《我哋都進步咗，我哋都回不去了》
可能有啲人對於新年所有鋪頭閂哂，有啲埋怨，但我幾享受新年期間所有舖頭閂哂嗰份寧靜。初三乜嘢鋪頭都閂哂嘅情況之下，我周圍逛，睇下有乜嘢好西食，行下行下俾我行咗去西環一個商場，可能係我自己大驚小怪，竟然俾我有驚人嘅發現，原來香港嘅仙跡岩係未執哂！我同朋友都覺得「商場水牌冇update吓嘛，乜而家仲有仙跡岩？」，然後我哋發現，佢真係冇執，而且初三佢都有開鋪.....
「其實應該唔好食架喎」
「但難得佢冇執喎.....」
冇錯，我哋根本冇打算咀嚼佢食物嘅味道，我哋係想食返嗰份回憶......
如果你有啲年紀，你會記得仙跡岩係非常早期嘅舖頭，佢係令大家認識珍珠奶茶。曾幾何時，大家係當仙跡岩好似Starbucks咁坐 ，曾幾何時 ，佢間舖頭係有盪韆鞦，你可以一路啜住杯珍珠奶茶，一路喺佢間舖頭盪韆鞦，曾幾何時，呢間舖頭有個飲品叫隨便 ，專俾啲有選擇困難症嘅朋友叫，個職員會好似酒吧 bartender咁，泡製杯時令飲品俾你。
點解一間令大家咁有集體回憶嘅珍珠奶茶舖頭，會執笠執到咁，執到以為佢已經唔再存在呢？
其實珍珠奶茶嘅潮流並冇減退，點解仙跡岩會做唔掂？
我諗仙跡岩最大嘅「死因」係佢冇跟隨時代嘅步伐，將珍珠奶茶 repackaging 。老實講，市面上嘅珍珠奶茶，強調幾有特色，加咗幾多原素，好多時，我都分唔出有咩特別。但點解而家珍珠奶茶咁氾濫，因為repackaging 過嘅珍珠奶茶並唔係一杯珍珠奶茶，佢係一個潮流嘅checklist，冇飲過冇話題，冇飲過完成唔到to do list。就好似Starbucks咖啡並唔係一杯Starbucks咖啡，Starbucks 係一個「中產」嘅象徵。仙跡岩冇有效咁follow 個trend，冇repackaging過佢杯珍珠奶茶，佢冇將杯珍珠奶茶加branding 再「吊高來賣」。
理所當然，死因又點會得一個，仙跡岩執剩幾間，都有社會因素，都關土地問題事。而家所有珍珠奶茶嘅鋪頭，面積一般都只係比找換店大小小 ，試問一間珍珠奶茶嘅鋪頭點可以畀得起租，租到個地方畀你盪鞦韆？
呢間仙跡岩門口有張poster，寫住今年已經25週年。我望住佢個menu ，我諗起好多回憶，我叫咗個mocha 點子，一個仙跡岩脆豆腐。當碟脆豆腐擺喺我面前，真係恍如隔世，好耐冇見。一食入口，真係一如所料....
「以前真係覺得好好食，點解而家唔覺，係咪個味定個煮法唔同咗」
「佢冇唔同到，係你唔同咗，你食多咗好野，再食返n 年前嘅所謂美食，你有咁多選擇，有對比你就明佢根本從頭到尾都唔係好食」
冇錯，點解佢執？唔係因為佢退步咗，而係當大家都進步咗，食得好咗，見識多咗嘅時候，佢25年都仲係保持水準，keep 住唔進步，執笠係意料之內嘅。
「如果佢而家sell 返集體回憶，repackaging佢啲食物，仲有冇得做呢」
Um… 基本上佢都做死咗個brand，錯過咗吊高嚟賣，可以進步嘅時刻，而家都好難再逆轉勝。好似張愛玲半生緣入面所講「我們回不去了」。大家都進步咗，我唔可以彈返轉頭接受只sell 集體回憶嘅劣質食物了。元綠壽司係呢個道理，明將壽司亦係呢個道理，當然，仙跡岩都係啦！
