蘋果搵咗譚玉瑛姐姐，問佢幫毛記拍片唔驚大台找佢麻煩咩。我想話，記者應該唔係有心，但有時係會不自覺地散播緊啲白色恐怖。
就好似譚玉瑛姐姐肯幫毛記拍片，本來係普通到不能嘅一件事，但畀記者問一問，可能都會冇啦啦覺得自己有問題，下次或者就唔應承㗎喇。或者係其他人見到，又以為係好嚴重嘅一件事，下次又唔應承㗎喇。
你話我哋玩緊大台，都係一廂情願嘅諗法，真正有留意毛記嘅朋友會知道，我哋九成九嘅節目主題同內容，其實都同大台毫無關係，大台有膠，我係膠都費事畀，因為我都冇睇。頂多，毛記只係用緊一啲電視集體回憶嚟做花紙，再將觀眾引領去唔同嘅Topic之上。退多一萬步，最多都係我哋去「玩」緊個包裝，唔需要講到人哋幫我哋拍條片，就係endorse晒我哋做嘅所有嘢咁。
好似上次有一份我懷疑冇乜人睇嘅左報，裡面有一個寫手批評咗毛記幾句，記者又係好心做壞事，走去拎住嗰幾句問啲有份參加分獎典禮嘅嘉賓點睇。其實冇乜點睇，因為嗰份左報冇乜好睇，但記者咁煞有介事逐個問，搞到班嘉賓好似去個event都做錯事咁，間接又令到更多人驚呢樣驚嗰樣。
乜都驚一餐嘅人，固然係唔啱；但不自覺地間接散播白色恐怖嘅，做法亦值得商榷，要諗諗係咪應該繼續咁樣做落去。
最後，真係不得不讚譚玉瑛姐姐，佢就通透喇，佢話：「佢(毛記)玩TVB㗎咩？我意識佢係年青人心中有啲不滿想表達，我支持一啲年青人咁解。我電台(DBC數碼電台)都有訪問100毛老闆(林日曦)，年青人想表達心裡面一啲感覺，我又唔覺得係一件好大件事，唔使睇得咁凝重。」
