notanyplace的八卦，YOUTUBE和Yahoo名人娛樂都在討論

Swire x DBS@港島東中心
大家食咗飯未呀？？？？？

#ProjectAfter6Busking
#ProjectAfter6
#NotAnyPlace
#TaikooPlace
#DBS
#LivemoreBankless
#DBSturns50

或者好多人都唔知，其實小弟喺離開電視台之後、開自己公司之前，我其實返過半年Office；以下講嘅嘢可能好多人會覺得見怪不怪，但對我呢個冇乜返過Office嘅人嚟講，一開頭嘅時候真係非常咁震撼，直頭完全扭轉咗我對「工作」嘅認知。

以前做新聞，如果有咩事突然要採訪，可能我自己去，可能叫同事去；但無論邊個去都好，喂一個電話通知，話行就行㗎啦；但係原來喺辦公室就完全唔係嗰回事；當有件事要三個部們合作咁至算啦，個Project我牽頭嘅，咁我走去同部門A嘅同事講，佢答：「好呀，我幫你搞住先吖，不過你記住補番Email畀我喎！」

再去部門B，嗰個同事答：「你冇Email嚟我唔會郁住㗎哈哈哈哈哈。」

吓，乜咁嘅咩？嗰刻我係立即黑人問號咗。

以前完全冇呢啲嘢，所以單單係適應呢個「內部溝通」方式，已經玩咗我兩個幾三個月；當中領悟到嘅嘢，又可以分為以下幾點：

1. 學做PR嘅時候好多人都問：以前人哋Pitch你，而家你去Pitch人，係咪好唔慣？我話唔係，絕對唔係；我最唔慣嘅係第二日返工，開著個Mailbox，嘩，幾百個Email，關事嘅唔關事嘅，全部都cc埋我；到你終於掌握到邊啲要覆邊啲唔駛理嘞，嗰陣你就會發現，淨係覆要覆嗰啲，都夠玩你一個上晝；好嘞，到你食完飯返嚟喇喎，咁又有一堆新嘅出現，咁你又覆喇喎；覆完之後你望下個鐘，原來夠鐘收工，而你原本要做嘅嘢係一啲都冇做過，返工嘅生命，就燃燒晒喺覆Email呢件事上面；

2. 識字唔代表識寫Business Email，因為呢樣嘢嘅用字直頭係另一套Language嚟：第一次接觸嘅時候，我真係好奇怪點解本來簡簡單單一個意思，其實三兩句就講得完，都硬係要搞到兜十幾個圈嚟表達，模稜兩可，好似係特登要將所有重點收埋，等收信嗰條友自己估咁；後來有前輩「指正」，話咁樣叫「保護自己」。嗰刻我發現原來自己做咗十幾年嘢，原來一隻Business Email都唔識覆；

3. 寫Email要有禮貌。做咗一陣之後，我就覺得你唔駛對我太好禮貌嘞，因為喺嗰啲咩Kindly呀、Please呀之後嗰堆字，通常都冇乜好說話；好多人似乎覺得喺Kindly或者Please之後寫堆粗口都好尊重你；就算唔係粗口，嗰啲嘢通常仲難聽過粗口；

4. 試過有一次，Send隻Email去聯絡合作嘅嗰間公司，Send咗好多次都冇人理我。有同事話：「你係咪冇cc佢老細呀？」cc完之後，嗰條友竟然秒回。以後，用半粒鐘寫好隻Email，要再用多半粒鐘度下cc邊個、bcc邊個、啲先後應該點排......

到而家，我都認為Business Email係一門藝術。重覆一次，大家應該會覺得我好低能，但係對於冇乜返過Office嘅我嚟講實在好好好新奇；新奇嘅仲有開會Brainstorming同Con-Call。開會，頭幾次我曾經懷疑過自己，係咪我太蠢呢？點解我一句都聽唔明嘅？開多幾次之後就領略到個真諦：原來Brainstorming，即係代表一班大家都唔想見到對方嘅人坐埋一間房，然後輪流講一啲大家都唔明嘅嘢，總之越冇人明你就越勁；Con-Call都係咁上下貨色，我試過邊開邊食嘢，又唔記得Mute個電話，結果畀人問：「邊個食緊嘢！？」🤣

咁好定唔好？其實我唔敢講。可能有番咁上下規模就一定要用呢啲方法溝通先Work啦，不過到而家自己開公司，人手唔算多，我都係同同事講對內嘅嘢就咪鬼搞到咁複雜，最緊要做出嚟舊嘢好好睇睇；由我講呢啲辦公室嘢或者冇乜說服力，但係如果你睇太古坊同香港青年藝術協會攜手呈獻嘅原創英語音樂劇 - “PROJECT AFTER 6：Cube Culture”就肯定好有共鳴。套劇嘅30個演員係真正喺太古坊位處嘅鰂魚涌區返工嘅上班族，仲有批嗰區嘅居民；佢哋喺劇中用搞笑方式道盡Office事，除咗我上面提到嘅Email呀開會呀Con-Call之類，仲有茶水阿姐講是非、同事之間爭Air-Con控制權、同埋每一個Office都會有嘅騎呢同事；我覺得輕鬆抵死，返開Office嘅阿太就猛話「好中呀真係好中呀」，笑得好開懷，因為個演出實在好睇，好難相信佢哋係業餘演員。

其實呢套劇想帶出嘅意思，就係做人唔能夠淨係掛住做嘢；既然長命工夫長命做，就記住放工時搵機會畀自己放鬆下；老套一句”Work Hard, Play Hard”，去Taikoo Place入面嘅多用途藝術空間Artis Tree會係一個幾唔錯嘅選擇；除咗今次呢套劇之外，嗰度仲會有好多藝術文化活動㗎，放工之後去睇下吖！

#PROJECTAFTER6
#CubeCulture
#Musical
#WorkLifeBalance
#NotAnyPlace
#TaikooPlace
#ArtisTree

//用味覺享受生活品味
一杯雞尾酒帶你味遊世界//

其實喺香港生活，每一日都可以好充實，忙完一日可以放工同班朋友，一齊飲返杯Cocktail，簡直賞心樂事。最近太古坊聯同Diageo World Club就舉辦咗首個World Cup Pop Up 酒吧，俾大家感受下置身外國嘅感覺，一齊見證本年度地區冠軍調酒師嘅誕生 - World Class Competiton。而今屆冠軍就係我隔離呢位型男，代表Quinary嘅Samuel Kwok，嬴得今年World Class Competition 港澳地區冠軍寶座，並將代表香港及澳門到墨西哥城出席世界頂尖調酒大賽World Class Competition。

而Samuel嘅冠軍作品係以烏龍茶加入梅、桂花、山楂及梳打水調製而成，炎炎夏天就最啱啦。

為期四日（6月12至15日）嘅World Class Pop Up酒吧喺鰂魚涌太古坊舉行，俾大家可以試到幾位著名嘅本地調酒師 Alexander Ko、Samuel Kwok、Lok Cheung嘅Cocktail之外，仲有各式佐酒小食，俾大家放工之後可以享受美食，輕鬆一下。錯過咗嘅朋友，好似話糖廠街嚟緊仲會有其他節目，下次等我再帶大家去玩啦。

#notanyplace #taikooplace #worldclass2017 #worldclasshk #worldclassdrink | Taikoo Place