［無公平 無同情 明輸仍然贏］炒股啫，輸仆街都唔使死嘅。何況其實冇輸錢！
（明報原文：https://bit.ly/2CiH6Bd）
1. TLDR：有嘢唔好屈住，記得同人講。你以為自己好廢，大把人比你更廢。最緊要係，對自己坦白。做唔到嘅，就寫日記。
2. 前文提要：美國有位學生，炒股初哥，見到自己戶口結餘係負73萬美金，以為自己輸好多錢，唔想連累人，嚇到自殺—問題係，似乎佢根本冇輸咁多錢。（https://bit.ly/2BmpZ10）
3. 結果有多啲資料了，不幸地畀我估中，世事夠晒諷刺，事主以為自己輸73萬美金（的確好多錢，但唔使死的），自殺。舊文我已經話，只係少少技術上問題，佢似乎做兩隻腳，一隻結咗數另一隻未結，埋單好可能唔係輸咁多—不幸（定有幸？）地，消息話，其實佢個戶口係正數。
4. 事主個做分析員（！）嘅老表貼咗個cap 圖，應該可信（https://bit.ly/3fHzdDR）
5. 對於呢單嘢，仲有幾個點可以講。當然有人會質疑Robinhood個介面唔好，但由我理解，其實其他卜架都係咁上下。Robinhood就承諾會改善，OK
6. 另一方面，亦因為Robinhood之類，就根本冇客服嘅。你想打去問都唔得。但冇計，你要零佣嘛，乜都係成本。呢啲嘢當然慳得就怪。你畀得少佣或零用，就唔會有經紀客服同你吹水了。
7. 至於 「羅賓漢」會要求投資者為其填寫一份問卷，以證明自己的投資經驗，並表明清楚當中風險 云云，就算鳩數吧啦。但全世界都係咁，《奪命金》嘛，「清楚明白」。而我到而家都唔明，到底咩叫做「清楚當中風險」。你買乜乜原油ETF時，知唔知會有轉倉？十個有九個都唔知。同樣地，你買匯豐果時，知唔知會除埋淨都唔派息？應該一百個有九十九個都唔知可以。咁點？屌叫你買匯豐果條友？
8. 當然，《奪命金》云云，雷曼迷債，好多不良銷售。但，今次呢單，斷估都唔係有個靚女RM去昆個學生買嘢。
9. 但，事主自己唔識睇，其實真係可以問人。唔好自己諗埋一邊。我唔知佢有冇貼上美國連登啦下，似乎冇，似乎佢完全冇同人講。咁就好大件事的。記住，有事要同人講。
10. 真的，唔好自己屈住。埃汾其實成日都覺得自己寫嘢唔夠好，而事實根本唔存在「夠好」，永遠都可以好啲，最好嘅文永遠係下一篇。即使以前，好多好多年前，唔止一個人，唔同圈子識嘅人，都話我寫得好，甚至係好多年都有人講，我都仲係覺得自己係咪唔夠好—應該話，係咪真係唔好。
11. 但，後來，好簡單。平常心，唔好覺得自己好叻，但又唔好覺得自己太廢。你以為自己好勁，就會發現好多人勁過你。你覺得自己好廢呢？丫，你又見得更多更廢嘅人。當我見到更多廢到無倫嘅人都可以寫文，就覺得，喂，我點廢都廢唔過佢下話，就開始有返啲信心。
12. 同一道理，今日父親節。我有一排以為，我同屋企人嘅關係十分惡劣（呢度唔一一細解）。但其實可能只係我睇得太多CCTVB睇太多教育電視，陶醉於人地嗰啲根本不存在嘅一家四口 早上妹妹說哥哥早哥哥說妹妹早 嘅世界。到我識得多咗人，聽多咗其他人嘅故事，先知道，再惡劣嘅都有。真係打鳩老豆老母嘅又有，老母上Facebook同人講自己個女係雞嘅又有（最慘個女唔係嘛！係就當宣傳易）。所以我嗰啲真係濕濕碎，都仲有一年見幾次，生日父親母親節都食飯，濕碎啦。
13. 所以真的，雖然最好唔好同人比較， Measure yourself only against your previous self.．但，好絶望時，不妨望下人地，其實自己都唔係好慘啫。
14. 套返呢個例子，事主一早搵人問，好可能就會冇事，甚至乎而家起緊雙飛（？！）。好似贏錢喎
15. 不過話說回頭，搵乜人問，又真係另一種學問了。搵錯人，又可能冇事都變有事喎。但，如果你個base case係覺得要死嘅，照計搵人，都唔會much worse off
16. 最後回應多兩點，呀事主自己，質疑Robinhood點解畀咁大槓杆佢。咁都解過，好可能因為佢以為自己輸咗好多錢，已經不能冷靜咁諗嘢。但話說回頭，你唔係想做槓杆嘅，點解玩期權？真係以為低風險高回報？有咁著數嘅嘢？做乜大戶唔自己買？
17. 同樣地，「「羅賓漢」不提供無擔保期權的出售。」。我理解，即係你不能sell option，不能白頭片。上次個post都大約講過（https://bit.ly/2BmpZ10），option係咩回事。你sell call嘅，例如港交所行使價400蚊，你對家畀期權金你，買咗呢個權利，到時佢可以行使或不行使，但理論上隻港交所可以升到500蚊，5000蚊，50000蚊都得。升到50000蚊你一樣要400蚊沽畀佢，所以可以蝕到你仆街。
18. 好啦，想講嘅問題係，咁多年嚟，真係在公在私，都見過好多西人（尤幸多數都只係花生，埃汾唔係跑數嘅）。買嘢嗰時，就個個神勇戰士上身，風險我自己受，做乜阻止我，我有我自由。但到輸咗錢呢，就輸打贏要，喂你最初冇講呢啲風險喎，喂你做乜畀我買呢啲嘢。
19. 所以，點解應該對自己坦白。明明係貪，就唔好扮自己唔貪。唔得嘅，就做trade log—寫低當時自己諗乜，點解想買。以前啲友就寫投資日記，今時今日其實你出個post都得。總之，記低你嗰刻個諗法，第時拎返出嚟打巴自己。
20. 咁，就會學懂自己負責任。先會有進步
21. 都唔止投資，其實各樣嘢都係。例如我呢啲不停寫文嘅人，當然有寫低自己點解當年會轉工去星展，咁後來亦都睇返，果然係當初啲諗法太天真。就唔好怨人。
