【龔成問答信箱】（Q17101-Q17120）
Q17101：
老師，請問你最初踏入社會果時，你話正職之外做幾多份兼職，同埋維持咗幾耐？咩心態令你咁博呢？
其實，我而家要不斷做野還錢，好辛苦，唔知點堅持。
龔成老師：
初踏入社會的2年是我最博的，每星期都7日工作，或6天半，正職加兼職，自己的時間極少，就算有時間都會不斷睇書增值自己。
因為我好明白，窮者愈窮，富者愈富。這是由於無錢者，根本無得錢搵錢，有錢者，不斷錢搵錢，佔社會財富只會更多。
我初工作時，第一目標就是5年累積到$100萬，這不是大數目，但只要有這個資金基礎，之後的財富就會好易滾大，於是，我初工作要自己點都要積到$100萬，否則乜都唔洗講。
由於我當時著眼於「將來」，要完成更大的目標，要改變下半生，就一定要先累積到第一個$100萬，因此，我當時心中除左呢個目標外，其他乜都唔想。
當時是辛苦的，但當每日見到自己，不斷向目標行緊，愈來愈接近時，又會覺得好滿足。有動力！
我呢一刻好多謝當天的自己，你都要加油呀，這刻的付出是為了將來更大的收獲！
------------------------------------------------
Q17102：
龔sir請問你點睇1728正通？小妹在較早前1.68入左鐵塔788現在想再入你覺得如何？
感謝萬分
龔成老師：
正通汽車（1728）質素一向只是中等，近年更有質素向下情況，加上單一股票不能太集中，這類質素不高的股票就更加是。
先講佢業務，佢係汽車經銷商，亦提供汽車相關物流業務、潤滑油貿易業務，以及金融服務。佢銷售之汽車品牌包括寶馬、ＭＩＮＩ及奧迪等豪華品牌，此外，還包括日產、現代、本田及雪佛蘭等中檔市場汽車品牌。
這類業務不是無價值，但企業的獨特性不強，當經濟轉弱時，好多時就會成為其中一個最受影響的類別。
見佢盈利增長有減慢情況。股本回報率處較低水平，同埋佢較受經濟週期影響，對貿易相關都會有影響，所以股價會較為波動。
近期中國車市放緩、外來競爭、行業競爭加劇等不利的因素，都對整個汽車行業造成影響，相信中短期仍會對佢不利。
這股不是劣質，但都不是高質，但只算中等。當然，股息率是吸引點，但從整體角度，唔建議大注。
中國鐵塔（0788）有質素的，之前有少少炒概念，所以之前估值有少少貴。
這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。
佢現時的收入正不斷增長，盈利都保持向上，但股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。
考慮到佢的質素、發展能力，這股算現時算是合理價。
你持有貨如不過多，無問題的，可長線持有。
------------------------------------------------
Q17103：
同埋阿sir, 我係進階班學生，已經一路溫緊您嘅notes，一路睇不同嘅年報，但依然未完全掌握到睇年報嘅重點
龔成老師：
年報你可以睇一D重點位，再睇其他位，進階班第三堂文字版的筆記，有個損益表及資產負債表的簡單因，要你填重點及相關比率，這都是一些你要知的重點位，你試下從這裡入手。
另外，你要想想「那些資產能反映企業的情況？」「對將來的企業發展影響最大？」
------------------------------------------------
Q17104：
老師，你好，我今年24歲，應屆畢業生，現有現金儲蓄$10萬。已找到全職，月入約$2.5萬，
我計過月支出約$1萬，剩$1.5萬/月。我打算將約一半（$8千）放到股市，當中再拆開一半於港股月供，一半放在美股市場。
因此，港股每月供$4千，而小弟對以下5隻有期望，請問能提供意見嗎？例如邊隻前景/潛力最差等。
謝謝！
0027 銀娛
1810 小米
9988 阿里巴巴
9999 網易
9618 京東
龔成老師：
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識。因此，唔建議你全部都集中在潛力股，你最好建立一個平衡的組合。
上述的5股，都是有質素，同時有潛力的，你都可以考慮投資，長線持有。但就唔好只集中在潛力股。
以潛力度及穩健度來說，你可以考慮阿里（9988），之後就是銀娛（0027）、小米（1810）。
------------------------------------------------
Q17105：
龔sir 關於1177送紅股既問題 個諗法/方向係咪甘: 由於而家1177係2股送1股 所以預計股份數目多左3份1 對現有股東黎講 其實無咩影響
因為只不過係個餅大左 你收番多左個份 但如果係股價既話 大概應該會跌3份1 假設14蚊就姐係跌4.67左右 到時股價會調整到 9.33左右
另一方面 由於上述情況 10蚊樓下抵買既諗法都應該要做番啲調整 甘應該大概6.6左右或樓下先至叫比既抵買?
