『各位考生，你哋今日應考嘅係2019 DSE中國語文口試⋯⋯』考官宣讀守則。
自從財政預算案宣布2019文憑試免費報名，我同一班朋友都好期待口試呢日來臨。
記得當日一聽到呢個消息，的士佬阿文即刻同我哋講：「一齊報名玩嘢啦，一開波即刻爆粗X佢老X，睇下班友仔點死！哈哈！」
另一位死黨阿強就笑住話：「你哋報中文，咁我報英文啦！一開波講，Sorry，Let’s start our discussion，好唔好呀咁多位同學？之後全程講中文！」
我冇佢哋咁黑心，我報名嘅原因，只係想重拾那些年嘅初戀感覺。
當年，我同全世界最清純嘅初戀女友Amy就係喺口試考場認識，一踏入考場我已經被佢深深吸引，之後幸運地，Amy竟然同我同組。
嗰日口試，我Fail咗，因為我全程望住佢，戀愛嘅感覺令我一句嘢都冇講過。
試後，我跟住佢嘅身影，終於喺佢臨上巴士一刻，鼓起勇氣同佢講：「妳好靚呀，我哋可唔可以做個朋友？」
佢笑住咁點頭：「你好傻呀！」
輸咗場口試，但贏咗個女朋友，值得呀！
但後尾，因為我中文唔合格，升唔到大學，而Amy就順利入U，好快就畀Ocamp嘅組爸食咗⋯⋯記得Amy佢最後一句同我講：「你唔好咁傻啦，我哋係兩個世界嘅人嚟，放開我啦！」
係⋯⋯我真係好傻⋯⋯我傷得好重，但我會永遠懷念呢份青春。
2019年，我終於⋯⋯終於可以重返呢個試場，重溫昔日嘅曖昧⋯⋯只可惜當我一入到口試場地，心入面閃過一句同「X！亞視嚟嘅！」異曲同工嘅說話：「X！全部大媽嚟嘅！」
乜事呀⋯⋯我嘅初戀呀！？
最後同我同組嘅有兩個大媽、一個阿叔、仲有一個嘢都講唔到嘅阿婆⋯⋯
考官講完題目，叫我哋開始討論，但完全冇人想發言⋯⋯阿叔喺度發呆，阿婆喺度妹佢副假牙，其中一個大媽就用譚仔話：「蛋樣GA梨Dee，布咗名又唔出聲，玩嘢牙？」
考官都冇眼睇⋯⋯
我嘅初戀大計被破壞，愈諗愈嬲，忍唔住企喺身拍枱：「你哋究竟點解要報名呀！」
阿叔竟然認真答我：「唔使錢嘛，咪執輸呀！」
倒數最後一秒，我望住條口試題目《有人說「沉默是金」，有人說「不平則鳴」，試談談你的看法》⋯⋯我諗我哋幾個用例子答咗畀個考官聽⋯⋯
試後，失望離開之際，竟然畀我喺校門見到一個真正嘅女學生，四周頓時充滿清純嘅少女氣息。
正當我想上前同女學生打開話題，佢竟然主動行埋嚟，眼眶紅紅嘅佢破口大罵：「阿叔你幾十歲人仲嚟玩嘢？畀你哋累死喇⋯⋯」
我唔知點應佢⋯⋯但當我見到的士佬阿文出現喺我面前，仲笑住同個女學生講：「哈哈妹妹仔，下年再努力啦！」
我諗我知道佢點解嬲到喊。
我望住女學生傷心咁上巴士，車門關上一刻，我明白到，無論我點樣追尋，青春都只係有一次。
永遠都唔會再番嚟我身邊。
（完）
2019 dse英文 在 2019年文憑試英文寫作試題分析(2019 DSE English Writing ... 的八卦
0:00 Introduction1:23 Question 1 (Part A)15:49 Question 2 (Social Issues)33:42 Question 3 (Debating)49:10 Question 4 (Sports ... ... <看更多>