//本Page Patreon經已開通，請訂閱支持本Page運作，謝謝！ 連結： https://bit.ly/2TvzIaF //
由星期五晚開始，一直到星期二朝早為止，花咗48小時終於打爆咗《Final Fantasy 7 Remake》（跟住訓番足一日回氣先開始打呢篇文）。呢段時間之間基本上除咗吃喝拉睡之外，就係不停打機打機打機，香港有咩新聞、個世界發生咩事係完全唔理──對上一次有咁瘋狂嘅生活經已要番番去十幾年前，個感覺真係好懷念。
個分別只係，當日對於互聯網嘅依賴仲係無咁深，唔會好似今日咁一番番呢個現實世界就發覺有一大堆稿債未還；另一樣則係，年紀真係大咗，無辦法好似後生咁癲，可以連續打二三十個鐘唔訓覺鳥。但有趣嘅係打完幾日機乜都無做反而瘦咗少少，原因係太過專注打機一日只食一餐就算……
好多人話而家打機不如搞直播啦，話唔定呃多輪課金，但我其實唔係好慣一邊打機打邊講嘢，同埋打爆機亦唔係為咗向網友交待啲乜，之所以咁瘋狂以極速打爆《FF7R》，純粹係呢隻Game對我有一層好特殊嘅意義。
記得細個果陣屋企人覺得打機係一件壞事，所以由細到大唔單止唔比買遊戲機，連機舖都只能夠偷偷咁去──但咁樣並唔能夠阻止我對打機嘅熱愛，所以每日放學除咗成日屋朋友屋企痴機打、反轉校服（避開唔比有校章校服嘅不成文規定）入機舖、亦試過響商場5蚊15分鐘租機打爆《SEGA三國志》同《DQ5》……
但《FF7》對我黎講始終係特別嘅。當年紀去到咁上下，屋企開始無辦法再阻止我打機，PlayStation係我第一部用Part-time錢買番黎嘅遊戲機，而《FF7》就係我第一隻正式玩嘅PS Game。
仲記得我個年好多人係由《太空戰士4》開始玩起嘅，但我當時一直係「DQ派」（話就話係DQ派，但其實只係打爆過DQ5一隻……），對《FF》一直嗤之以鼻。但由我響屋企電視機Load出PS開機畫面一刻，跟住直入《FF7》開頭進入魔晄爐一幕，我好難講得明比大家知，究竟個震撼力有幾大──果陣唔單止係講緊由2D嘅FF世界跳去3D咁簡單，當時畫面嘅精細程度更係無以倫比。
然後打慣《DQ5》王道故事設定嘅我，開始感受得到《FF7》果種故事深度：由痛苦嘅生死離別同人性掙扎，主角點樣由人生低谷慢慢受到Tifa鼓勵而再次振作──當然，如果你要拎其他科幻文學大作相比，遠比《FF7》宏大、複雜嘅例子比比皆是，但《FF7》果種透過遊戲方式帶比你嘅「沈浸式體驗」卻係其他傳播媒體所唔能夠做到嘅。誇張啲講，玩倒《FF7》於我而言，係一項令我覺得生於世上值得感到幸福嘅原因。
當然相隔咗整整23年，Remake版內容亦都因應時代而改變咗。最大嘅改變自然係時間短咗同對玩家親切咗：記得當年《FF7》玩哂所有隱藏元素係要超過100個鐘，而家《FF7R》基本上完成哂所有支線任務都只係唔駛50個鐘，老實如果以當年標準黎講絕對係唔夠喉，甚至只能算係一個「序幕」。
另外就係《FF7》嘅迷宮本身都唔算複雜，但《FF7R》係會好親切不停提醒你「再落去就番唔倒轉頭架啦喎，有無咩魔晶石未執會唔會執左先好啲呀？」、又或者響打大佬又會有個休息站之餘，仲要令補給道具都有特價品──當然隻Game打爆咗都有Hard Mode，但有時會諗，當現今玩家有少少唔識都可以即刻上網搵攻略，有無需要用呢種近乎溺愛嘅提示方法呢？
至於戰鬥方面，有人話打慣舊版ATB而家用半Action方式好唔慣，但佢算係吸收咗《FF15》嘅教訓後，響RPG同ARPG之間攞倒一個好少少嘅平衡：真係唔係話你齋按正方型斬斬斬就可以贏倒架，響初中期你唔係有太多錢買道具果陣，打Boss都真係會有少少壓力。但另一方面，叫做有難度，搞到我要重打嘅Boss，除咗恐怖屋明，就只有我擺漏咗魔晶石嘅神羅富二代，難度黎講叫做中間偏易咁啦。
最後講講隻Game嘅政治啟示。《FF7R》涵蓋嘅劇情係《FF7》入面最富政治寓意嘅，但我響呢度唔打算作過份解讀──因為唔同立場嘅人，你總可以搵倒個有利自己嘅角度：例如你可以話雪崩班人係中哂神羅計、勇武抗爭結果只會為一般平民帶來重大傷害、真正嘅有效路線係要同體制內嘅市長合作……
我唯一想講嘅係，由Gundam去到FF7，佢地都係堅持一個中心思想，就係所有抗爭係必須伴隨住犧牲、必須付出沈重代價先至有可能成功（當然付出犧牲完一樣會失敗）；但香港人去到今時今日，都仲係想走精面，想付出少少就偷倒共產黨雞──呢個世界無一隻Game，係可以唔練等唔買道具就可以打贏大佬。
ff15攻略 在 [心得] FF15：從初版到皇家版心得- Play Station - PS | PTT遊戲區 的八卦
以前跟朋友借FF15破過一次，後來趁特價買了皇家版再加上現在有 ... 19 F →RAOLA: 我覺得最好玩是跳跳迷宮沒看攻略跳了快一天才過ww 03/18 01:41. ... <看更多>