gohongkonggo的八卦，Yahoo名人娛樂都在討論

【李慧詩回家了－訪問#1】昨日，為數約20人的香港傳媒訪問了單車隊。李慧詩 Sarah Lee Wai Sze 跟我們詳談，由天光談到天黑。我真的希望，所有香港人都能在場。整個過程，笑中有淚，淚中又笑，「阿詩」當上導遊，帶我們窺探她的內心世界。我能做的不多，現以自己方式，最原始的直接引述行家們的問題與答案。盡做，以下先分享第一條。

背景：李慧詩自今年一月亞洲賽後，已經沒有回家。

行家：最想同屋企人講d咩？

李慧詩：「最想講呀……（諗左10秒）我阿媽成日都同我講話：『今屆如果攞到獎就退役啦！（大家都笑）唔好再踩喇，咁辛苦』，但係我自己真係……一方面我有啲唔捨得喇，另一方面，errr，我覺得成個運動員生涯改變嘅，唔單止係我個人，仲有我同我屋企人嘅關係。Errrr，由我一開始出去（踩車）嘅時候，我真係唔係好同屋企人溝通到，兩句就嗌交，成日鬧阿媽，阿爸阿媽都成日鬧嘅，errrm，啫係，會覺得家姐……佢好叻架嘛咁，家姐讀書，家姐讀書咁叻，啫係我比落去，就好差咁樣囉。」

「但係，慢慢我阿媽，知道我係可以喺運動成績度攞到獎，佢又慢慢開始了解運動員。之後佢就會話：『唔好騷擾阿詩喇，errr，得架喇，我地喺側邊睇吓新聞喇』，啫係佢哋係從新聞知道我（嘅消息）好多時候。甚至，我唔去開幕禮，佢都唔知，佢哋會留守喺個電視度睇。嗰時我已經無開電話，但係我唔記得同佢哋講，跟住佢哋睇開幕禮又無見到我，跟住我就覺得『哎呀！點解我無同佢哋講呢？』我後尾完晒（比賽），睇翻（訊息）我先知。啫係我有好多野，無同佢哋交代，但佢哋都會好諒解我，errr，到到尋日，啫係……（沙啞）啫係……完左比賽呢，咁即係打翻屋企，佢哋第一時間會聽，同埋……（流淚）你哋又偷影我～（大家大笑）同埋佢哋第一時間會聽，聽到佢哋把聲係好舒服嘅。有時我覺得，我好想喊，唔係因為輸嗰啲㗎，啫係可能我真係好掛住屋企人，好耐無見，奧運前我已經係好掛住佢哋。」

行家：「係咪有種打完仗返屋企，想攬住佢哋嘅感覺？」

李慧詩：「Errrr，我哋無咁open架（大家大笑，有人搞gag話試一試喇，人一世物一世）。我地屋企好傳統架（咁握吓手喇！李小姐你好，我係你老豆！），我地唔會講呢d，即係唔會話『媽咪我愛你！』呢d啦，又唔會抱呀、鍚呀呢d～」

My commentary
袁志偉，你現在應該明白，為何體育新聞是必須、是不可或缺的。李慧詩：「媽媽好多時候係從新聞知道我嘅消息。」

#盡做 #GoHongKongGo #香港隊加油 #DCinRio #Rio2016 #Olympics #DanOnOlympics #DanOnTheMove

【李慧詩回家了－訪問#2】昨日，為數約20人的香港傳媒訪問了單車隊。李慧詩 Sarah Lee Wai Sze 跟我們詳談，由天光談到天黑。我真的希望，所有香港人都能在場。整個過程，笑中有淚，淚中又笑，「阿詩」當上導遊，帶我們窺探她的內心世界。我能做的不多，現以自己方式，最原始的直接引述行家們的問題與答案。盡做，以下分享第二條。請大家支持和留意各大報章、網媒行家的有關作品。