同埋都想問下龔sir 呢招其實係咪同煤氣既做法類似 假設1177真係愈黎愈賺錢 就可以因為呢個動作隱藏自己既升幅
謝謝
龔成老師：
對，你的理解正確，由於送股唔會增加企業價值，只是數字遊戲，所以2送1，股價就會調整，跌3份1。
同時，企業「每股」的合理值，都會改變，由原本的$10以下合理，去到大約$6.6以下先合理。
佢的目的，是唔想股價數字大高，不過這都是數字遊戲，無意思的。
------------------------------------------------
Q17106：
老師，我已購買了《5年買樓》，有幾個問題向你提問，也煩請你幫助解決，謝謝你！
1.
我留意到有人問你的問題，通常都以5年為一個單位，例如5年內可以累積一百萬資產，就以這本書也是5年內買樓，其實這個「5年」，除了是一個計劃外，是不是也有包含其他的特別意義呢？
2.
我想你幫忙分析我現今的投資組合，其實以前你都已經幫我分析過了，是這樣子的
月供股票：
煤氣，恒地，銀娛，港鐵，領展，以上都是每隻月供2千。由於我理解到3和12是同一系所以我有3個方案如下：
A : 3和12要不要其中一隻減少月供或兩隻都各減1千（因為月供的銀行要1千起跳，所以不能減5佰），我想將減出來的2千來月供盈富。
B : 將減出來的2千分散到其他的月供中加大金額是否可行呢？因為3和12是同一系，另外66和823亦因爲同地產業務有關，我明白短期不利，但我相信長遠還是看好的情況下，可否加進去每隻月供3千呢？
3.
另外我持有3手小米（平均價11.54）和6手阿里巴巴（平均價188.6），我長遠是看好的，雖然短期會有震盪，所以想你幫忙分析是否持股過多，需要減持或找機會增持嗎？
另外分享一件事情給你聽，就是我去購買你書本的時候，書要訂購，然後聽到店員說：「現在龔成連教人買樓都做埋，真係唔夠佢玩喎，佢玩晒啦！」，我聽到都替你高興，可以幫助別人真是一種能力，這種能力也不一定每個人都可以擁有，我也會以你作為榜樣，將自己學到的知識教導他人，謝謝你啊！
龔成老師：
1）通常5年是一個定目標時，較為中長期的時間，比較實在在可控制。
如果目標大長，例如20年，一般人會感到好遠，較虛無，因此一般人未必有動力。如果大短，如1年，可以做到的事情又不算多，因此，我相信5年是一個合適的年期，我自己及一般人，以這時間作為追求，較實在及有意義。
2）你可以減少煤氣（0003）的金額，恆基（0012）則不用改響，同時將資金投資其他股。煤氣都可以在你組合中成為其中一部分，但就未必適合過多。
3）這兩股都是有質素的股票，你可以長線持有，一般來說，每隻單一股票，佔股票組合的比例，唔好多過15%，如果是這類潛力股，就會再減少，例如10%以下。
哈哈，講樓的書是一個新掌試，職員講得好好笑XD，大家加油啦！
------------------------------------------------
Q17107：
龔sir你好，請問你點睇821？手上有200000股，均價0.73
見佢而家股價跌到得返0.248
唔知狠心放左佢定繼續持有好...
