身在異地，終於有時間消化今日份施政報告。講樓按問題，真係想問林奠，你做咩～啫？
1：環球經濟轉差、貿易戰、仲有搞出嚟嘅逆權運動，樓市明明下行緊，依家先嚟所謂「鬆綁九成按」，加大槓桿推人上車？係咪搞笑啊！
2：說時遲那時快，放寬九成按至800萬，條街即刻有業主「封盤迎加價」。好簡單嘅供求概念，400-800萬樓需求大咗，短期內加價係必然之事。
3：情況係點呢？本來你見到樓價跌，ready上車，500萬樓，fair啦！點知呢，個龍門又搬後咗啦，依家500萬變600啦！「你可以用新按保Plan，一成首期就得啦☺️仲唔使過壓測」唔使還嗎？
4：條友就係咁，永遠係解決面嗰浸問題就當冇問題！多人出去示威咩？就嚇到佢哋唔敢示威，唔俾佢哋蒙面，咁就冇問題啦。依家大家上唔到車咩，減首期借多啲錢畀你咪上到車囉！都CLS！而家個核心問題係樓價貴啊，唔係你減咗個首期，樓價就唔貴啊！你咩邏輯呀？
5：當初推辣招時，MA講「我哋唔係為遏樓價，而係降銀行信貸風險」
年頭講唔會放寬按揭成數要求，波叔講「因為我哋唔想發出錯誤信息，誤以為政府有舉動影響樓市。」
喂呀！以前所有樓市措施，全部都係講到咁客觀，不停強調「我唔係幫你哋上車」；
到今日，有長達4個月示威，突然就可以開宗名義「為協助首次置業人士，我們會放寛⋯」云云。
喂！原來你係真係可以有作出舉動去「幫」人上車，仲鬆到一鬆就鬆800萬樓，連壓測都唔使過！咁過去十年你係咪一路玩緊我？咁你真係唔怪得大家記住「是你教我們和平示威沒有用」啊！（sor，你而家都係玩緊我，因為今日先推呢招，完全唔係「協助首置人士」上車。）
6：今日嘅示威，早已超越物質嘅問題，係良知問題。唔好以為揾層樓綁住年青人，大家為層樓就唔敢出聲；更加唔好以為解決樓價上車需要，就可以化解危機過到骨，更何況，你解決唔到！
六大訴求、缺一不可！香港人，更需要嘅係真相同公義。
By千頌C