行家：今屆嘅回憶？

李慧詩：「我覺得今屆同上屆有d類同。上屆，好多人都覺得我好開心，贏咗銅牌。但其實上屆爭先賽失利嘅時候，反而給我更大感覺。嗰個痛，係兩、三年之後都會……（哽咽）……（說不出話）……即係（聲音沙啞），都會覺得『點解會咁呀（強忍淚水）』，但係呢……呢一個經歷，會令我更加珍惜四年後（2016）嘅自己……唔好俾紙巾我呀！（大家大笑）明明我都未出嚟架（眼淚無掉下來）～即係令到四年之後嘅我會覺得，其實唔止運動員，我地（一般人）好多機會都只係得一次，上天只會俾我地偶然遇到。你可能每一年都會遇到某d事，但做到最好，可能就只此一次。所以，我唔想有咩差錯。所以，上一屆有遺憾，今屆都有遺憾，但呢個遺憾係少過上年。」

行家：賽後開電話同屋企人講什麼？
背景：她家2011搬去牛上之後，買咗個新電視，但而家已經花花地。

李慧詩：「比賽當日（電視花花地），家姐又返咗教會，唔喺屋企，無人識校電視。阿媽特登影左類似《通勝》咁呢，話屬兔仔要紅色同綠色，忌黑色同藍色咁喇。佢又話個頂帽又黑色、架車又黑色、件衫個D又全部灰色，唔怪得之攞唔到獎喇！跟住我地屋企人就話，唔係喎，但係我隻襪係紅色架喎；跟住我家姐就話，唔係喎，我塊面都係紅色；跟住我就同阿媽講，唔係喎，我教練幫我買個d床單呀、被單呀全部都綠色呀！」

行家：尋晚（比完賽）瞓得好，係因為睇完fans留言？

李慧詩：「係因為我太夜瞓（大家都笑）！所以好累！都放鬆咗嘅，比咗咁耐比賽，但係尋晚其實係好唔想瞓覺。因為，errr，太耐無試過咁樣……放肆自己呀。啫係，食杯麵都會覺得係一個放肆嚟㗎，但係……哈哈，之前個年都無點食過杯麵。啫係你會覺得，好多野都可以試下啦，終於都鬆口氣喇，可以去返一個，都市人嘅步伐嘞，行路又唔驚嘞，啫係我地平時，唔可以行咁多路架嘛。跟住hmmm，食野又唔駛話一定要食多d菜呀、碳水化合物呀，乜嘢都食下喇，哎呀，今日唔記得食雪糕喔！」（大家又笑，有人話：麥當勞麥當勞！）

My commentary
不要問體育有什麼貢獻。要問的是，你為體育貢獻了什麼。我中學讀東華三院，我還記得，體育，屬德智體群美五育之一。五育，有什麼貢獻？你懂的。

#盡做 #GoHongKongGo #香港隊加油 #DCinRio #Rio2016 #Olympics #DanOnOlympics #DanOnTheMove

【香港單車隊回家了－訪問#3】昨日，為數約20人的香港傳媒訪問了單車隊。李慧詩 Sarah Lee Wai Sze 跟我們詳談，由天光談到天黑。我真的希望，所有香港人都能在場。整個過程，笑中有淚，淚中又笑，「阿詩」當上導遊，帶我們窺探她的內心世界。我能做的不多，現以自己方式，最原始的直接引述行家們的問題與答案。盡做，以下先分享最後一篇。請大家支持和留意各大報章、網媒行家的有關作品。

背景：成績有目共睹的香港單車隊，長年在外訓練，每年只有幾天假期是常識。01體育記者李思詠Michelle Li曾如此形容單車隊的訓練：「北上昆明彷彿遠離地球，不是因為簡樸的環境，而是生活模式，日程不以幾月幾日星期幾切割，只有速度課、耐力課、體能課、調整課。」

行家：生活似唔似機械人呀？

李慧詩：「我覺得，好難做到機械人㗎喎！教練其實同我講過嘅，佢好想我係一個機械人啦（苦笑）。咁但係，佢話好多高水平、去到世界級嘅運動員都會係好感性，同埋佢哋會情緖化啲嘅。咁所以，我覺得自己一啲都唔似機械人囉，就係因為咁，hmmm，所以我先至可以（踩）到，errr，好累。啫係……啫係機械人去到好累，佢『吱吱吱吱吱吱』，嘻嘻嘻嘻，跟住冒煙㗎嘛（大家又笑鳥）吱～～～吱～～～然後（彈弓）彈彈彈～～你地都唔知機械人嘅！」（大家會心微笑）