謝謝意見
龔成老師︰
滙盈控股（0821）主要從事提供經紀及融資服務；企業融資及其他顧問服務；保險經紀服務；資產管理服務及自營買賣。
此股市值和生意額都唔高，再加上過去幾年，年年虧損。
如果有上我堂的同學，一定會知道此股無投資價值。你最好全數沽出，轉至其他優質股上。
------------------------------------------------
Q17108：
老師，想問下3140，2834呢類美股etf，應該點睇佢點先係合理價？
龔成老師：
首先，你要找翻該ETF所追蹤的指數，例領航標普五百（3140），就是追蹤標普500指數之表現。因此，你要分析的，就是標普500的平貴概念。
當我地進行大市估值時，準確度會比個股為低，只能有方向性的結論，難以得出絕對的估值，因為每間企業都是不同類別，估值方法不同，因此為整個大市估值時，好多時都能「參考」。
利用整體的市盈率及市賬率，是其中一個方法，先了解過去多年的數據，然後推算出較合理的範圍，同時得到較平的水平。我以恆指去解釋，過往一般在10倍市盈率以下，就算是平，這就是一個初步指標。至於標普500，你可以自行找相關數據，從而得出結論。
------------------------------------------------
Q17109：
老師，我現時27歲 基本上冇乜積蓄 只係有2，3萬係手 我知數目都係好少....因為黎緊可能有額外支出 希望屋企支出需要 如果唔增值我好快又會用左個筆錢 積蓄又變零...明白賺錢唔可以心急，但有方法可以幫到我短時間增值嗎
另外我有2000 月供盈富 1000恆基 明白月供股票要5年以上 請問我點樣expect/計算個回報率？我希望可以好好規劃呢兩年要點做....
感激不盡！
想補充少少
除左個2，3萬 我每月只有$3000可月供
另外我有買一份基金儲蓄保險 如果望佢平手 3年半後供完會有$120k
龔成老師：
以正常的理財，你應該持有$2萬現金，作備用。不過，如果你好擔心會用左，同時你明白無現金有風險後，你都可以進行投資。
不過，唔好短線投資，因為風險一定大過回報。
只建議你投資一些較有值博率的股票，例如金沙（1928）、太古地產（1972）。
至於月供，可以保持進行，你預長期有8%-10%的連股息回報率。
我反而會建議你增加收入，你要有收入先可以儲到更多本金，有本金先可以投資，將財富滾大。所以，要想方法增加收入，兼職、小生意，都是可取的。
------------------------------------------------
Q17110：
老師你好，我最緊買左你本有關買樓既書，有幾個問題想請教下你：
我同先生每月總收入約$50000，我地都有月供股票約8個月如下
我$2000（盈富基金）
另外有400股金沙（@29.85）
1000股福壽園（@6.69）
蘋果股票約總值$120000（仍然滾存）
另加現金$100000
先生月供$1000領展
$1000港鐵
我地嚟緊想入市買樓，會用股票既錢嚟買，目標係細價樓約$380-450，主要目的係自住，之後可以既話先換大小小，因為睇完你既書
當中提及到資產可以由股票轉做物業，但係假設我地按揭30年，大部分人工都已經去左供樓，請問我地應該點樣做先可以再製造現金流，等老左可以安享晚年呢？
龔成老師：
首先，如果你會在1年內買樓，而你現金並不足夠首期，就要開始慢慢賣股票套現，因為無人知你買樓的一刻，股市情況如何，所以你這刻已經要準備，分注賣出就得。
至於買樓之後，由於是自住，因此無正現金流，所以在理論上，唔建議買太大的樓，以減少你地現金流的流出。
買樓後，你要加大儲蓄，要有本金，之後投資，先可以滾大財富。如果住後利息長期處低水平，只要你收入慢慢增加，你儲到的本金就會增加，成為累積財富的本錢。
所以，你買樓後要從最基本的儲蓄投資開始，如果想增加回報，可以買多少少潛力股，但就要增加知識先。
------------------------------------------------
Q17111：
龔sir,想問下點樣計算一隻股票既合理入手價位呢？是否把10年的數據找一個平均價？
如果係高過平均就是貴呢？
以2800為例24點就是合理呢？
