【冰島乜乜乜】
如果知道真正原因，換到嘅只有感概
响香港好多人眼中，每屆世界杯都總係出現所謂嘅神奇球隊。最鐘意係研究點解人地國家得，香港又做唔到之類嘅嘢。呢個世界邊有咁多奇蹟吖？答案可能係視野、遠見同價值觀，就係咁簡單。冰島係用十幾廿年挑戰天然惡劣天氣，刻意發展足球。由金融海嘯破產得最快同慘，到反彈得最快嘅國家之一。好多嘢當知道真正嘅原因之後，作為香港人只會有感概兩個字。
冰島曾經只係靠捕魚為生嘅小國，近幾十年轉型成為金融同旅遊國家。由九十年代到08金融海嘯，股票地產同貨幣被熱錢炒高升咗十倍。大家係咪覺得好熟口面呢？不過一個海嘯，個泡爆到國家破產。股票地產跌九成，人工貨幣到今日得番一半。加埋全歐洲最差嘅青少年醉酒同毒品問題（係40%嘅十幾歲喎），我諗好多地方肯定變成永不番生嘅失敗地區啦。
响無祖國可以背靠，又堅持唔玩印銀紙自殺嘅情況下，可以做嘅就係全國節衣縮食、國際視野同剩番嘅「家當」。因為有錢嗰時極力發展天然發電（水力同地熱）加上錢跌到盡，變咗世界上最平電力嘅國家之一。近期世界上年炒得最勁嘅就係電子貨幣，但係每蚊都係要用大量電力用電腦支持「掘礦」。結果唔洗我再講落去啦？另外因為貨幣咁賤，咪推旅遊囉。不過人口咁少，緊係唔會短視到全民做晒導遊阿珍同電腦管理員吧。冰島窮到爆都保持係世界頭幾位投放最多科研教育，同最有文學修養嘅國家！
青少年問題上，冰島嘅家長一齊輪住每晚出街，用軟性「宵禁」要啲細路夜晚番屋企。同時家長亦做聽就好笑，但做就好難嘅簽擔保以身作則。另外，政府做嘅就係香港人覺得係「神蹟」嘅推動足球，消耗年青人嘅多餘體力。要明白冰島嘅天氣係幾咁唔適合足球（既凍又濕，重要極度日短夜長）。嗰種家長同學校配合，教練同全天候暖地真草球場，唔係靠口號㗎！
講到咁，唔該唔好再用什麼「人地係一個國家，我地點點點」黎為所有國際事情上作總結，然後閉上雙眼蓋過耳仔。政府不濟事當然係慘，但每個人都總可以改變到啲嘢嘅。例如價值觀同視野，呢啲我估唔關政府事掛？睇怕香港暫時無人禁止大家，去睇外國媒體或者閱讀（唔係旅遊書同食買玩）。
眼界、遠見同視野，係自己揀嘅，所以唯有得番感概...
#深水埗咁嘅人口喎
#業餘都踼得咁好嘅
#Eason比過獎個龍門㗎
#下場買咩好呀
