【80’s童學會】撒亞人生於這個地方稱呼叫悟空
見到呢張超級撒雅人圖，80後應該有8成唔識Big Band feel嘅紅毛同藍毛悟空；90後就應該有9成唔識超西1,2版除咗有電，仲有咩分別。
當年悟空由莊子喺森林帶出嚟，打打打再上宇宙，學咗唔少技能，好在返嚟地球唔駛跑數。雖然做無業遊民，但都要拯救地球，死咗有光環都要為元氣彈跑數集資，都chur爆架。
龍珠由1984-1995年連載，用西遊記加少少超人背景做起步，之後就勁天馬行空。天下武術大會、環遊世界收集七龍珠，拖爆劇情勁出新角色嘅模式，影響咗之後極多作品嘅故事線。
而且都應該無咩角色好似悟空咁，由細路仔坐筋斗雲打桃白白、笛子魔童、比達，再打菲利，髮型身高都有大變化。你睇叮噹幾廿年都係果個貓樣，火影大個都係改少少。原本金毛咪幾好，係有點崇洋加白人優越論，但依家又紅又藍加萌味，真係睇唔慣囉。
諗番起小學雞果陣，無線逢星期六晚先播一次，得果半個鐘到，菲利篇由佢坐浮波到第四形態，打足半年，吊癮度極高。點知機械版被杜拉格斯一刀秒殺.....依家諗番呢幾幕都仲幻聽到張崇基兄弟首「撒亞人生於這個地方稱呼叫悟空」。
暉哥就最欣賞斯路遊戲篇，完整度高，設定最重原創味，斯路三段蛻變形態、杜拉格斯由未來返嚟、人造人，仲有斯路個綠色皇冠頭，多年後獵人個蟻王都參考致敬。仲有悟飯同老豆靈體合作，單手龜波射爆斯路絕對經典。不過布歐篇佢做咗撒雅超人柒柒下，又唔夠人打，重心回歸悟空同比達。
記得細個睇悟空喺拿美星爆超西好型棍，之後通貨膨漲，個個出場識變超西係最低消費。比達超西咗都俾18號打殘，就好似以前有56K好新奇，依家無100M都唔好有上網，同人講電腦壞咗，順便戒埋睇thisav算罷啦。
今集撒雅人玩到變神，可憐最強人類無限，細個都過到兩招，之後幾何級開方式被拋離，個個玩到個頭又金又長，自己連頭髮都無條。就好似暉哥細個好多富二代朋友，細個一齊學校打波， 品評miss對波，有講有笑好近，之後個個去外國、揸GTR、食索女、做埋老細，完全兩個世界。唉，唔葡萄啦，暉哥都係繼續用對污糟手學宇宙技能，為買兩餐痴心big mac奔波罷。
1984 100m 在 Carl Lewis - Men's 100m - 1984 Olympics - YouTube 的八卦
... <看更多>