龔成老師：
不是，平均價位只反映買賣成交價的平均數，而這個成交價，有時會反映企業價值，有時就不會。單單計股價的平均數，並不是反映企業的合理價的。
真正的方法，就是計算企業價值，有價值就知平貴，幾時合理。
但計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。
簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。
如果要深入計算，基本上要好仔細的研究企業，要分析好多財務數據用比率，先至有較完整的答案。
------------------------------------------------
Q17112：
你好龔老師，好多謝你指點，一路跟住你Facebook嘅post同記住你講嘅野
我睇完百萬富翁，我由上年二月係零儲蓄，到我喺一個月內儲左一萬蚊澳幣。
到而家年半，已經儲左五萬蚊澳幣。你嘅正面啟蒙真係改變左我人生。證明咗好多嘢都係有希望只要自己相信自己做到。
依家有三萬蚊澳幣可以投資，我應該點樣分配？之前有聽你講買咗盈富一路keep住，同埋買咗少量澳洲銀行股票(當月供股票)
*我喺澳州生活
多謝你老師
龔成老師：
可以令你在財務上有真實的提升，實在太好了，我地要運用「先投資，後享受」的方法進行，你這刻應該保持儲蓄，努力將本金增加。
同時，你都可以將一半現金，作投資，如果澳洲銀行股票是有質素的，你就可以長線持有，最簡單就是分析佢生意與盈利，是否穩定，並且有增長等。
另外，你可以買一些當地較有質素，屬行業龍頭的股票，當然你要了解該企業。同時，你可以投資一些基數基金都可以。可以用月供或自行分注投資。
------------------------------------------------
Q17113：
Hello 成Sir又係我啦，再有事想請教你。
三個月前開始睇你既專頁，之後睇你既書到最近開始上你堂。再次多謝你啟發我對投資理財既觀念同興趣。
今次主要有三件事想請教一下
1. 如何優化現有的股票組合
我現有煤氣、港鐵、領展、太古地產、友邦、金沙同盈富基金。當中月供和一手手買都有。
我都知道自己30歲，以上組合太過穩健，唔夠進取。睇完你本書後，對中生製藥，中國鐵塔，比亞迪有所留意。請問我應該加入那一企業較佳？
2. 月供股票問題
4個月前開始月供上述股票，發現一個問題。就係往往捕捉不到股市下跌的入貨良機。請問是否當我的投資理財知識增加後，例如你課堂之後會搞的如何計算企業合理價格。我就可以減少月供股票？
3. 資產現金比例
小弟現時有一層市值$1,100萬的物業還在供款，另外上述股票價值約有$40萬，以及有$150萬現金。現時月入$20多萬，每月開支大概$10萬。
知道持有太多現金是一件不太理想的事，那想請教龔Sir我應如何分配現有的現金，例如投資那些資產或股票較佳？
龔成老師：
1）你上述都是有質素的股票，但的確是比較平穩，水桶2的比例太多，你應該增加翻水桶1的比例。如果你投資知識不算多，就增加少少先，慢慢加上去。
以現價來說，你可以考慮中國鐵塔（0788）、比亞迪（1211）、小米（1810）。
2）對。月供股票有利有弊的。
好處是將買入價平均，這對於投資實力較一般的人來說，是好方法，因為可以減少買入價風險，但缺點就是無法捉到較平的位。
因此，你可以上完課程後，因應翻自己的投資實力，去決定是否繼續用月供，或比例多少。
3）你可以將一半以上現金，分注投資優質股，而具體的入市策略，選股等，相信你上完課程後，會有更具體的掌握。
------------------------------------------------
Q17114：
老師，想問6862現貨一手買入價$35.. ，現價想加多一手可以嗎？還是再等呀。謝謝你
龔成老師：
海底撈（6862）有質素，有增長力，但就貴貴地。
這股的確好難大跌，之前疫情理論上會對這類股有影響，但都跌得唔多，但現價又唔平，的確有點兩難。
你已有一手在手，較穩健的策略，等佢去翻$30左右水平先加注會比較好，但真的唔知見唔見到。
------------------------------------------------
Q17115：