行家：回想爭先賽，點睇？

李慧詩：「爭先賽真係好靠心理，啫係，因為我嗰時都……炒咗車喇。其實，我都仲好有信心，但好明顯我嘅信心，係唔及佢哋嘅信心，你好易睇到㗎。（但係你會唔會expect四年後，仲係呢班對手？）佢哋應該會expect我唔喺度㗎喇，哈哈哈哈，因為……因為其實佢哋而家都好……好後生，全部都廿歲出頭，咁我呢d廿歲尾嘅，對佢哋嚟講，係……hmmm……無乜可能仲出現喺四年後架。咁，今次Anna（美雅斯）佢，佢可能都會好驚訝自己攞到keirin，因為其實大家嘅實力真係好強，咁我地成日都講，運動都係天時、地利、人和囉。」

行家：返香港最想做咩？

李慧詩：「首先係，好想快啲返到香港喇～（大家明住笑）因為，我地19號夜晚10點幾到廣州，跟住20號先至喺廣州返香港，咁就搭直通車，可能中午返到啩（最想做咩呀？）而家真係無咩最想做呀，d記者都問我最想做乜，我最想咩都唔做囉，哈哈！（之前都係話旅遊？）旅遊算唔算做嘢呢？我覺得旅遊唔係一樣野。其實，無一樣特別嘅嘢想做，想咩都唔做。」

行家：同教練傾左未？休息？放假？

李慧詩：「無呀，教練尋日開會嘅時候就同其他運動員講，你放幾多日呀咁。佢就凈係同我講話，你呢幾日先放鬆心情啦（全場喪笑～幾日咋？另一笑說，話咗㗎喇，然後以港式國語講，你有三天、三天假期呀！另一又說，教練講過一週？咁包唔包呢幾日搭飛機呢？）一睇就知包啦！（然後Sarah靜了片刻）……errrr……其實我又唔係話特別好……好需要，啫係唔做運動嗰種放假嘅，我反而係好……好想做下其他類型嘅運動，啫係都係會郁嘅活動囉，但唔係好想再好hard嗰啲嘅訓練囉。」

行家：決定咗參加下屆奧運定係點？

李慧詩：「……（想了三秒）我諗，都係其實睇嗰時有無機會嘅。因為hmmm……我自己會以獎牌為目標。如果……無機會去為獎牌……嘻嘻嘻嘻，為獎牌而去奮鬥嘅話，啫係我覺得，hmmmm……我會失去方向，咁我會寧願去做一d令我更加有衝勁嘅嘢。我自己對自己嘅人生係，我一定要有一樣嘢，係我做極都唔會覺得累，即使外界覺得我好辛苦，但係我係唔會覺得辛苦，同埋hmmm……我係可以滿足到唔瞓、唔食嘅。我會踩到呢一種渴望無咗，就會轉身……（而家渴望仲有幾大？）而家……（忽然精靈）都仲有好～大～架～（再認真說）而家當然係熄滅咗少少喇，因為又變返好似原點咁。啫係我地嘅運動員生涯就係四年一次、四年一次咁嘅循環，所以而家會沉寂返先。我覺得，我地都係一個人嚟㗎嘛，啫係需要休息吓，就抖吓先喇，大家都需要休息㗎嘛，你地成日都報奧運都悶啦，哈哈哈！」

丹尼爾vs陳恩能巴西報告完畢

My commentary
李慧詩是單車隊一員，其他隊員還有梁峻榮、張敬樂、陳振興、刁小娟和孟昭娟；隊員是全隊教練、科研、物理治療人員等14人的一員；單車隊是香港奧運隊一員，其他隊伍包括田徑、羽毛球、滑浪風帆、乒乓球、劍擊、游泳、高爾夫球和賽艇；香港奧運隊是香港700萬人的一員。#NotMeButWe #Team字無i #盡做 #GoHongKongGo #DriveHK #DCinRio #Rio2016 #Olympics #DanOnOlympics #DanOnTheMove