Search
🎥 Just wanted to check in as I’ve been MIA on social media! Playing doctor and fighting zombies day and night and running on 2 hours of sleep but still feelin’ good 🤩
#白色強人
#金宵大廈
*嚴禁劇透*
*粗口自行過濾*
*可瘋狂話戲屎但免外表批評人身攻擊*
·
·
[1230隔夜超短劇評][TVB][金宵大廈 EP19&20 大結局][夢遊]
·
[讚] 等了又等，終於集中講返阿蕭Alex、Coco旭輝同埋林哥仔林老師呢段超過50年時空嘅戀情。
·
喺最後一次回到過去嗰陣，船上面場流星雨，嗰段阿蕭同Coco話始終都改變唔到命運嘅對話，好感人催淚。如果佢真係好似一開始籌備拍攝嘅計劃咁，每一周先播一個單元，我諗佢剪返以往片段嗰吓嘅仿如隔世感覺仲強烈，可能仲好睇。不過世事無如果，依家個效果都唔差。
·
阿蕭同Coco喺60年代死咗，改變咗歷史，嚟到今時今日，Alex仲係空姐，避過咗失聯航班，所有人物嘅發展都同中有異，喺香港咁重氣壓嘅時候還啲角色一個好結局都係一件好事。阿廣揸巴士同東東小惠感情唔錯；何太應該冇咗個BB之後轉咗養狗仔又好，佢冇得生BB所以養狗仔都好，都可以從無咗個BB當中解脫；Mia成為韓星，李家俊應該仲係鼓勵佢完成夢想嘅人，因為佢拎住咗嗰隻Graffiti加油免仔；膠罐、Kelly、Simone再遇；金丁變咗做蔡san Carman嘅招牌手工啤酒；阿Raj變咗小食店老闆、佳爺變咗看更、晴晴變咗好似融合埋Mary性格嘅情趣用品店主。
·
新Alex同埋新阿蕭（容許我咁叫佢哋）都已經走出咗金宵大廈，但最後又係喺個有流星雨嘅天台度相遇，呢個約定原來係生生世世。佢哋兩個嘅眼神亦都暗示咗佢哋都應該仲有Alex Coco 阿蕭 旭輝 嘅回憶。最後李施嬅望住陳山聰啲眼淚剛剛好，好怕佢哋走埋去對方然後完，好在係企定定。
·
我亦都好鍾意林老師、林哥仔、靚寶一齊企喺比bar更高嘅另一幢天台度望住Alex，做一個永遠守護Alex嘅角色。呢吓抽出嚟，超越晒三個時空，唔錯喎，我覺得可以代表住三個時空都真係出現過，避免咗新時空呢一幕同之前咁多集嚴重割裂。
·
[彈] 呢句都仲係讚嚟，喺新時空咁多個單元主角嘅新生活裡面，我最滿意係Yuki同埋水哥嘅新生活。Yuki因為喺以前嗰個時空太過執着自己嘅外貌而出問題，但喺新時空佢就盲咗，當然可以解讀為佢終於唔係睇外表而係睇內在，但我最鍾意佢嘅原因係因為佢盲咗，我認為一個業報嚟，呢啲喺其他單元角色嘅新生活當中係見唔到。
·
講返兩次穿越時空，第二次時嘅改變係有，但如果可以有多啲分別，但最後結果兩個主角都要死嘅話，咁個努力都改變唔到結果嘅感覺會再強啲，到尾段新空間佢哋有新生活嗰種睇落去釋懷嗰吓又會強烈啲，大結局嗰個起伏就會大啲。
·
覺得唔夠喉嘅，仲有呢個單元先真正講林哥仔迷糊會變做怪物。我明之前都有鋪排，例如係怪聲同埋對靚寶講嘢，仲話要放怪物出嚟咬佢，但如果之前再加多少少，或者喺林老師嗰度放多啲奇怪感覺咁就好喇，之前好多時都只係以為佢掛住Coco 掛到傻傻哋，嘥咗劉江老師。
·
最後一個單元一口氣接住落都係講兩位主角加林哥仔咁濟，但角色情緒都一樣有甩漏。阿蕭完咗第一次穿越之後，明明應該好沮喪或者好擔心，總之應該有啲負面情緒。但由佢完成第一次穿越出咗浴室，到佢去到佳爺度見到招牌豬扒飯知道歷史可以改變， 中間冇咗個情緒。喺阿蕭身上成日都有呢個問題，如果係表示佢成日發夢搞到渾渾噩噩，喺前段都仲可以解釋到。但去到大結局單元都仲係咁就有啲奇怪，因為佢已經將啲夢串連咗一齊。呢啲位真係好影響觀眾投入，雖然好似好細微但影響好大。
·
