道閒時都會大塞車，穩陣就只有搭地鐵。
唔係，係逼地鐵。
同香港政府睇定你哋嚟食一樣，地鐵某程度上完全無分別。佢鍾意年年加你都吹佢唔漲。
你話罷搭，但你要生活，罷到幾多次？
唔係骨唔骨氣嘅問題，係無可無奈何無得揀嘅問題。
去返條方程式，其實有好多嘢都係因果關係。
「綜合消費物價指數變動」點解會升呢？好簡單！
你點解想加人工？
因為身邊咩都加價囉，咁邊樣最貼身呢？三樣嘢，食住行。
地鐵加價，本身就會造成一個蝴蝶效應。
交通費上升，大家要搵多啲。咁點先可以多啲錢？賺多啲囉！咁咪即係加價，之後「綜合消費物價指數變動」就升啦！
到下年，地鐵賺過百億，但都可以用依條方程式去「加價」，無限Loop！
地鐵已經連續6年加價，2010年由銅記去MK都係10蚊內，今日搭都差唔多12蚊...
之但係咁，地鐵標榜自己係咩呀？良心企業嘛！佢哋好鍾意同你玩「優惠遊戲」。
嗱，我雖然加價，但我有返優惠俾你架！
但係每次見到依堆自己一年都Join唔到三次嘅「優惠」，我真係想同佢講：「我唔要優惠呀，但你唔好加價得唔得？」
答案大家都知，佢哋邊會肯呀？
本身「可加可減機制」，就係想經濟差、通縮時，逼地鐵依類公營機構一定要減價。
可惜講落好聽，做落嚇市民一驚。
喺依種外憂內患天下圍攻嘅經濟假象上，地鐵公司用依條「方程式」假設我哋生活好好，人工愈升愈高，從而加價。
香港人嘅真正環境係點，地鐵無理由唔知嘅。
點解明知大家只係想努力咁生存，仲要每年都大大把摑落嚟呢？
你憑咩春加價呀？
IG: cheungson88
ig漲粉程式 在 【Instagram Tips】2天內瘋狂漲粉！實證有用方法（加強版 ... 的八卦
【全新免費教學】 IG 提升曝光，增加客人（不廢話） http://free.masterclass.livigrace.online✓ 【限時優惠 ... 【 Instagram Tips】2天內瘋狂 漲粉 ！ ... <看更多>