是但UP兩句。
我同今次搞食雞比賽嘅主辦公司無利益衝突，甚至我係幫緊另一間電競公司做野，基本上，我就唔會幫佢講咩好說話，應該插嘅就插，啲報名安排急到咁，抵唔抵鬧呀，抵呀，喂調假調更都要知時間呀大佬，你玩哂呀？
事情係永遠可以做得好啲，呢點我相信主辦單位都會認同。
對於主辦單位希望選手自己帶GEAR打比賽，大家都好大反應，目測，插嘅唔認同嘅佔七八九成，但我屬於認同果少數。
我估，比賽搞得好急，接住英雄聯盟個挑選賽，有期有電腦，佢地想盡量多做一個食雞比賽，又見個熱潮咁L勁，食住條水去馬，呢點絕對可以理解。SET UP一百部機唔係容易事，佢地基本上都做到，我旁觀嘅覺得值得鼓舞同支持。當然佢地對呢隻遊戲唔太了解，我又好明白，我早幾日出文講話唔能夠做「第三身」，發完貼之後有人聯絡我，話將意見傳左過去，主辦單位考慮過之後，佢地改做第一身比賽，我覺得幾好，起碼肯聽人講野。至於點解要用第一身，早兩日講過，唔重複。
十二年前開始出去打CS1.6嘅LAN，未見人先比五舊水報名費，比個主辦單位借網吧打比賽，當時無乜乜舞台，又無乜Q野主播，最巴閉都係行入去動漫節打個一年一度嘅WCG，其他細比賽來來去去又係IONE陽光乜乜物物。果個年代，RAZER都係岩岩起，無乜人用，個個選手自己帶隻IE3、IO1.1、QCK出去打機，想話用網吧個耳機，你老未你諗都唔好諗，聽到人聲聽唔到咪聲，嘈到腳步聲都聽唔到，哂膠氣。你自備HEADSET都唔夠，仲要死死氣左借右借人地張Icemat Sound Card，你先叫做聽到下腳步聲。網吧張MOUSEPAD？好呀，用啦，全部煙灰，一舊舊，污糟到係令你認為佢本身就係煙灰缸。個鍵盤係唯一能夠將就，不過鍵盤嘅質素係，你同時禁四個制，第五個制就唔會DETECT到。係得果啲垃圾鍵盤架啦，係你依家先有錢買得起個機械鍵盤姐，以前來來去去得果幾隻，隻隻過千，你人緣好咪問打完嘅選手借嚟用囉。
打槍GAME，GEAR從來都係關鍵。行出去睇每個槍擊遊戲嘅比賽，九成九嘅選手都係自備GEAR，去到自己插自己調較，希望打返係屋企果種感覺。你話主辦單位有無可以改善嘅地方？有，提供SPARE嘅基本GEAR，比選手真係無鍵盤搞唔掂就開口借囉，方法有好多，一定可以做好啲。主辦單位要選手自帶，可能係想縮短SET GEAR嘅時間，每次啲人用完自己野，又要搵一班HELPER去插返齊啲GEAR，下一組選手落場，又再拆過，時間上係一個問題，又係果句，可以諗得詳細啲，避重就輕，係可以處理得更好。
問題係點解大家咁戀大聲去攻擊主辦單位？係因為大家一直都覺得，我去比賽，就應該得到服務，有人SERVE我。我行入間餐廳食野，我比得錢，你唔係無筷子呀？你叫我用手食呀？自己帶？你老未你痴線架？岩呀，你比左錢，你應該有返相應嘅服務。但問題係你無，你無比錢，呢個唔係買與賣，唔係交易，你係去參加一個比賽。
係日本某間餐廳食野，試過自備筷子等餐具，店員見到會微笑，用餐後，最後佢地甚至幫你洗返好哂你啲餐具，雙手遞返比你，令你感覺到一種溫暖。以上係一種交易，而你準備去嘅，係一個比賽。DSE你要比錢考呀，收音機你唔帶又得唔得呀？你一樣會自己帶，你唔會投訴，因為你知道果個係一個考試，無人會用服務你嘅態度對你，當然，唔代表佢會唔尊重你。
你無非都係覺得麻煩姐，又帶呢樣又帶果樣。但我覺得係十年前，如果個比賽要求大家自己帶野去打，大家都覺得理所當然，因為不嬲都係咁樣。呢個世代好舒服，有公司幫你搞埋比賽，每個比賽都唔使報名費，有獎金有獎品。十年前，電競都未起頭，好多選手都覺得一切唔係必然，希望電競可以走得更遠。
今日，你覺得個比賽規則垃圾，你可以唔打。個時間咁遲都未知，你可以唔打。個報名安排咁遲都未出，你又可以唔打。只係，我地都唔係用心去比意見，都好似係度左一腳右一腳，去踩冧上一代電競人辛辛苦苦建立嘅野。無人會思考一個比賽，背後要用幾多時間去籌備，幾多資源去準備。一切嚟得方便，自自然然，你唔會明白，接住無左體諒，之後唔會將就。點解香港電子競技行得咁慢，一部份係有啲公司借電競賺錢，佢地CAP水佢地垃圾，係，我知。但另一部份係，我地有無真係好支持呢個運動嘅發展呢？當個政府九唔搭八都叫做「忽然電競」嘅同時，你係體諒將就，定係繼續落井下石呢。
成件事咁急想做，一定係會做得唔好，但我見到有班人，即使係好急，都好想去試下做，唔好哂左果一百部機，希望搞返次PUBG比賽啦。搞得好唔好就其次，但我比掌聲嘅原因係，佢地起碼肯去試，希望行前多一步。
若然你話：無咁大個頭就唔好戴咁大頂帽啦。咁我真心覺得，除左果位能夠係明報A1登聲明嘅電競推動者之外，香港無幾多間電競公司係有財力。無財力係咪唔做？咪盡做囉。
我都知個比賽有贊助，但又問心，係香港你搞電競，比個名姐嘛，互相支持互相撐下大家，拎獎品出嚟，最緊要做到件事。你老未以前打機你問獎品？出黎比賽你有隻滑鼠做獎品你都叫執到啦，現金獎一千，五個人你地自己除啦。就算時代進步，市場細，無計，大舊錢落左去LOL度，呢個你知架。件事無BUDGET咪做到幾多得幾多囉，你點樣叫贊助死夠一百隻MOUSE、MOUSEPAD、鍵盤、耳機出嚟呀？樣樣開盒新架啦，打完用完再入返盒啦，拎返出去賣啦。係人地嘅角度，永遠有自己嘅難處，而我地無明白、無體諒、無將就。
能唔能夠明白，體諒同將就下，做選手，可以嘅就帶自己野出去比賽，唔可以嘅，係屋企睇下比賽支持下咪算數囉。主辦嘅，吸取下經驗，下次再處理得好啲。
出左嚟搵食幾年，學識左兩隻字：盡做。
盡做啦，老細。
detect公司 在 Detect | Safe evacuation | Building solutions 的相關結果
Detect. Early detection leads to protection. Advanced detection solutions can ... 伊頓2020 年的營收為179 億美元，產品銷售客戶遍及175 多個國家/地區。 公司. 關於 ... ... <看更多>