[演員表] 陳山聰 飾 蕭偉明、劉旭輝 / 李施嬅 飾 Alex、Coco / 林子善 飾 膠罐 / 歐陽巧瑩 飾 Mia / 黃子雄 飾 佳爺 / 陸永 飾 蔡San / 康華 飾 Yuki / 劉江 飾 林老師 / 黃致豪 飾 水哥 / 張彥博 飾 林哥仔 / 鄧佩儀 飾 晴晴 / 陳振華 飾 Raj / 張曦雯 飾 張曦雯 / 林秀怡 飾 Simone / 譚凱琪 飾 Carman / 陳嘉輝 飾 大隻廣 / 高海寧 飾 小惠 / 鄭耀軒 飾 東東 / 何啟南 飾 雄哥 / 周麗欣 飾 林哥仔母 / 楊證樺 飾 林哥仔父 / 鄧英敏 飾 林哥仔叔 / 楊凱博 飾 童年林哥仔
·
·
#1230隔夜超短劇評 #TVB #金宵大廈 #葉鎮輝 #羅佩清 #陳山聰 #李施嬅 #林子善 #陸永 #歐陽巧瑩 #黃子雄 #康華 #劉江 #黃致豪 #張彥博 #鄧佩儀 #陳振華 #張曦雯 #林秀怡 #譚凱琪 #陳嘉輝 #高海寧 #鄭輝軒 #何啟南 #周麗欣 #楊證樺 #鄧英敏 #楊凱博
*嚴禁劇透*
*粗口自行過濾*
*可瘋狂話戲屎但免外表批評人身攻擊*
·
·
[1230隔夜超短劇評][TVB][金宵大廈 EP07&08][鴉烏]
·
[讚] 鴉烏婆係衰人呢個概念係好傳統，好鍾意今次將佢扭一扭，原來佢都衰唔晒喎，因為啲小朋友真係好唔開心，先會跟鴉烏婆走。父母又真係喺小朋友消失之後先識珍惜，有晒前因後果，繼續呢套劇嘅人設原則，就係所謂嘅衰人，佢都衰唔晒。
·
其實傳說故事大家都好熟，如果將佢照辦煮碗做多次，好容易會悶。最近有兩套劇都係因為咁而搞到我冇乜興趣睇。
·
講返正題，點解呢個單元大家睇到咁投入呢？除咗大家都做過小朋友之外，陳家三個人嘅人設亦都好紥實。耀B演嘅東東經過幾個單元之後，已經知道佢係一個獨立聰明但係寂寞嘅小朋友，大家都好容易代入到。陳嘉輝做憨厚唔識表達愛意嘅老公，淨係識得搵食。高寧做一個進取嘅媽咪，為個仔嘅前途着想。呢啲人物喺我哋身邊都唔難遇到見到，甚至你同我都同佢哋差唔多。
·
三位演員都做得恰如其分。不過耀B佢啲集中力差啲，啲鏡頭一長啲佢就飛走咗，好在有個靚樣搭救吓，希望佢之後可以改善。
·
東東話佢鍾意《Peter Pan》，依家佢就同Peter Pan一樣，避開啲大人避開現實世界，去咗一個大人去唔到嘅地方生活，可以任意咁玩，又唔會長大。（其實鴉烏係咪即係Tinkerbell?!）
·
好鍾意佢帶出咗一個問題：父母應該點去教導小朋友面對現實。小惠同東東講話努力就一定會有回報，引導佢去勤力準備，為自己爭取最好，但佢自己就要喺爭取向上時卑躬屈膝。大隻廣就教佢無愧於心，正直生活就可以，但佢自己都覺但自己養唔起個仔同老婆係失敗。到底要好似膠罐咁令到東東有希望，定係好似阿蕭咁日啲同東東講事實先至好啲呢？如果膠罐無阻到阿蕭同東東講呢個世界唔公平，東東去到學校聽到富二代講話佢點努力都冇用，會唔會避免到佢喺之後成個價值觀崩潰而投向鴉烏婆呢？教導小朋友真係好難呀。
·
btw，係咪所有去咗鴉烏世界嘅小朋友都對大人無感覺呢？唔係喎，至少最後問小惠大隻廣拎返個乒乓球拍嗰個小朋友唔係咁。我估係佢放大隻廣同小惠入去，點解呢？因為係愛啩我諗。我有咁嘅解讀，係因為陳家啲相裡面佢哋最開心好似就係一家人打乒乓波嗰張，即係乒乓波係佢哋一家人最有愛嘅物件。我估計嗰位放佢哋入去異世界嘅小朋友都一樣好鍾意乒乓波，所以先會用乒乓波做「港口鑰」送佢哋去搵東東。嗚呀，原來有小朋友都仲等緊父母嚟接佢，我哋唔可以忘記呀，因為好似林老師咁講，忘記先係灰飛煙滅。呢個point我仲有感覺過大隻廣佢為咗老婆唔好傷心而明明記得東東都扮唔記得。無綫啲景真係要搞搞佢。
·
事先張揚嘅「曼德拉效應」條橋就係咁？
·
[彈] 唉，其實好多對白都太白，好多餘呀，打咗折扣。仲有個金宵舞廳廢墟真係一啲都唔廢，睇落仲好乾淨，可唔可以整污糟啲。
·
[演員表] 陳山聰 飾 蕭偉明 / 李施嬅 飾 Alex / 林子善 飾 膠罐 / 歐陽巧瑩 飾 Mia / 黃子雄 飾 佳爺 / 陸永 飾 蔡San / 康華 飾 Yuki / 劉江 飾 林老師 / 黃致豪 飾 水哥 / 鄭耀軒 飾 東東 / 高海寧 飾 周小惠 / 陳嘉輝 飾 陳忠廣 / 吳嘉儀 飾 鴉烏
·
#1230隔夜超短劇評 #TVB #金宵大廈 #葉鎮輝 #羅佩清 #陳山聰 #李施嬅 #林子善 #陸永 #歐陽巧瑩 #黃子雄 #康華 #劉江 #黃致豪 #鄭耀軒 #陳嘉輝 #高海寧 #吳嘉儀
