《我哋唔問候盧寵茂，係有原因嘅》
唉！尋日睇見盧寵茂嬲爆爆，話人哋唔問侯佢，所以唔畀個副校人哋做。
我一睇到段新聞，個心好痛，嗱住嗱住，成晚都瞓得唔安落。
因為我明白，寵茂誤會咗我哋啦！
正所謂寵茂安危，匹夫有責。
寵茂出事，就等同國家大事，我哋咁Ｑ忠貞，又點會坐視不理？
加上寵茂生成一副「老母相」，何止問候佢，問候埋佢老母都係人之常情。
之但係做咩我哋咁衰仔，No one go to hospital問候佢娘親呢？好簡單啫，要問候人，
首要條件係佢真係出咗事呀嘛！
由2011年寵茂一句「振英係最有目標、智慧同承擔架」，
咁嘅大話都講得出，
你就知道佢吹水唔抹嘴，熱愛演戲最愛臨記。
所以大家都明白，當日佢喺人群之中，
毫無預警，接近冇人接觸下嚟個689度鯉魚翻身，
插水式跌落地下，再抱住膝頭，
動作順暢而一氣呵成，難度系數極高。
全部都係一場戲！
問題就嚟啦，如果星爺做場戲係要壯烈犧牲嘅，你會唔會走去慰問佢屋企人？
唔會架嘛，因為你知佢做戲啫！
條屍係道具、受傷係化妝、醫院都只係拍攝場地！
你試下人哋做戲扮嘔血，你之後衝去話幫佢Call白車吖！對方一定覺得你串緊佢！
好快就會出現經典對白：「跟住你串我吖嘛。」實在有傷和氣。
既然你扮緊嘢，我哋當然冇問候啦！
寵茂有幾愛國愛黨，大家點會唔知？
佢當日犧牲自己嘅高尚情操，大家點會唔體諒？
但估唔到寵茂愛國愛得太深，連個心都變埋玻璃心，
以為我哋唔問侯佢，係冷落佢！
其實佢嘅演技大家盡收眼底，就算係羅拔迪尼路親自在場，都必然會感動到拍手落淚。
不過寵茂今次誤會咗人，即時發威唔畀佢做副校。
我哋再唔氹返佢，分分鍾遲啲唔再為國出力，
咁就係市民嘅損失。
為免發生呢類不幸事件，我認為大家都應該參加民間自發嘅「問侯盧寵茂」活動，
狠狠地問侯佢！
等佢發現我哋對佢嘅愛有幾深～
#大學係一間大公司
#廖長江我試下玩GoogleTrends幫你測下熱度不過我驚你會喊咋
#NiceGuy好過你班仆街啦