你好，小弟今年24歲，月入24xxx,有月供股票，0006每月6000，之前3月我將投資咗嘅80000提取做現金，而家持有1000股，但近排個市太波動
令到我帳面係蝕緊錢，大約蝕4500左右，你覺得0006係咪可以當係一隻好嘅收息股長期投資？ 0027，1211，1177同2800係咪比較推薦作為月供？
另外小弟對於美股嘅創新科技股好有興趣，你點睇Tesla, google, Amazon ,intuitive surgical 及 beyond meat? 我應該用月供方法定如何？
最後想問下大市前景，你覺得遲啲會唔會大跌市？因為總係覺得肺炎嘅影響仲未浮現上嚟，如果係應如何應對？不勝感激
龔成老師：
電能（0006）是有質素的股票，收息不差，但增長力不強。你唔好太著重中短期股價。
你24歲，應該著重增長方面，因此，電能這類股，不應佔你組合比例太多。
你可以以盈富（2800）作核心，然後加上銀娛（0027）、比亞迪（1211）、中生製（1177）。另外，你上述所講的科技股，都是可以考慮的，但就要小心控制注碼，小注月供都可以。
疫情對經濟的影響，的確未完全浮現上嚟，所以經濟仍有不確定性，不過，這不代表田大市一定向下，只可以話增加了不確定性。
而我地進行投資，就是建立一個組合，長期配置，所以，你仍可以投資優質股，只要同時留有一定的現金就得。
------------------------------------------------
Q17116：
謝謝，希望請教一下你個人投資時會基於什麼因素才決定入市？因為知道你真正入市其實很少
老師，請問你會用ev/profit 這個比例嗎？如果分析兩間業務上市的公司，但其中一間負責10分高，用ev/ profit 會否比較準確？
龔成老師：
首先，我會大量分析企業，因為我現時是一名全職投資者，其中一個工作，就是不斷分析企業。
當尋找到優質企業時，下一步就會進行估值，利用平貴，去決定是否入市。如果一間優質企業，現價唔平，就會耐心等待。
你可以理解，就是我手上有一張名單，當某股出現下跌至較平價位時，就會考慮投資。
有時，當企業面對中短期問題，股價大跌，而長遠業務根本無變，這都是入市時機。
另外，當大市恐慌時，都是一個入市時機。
有些資產較多及負債較多的企業時，都會用「ev/ebitda」去進行估值，其實估值都絕對的方法，好多時會配合使用。
------------------------------------------------
Q17117：
老師你好，最近在考慮除了資產類別需要分散風險，幣值亦該分散投資。
請問在香港能做月供美股的嗎？
如果有，老師推薦哪幾隻？另外，如果有大約13萬美金，可以作什麼投資？謝謝
龔成老師：
你可以投資美股，以作為分散風險。但最重要的，是你了解該股票。
如果無個別心水的美股，投資追蹤美股的ETF，都是一個好簡單的方法。
例如在港交所上市的一些ETF，你只要有港股戶口，就可以買到，如領航標普五百（3140），就是追蹤標普500指數之表現，你投資這ETF，等如投資了美股。
每手其實$2000左右，你每月投資一手，已經是一個方法。
當然，你又可直接開美股戶口，同樣是可以的。
------------------------------------------------
Q17118：
我係初學投資，我想搵d穩陣既股票去玩
有咩好介紹？
龔成老師：
第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。
另外，你可以考慮盈富（2800）。盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。
你亦可以考慮一些較穩健的股，銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。
------------------------------------------------
Q17119：
龔老師，你好，本人追蹤你已有三年多，亦買過你兩本書，十分認同你的投資理念同方法。我近來有以下疑惑，想你幫忙替我的組合把把脈。不勝感激。
本人現時組合：
1）長和 12.8%
