《今個月係我第二次聽到有朋友話，想拎外國嘅居留權所以決定讀doctorate》
前幾日同一位朋友食飯， 展開咗一個無厘頭嘅對白...
我：要畀幾多錢你，你先肯環繞九龍半島香港島裸跑一次？
朋友：其實好少錢都會，一億啦，香港人好善忘，無人會記得
我：我要一億以及移居火星嘅居留權我會願意
朋友：有得移居火星，唔使錢都跑啦...有乜嘢衰得過繼續留喺香港住
我：我睇新聞話 坐太空船去火星大概需要十年嘅時間，驚唔驚暈船浪
朋友：咁咪好囉，一到火星林鄭月娥就落台，最少你唔需要tolerate 佢執政嘅 嗰段時間
我：我諗起，其實移居火星我真係ok，但要有wi-fi
※※※※※※
到底香港係唔係咁不宜居住？喺香港，讀書嘅意義係唔係衰到為左得到外國居留權？
聽到嗰兩個朋友因為想拎外國居留權，決定讀完master 再讀doctorate，真係嚇到我個心離一離，明明佢哋唔似咁有上進心同讀書嘅興趣， 勉強自己讀書，只會好似華府入面嘅華文華武咁，愈讀愈智障。
※※※※※※
喺我修讀master接近尾聲嘅時候，好想分享今時今日仲應唔應該讀master，讀書嘅意義到底係咩？
未報master前，好多同事 同我講bachelor degree就好似而家小朋友識彈鋼琴一樣，只係 common skill，想做supervisor 或者management， master 係基本門檻。「master 係無野學，但六位數字買張沙紙，就好似中女買skII咁，就算無用都財散人安樂，個心定啲，CV 靚啲，呢啲 就係所謂嘅上進心同competitiveness」
我曾經反覆思量過6位數字炒股票會唔會更有上進心？
買張沙紙要6位數字，double a都買到成貨櫃。我讀讀下master期間，爆出蔡思貝讀菲律賓大學，用幾個月嘅時間畢業，快過用靈格風學外語，我就更加覺得自己好蝕水。
經歷咗兩年，我想講「master係有用，但你必須要有正確讀master嘅心態，你先學到野」
中小學嘅課程係俾教育局編死，就好似茶餐廳既常餐一樣，間間學校都係一式一樣，變化唔大。真正嘅學習，確係由bachelor degree開始架，讀大學就好似去酒店食buffet，大學同lecturer係提供more than required嘅嘢俾你食，正如你去四季酒店食buffet，提供嘅嘢食，係夠你食半年，但你都只可以喺一晚嘅時間食好西，佢就係教你識得搵最好嘅西來食，教你去學識以後點食野。
點解有啲人話讀大學或者讀master學唔到嘢
呢啲人，就係食buffet 只食炒飯，填飽個肚嘅人。佢哋食完好西都唔明好西嘅真味。個啲只係想買張cert，無打算學野嘅人，點可以怪人無野俾你學？係大把野你唔學姐。
咁蔡思貝呢啲係咩人？咪就係俾左錢無食buffet 但有影相放上ig嘅人囉。葛佩帆係咩人呢咁？咪就係去M記食哂所有餐，都仲好意思同人講自己岩岩食完Buffet囉。咁朱千雪係咩人？咪係一次比一次去更高級嘅酒店食buffet 嘅人，食到欲罷不能。你學唔學到野，唔只你自己知，其實你嘅氣場係feel 到。好多人 會好似裁判團咁質疑你，讀master有乜嘢用，佢有用嘅地方在於佢係協助你嘅個人思考， 你個人識諗嘢你就做乜嘢 都會比人做得好。
至於master 呢餐buffet值唔值呢？
其實就好似你去鴻福堂飲涼茶，到底有無用呢？因人而異啦。我只能夠話，我唔利用呢六位數字，我極有可能會買多好多個 功效唔大嘅facial plan，之後嘅職場人工加幅可唔可以cover到master degree嘅cost？我呢啲人 只識計手指可以數到嘅數，我真係唔識計。
master workload 的而且確非常大，就算你係得過且過嘅人，都要花費唔少嘅時間同心力，所以大家真係要諗清諗楚量力而為先報master
Master 最後一堂，professor人用咗Patricia Williams呢句：That life is complicated is a fact of great analytic importance.
世界真係比我想像中複雜，master 可能係提供咗一噸嘅食物，但我呢個眼闊肚窄嘅學生，食親buffet都蝕俾酒店，我只能夠話食呢一餐buffet嘅過程，雖然時不時都飽飽滯滯， 但行出間酒店嘅時候，係快樂嘅。
最後，喺呢度祝福兩位讀doctorate嘅朋友，可能佢哋都係眼闊肚窄， 但可以去最豪華嘅酒店食buffet ，的而且確值得我哋呢啲留守喺香港地獄嘅人 戥佢高興。