2）中銀香港 12.4%
3）電能 11.5%
4）恒生 11%
5）領展 9.3%
6）置富 7.6%
7）中電 6.6%
8）中移動 5.5%
9）滙豐 4.8%
10）中國建築 4.2%
11）北腔水務 4.1%
12）長實 3.7%
13）小米 3.7%
14）長江基建 2.1%
疑惑1）
本人於2015年以$111持有長和至今，並於2020分別再$66.85及$50.05入市。想問長和都係一隻具有一定質素及防守力的企業，年年賺錢，派息每年增加/最少持平，强大現金儲備，咁點解股價呢五年不斷插水？
完全享受不到早前大市强勁的升浪。即使歐洲業務也看不出有咁大打擊吧？我投資長和的心態上都係長線投資，但五年來不斷打擊我的信心…
疑惑2）
而家大部分人，包括股評人，都捨棄港企，大都追捧國企，而我對港企仲係有信心，如恒生/領展，老師你點睇？
疑惑3）
老師點睇北控水務？近5年業績不差，盈利不斷上升，派息百分比不斷以雙位數增加？為何股價會勒住勒住？
龔成老師：
首先，你持有的股票敟目較多，有點散，其實可以集中翻少少，提升組合的優質度。
1）其實有幾個原因，第一，當年過$100以上，是貴的水平，任何投資，當在貴的水平入，國報都不會高。第二，近期市況一般，但這只是中短期問題，長遠會上翻，但就未必上到過百。
另外，這股因為歐洲業務，影響了佢的增長力，因為歐洲經濟較弱，企業的錢能力一般，都令佢比大市為，弱。
所以，如果這股在你組合中，已經佔了一定的比例，就唔好再加注，將資金投資其他股仲好。
2）一些中國股票，或新經濟股，當然有投資價值，但這不代表香港的企業已無價值。
當我地進行投資時，這是一個配置的問題，你要有不同類別的企業，平衡發展，如果太集中在新經濟股，其實會有風險，但如果只投資香港企業，增長力又會不足，因此，要取平衡。
領展（0823）仍是有質素，有平穩增長力。
恆生（0011）有質素，但增長力不強，是收息股。
3）北控水務（0371）負債有所增加，同時增長力比市場預期少，都影響了股價。整體是有質素的，但由於負債較多，這股唔建議投資太多。
------------------------------------------------
Q17120：
老師你好多，有個問題想請教一下，本人50years 有個單位想放盤，太約700萬
賣出之後會買入個細單(400~450萬)，餘的錢會有70萬去搞小生意(若2年內沒有起息，便找回工）。
跟著180萬~200萬應該買股票或等樓價回落時再買另一個細單位收租。
如果買股票，可買2800同銀行股嗎？
龔成老師：
首先，利用$70萬去搞生意，都是一個財富配置的方法，但最好你過往有搞生意的經驗，慢慢由細開始，見到成功後先投入資金，這就會較為穩健。
因為我見到不少個案，就是佢地過往打工多年，做到高層，然後近年因種種原因離開了公司，因為找不到較好的出路，於是嘗試搞生意，但佢的目的是「為搞而搞」，因為不想打工由低做起，所以搞生意要自己做老板，然後在中環租辦公室，只求表面，不求實際，最後失敗收場。
因此，搞生意都要有總心態，就是比打工更辛苦。當然，這只是題外話，純分享。
至於你的資金分配，當買了細單位後，不用太急買另一個單位，這是避免你在同一經濟週期下，太過集中投資。
所以，你可先買股票，若然出現樓市暴跌，才考慮。
你可以考慮盈富（2800），銀行股則少少好了，不用過多，另外，你50歲，可以考慮一些平穩增長股，例如銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。
另外，建議你多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
----------------------------------------------
若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
3000蚊樓下 在 精裝現樓即買即住比開盤直降3000蚊撈底時機？｜99-119 三房 ... 的八卦
【家有囍事】專營粵港澳大灣區各城市之房地產業務，為港澳同胞提供大灣區一站式最優質、簡便及安全的買樓服務。 ... <看更多>