【同女友玩「誠實遊戲」 點知中晒伏⋯】下
話說我女朋友叫我寫低嘅十樣隱瞞佢嘅嘢，然後再交換睇。
(未上集睇咗先)：https://goo.gl/9zfMXG
我當然跟足指示，寫低咗以下十樣：
1. 我試過同個女仔單獨食飯
2. 我試過同前度WhatsApp
3. 我話瞓覺，其實打緊機⋯⋯
4. 我話同FD食飯冇女仔，其實有好多⋯⋯
5. 我話新買個耳機 $90，但其實係$1200
6. 我電話收埋好多J圖
7. 成日有女性朋友搵我傾心事
8. 試過有女仔同我表白過
9. 前日話同FD食飯，其實就係個女仔
10. 臨走佢𡃶咗我一啖
我自己都知係花式自殺，但現場氣氛令我要講真話。
輪到睇佢嗰張，我深呼吸一口氣，做好心理準備，帽事嘅！！！
1. 暪住你偷偷織頸巾
2. 暪住你偷偷整蛋糕
3. 暪住你偷偷上烹飪班
4. 偷偷買咗Switch畀你
5. 已經訂咗復活節嘅台灣機票
6. 發現你課金但扮唔知
7. 知你未瞓打緊機但由你
8. 跌爛咗個Mon，但自己畀咗錢人換驚你鬧
9. 已經準備好聖誕禮物
10. 有時唔開心但扮冇嘢怕你擔心
嘩⋯⋯幾乎全部都係好嘢嚟，咁樣陰我！？
我見到佢睇我嗰張「誠實紙」睇到黑面，又嬲到手振⋯⋯我同佢重申一次：「妳話過唔嬲㗎，我先寫出嚟⋯⋯」
之後佢慢慢咁行去燈制，熄咗燈，我有少少驚，希望間房冇任何較剪、菜刀、𠝹刀⋯⋯我記得佢話過如果我偷偷識女仔，一定會一刀切咗我⋯⋯
「喂？」我問：「而家要做啲咩？」
「收聲！」女朋友好大聲咁喝我：「一樣一樣同我解釋清楚。」
佢：「同邊個女仔單獨食飯？」
我：｢以前大學啲朋友⋯⋯唔靚㗎！咁啱撞到先一齊食！」
佢：「咁同前度WhatsApp講啲乜？」
我：「都係問候下大家，放心⋯⋯我對佢冇晒感覺。」
佢：「點解手機咁多J圖？」
我：「唔關我事，係啲Group無啦啦Send嚟，我叫咗唔好！」
佢：「邊個女仔同你表白？」
我：「公司啲同事⋯⋯但我拒絕咗。」
佢：「𡃶你都叫拒絕咗？」
我：「佢突然𡃶埋嚟，我避唔到呀⋯⋯我真係對佢無意思。」
由於環境太黑，我睇唔到女朋友嘅反應同表情，只係知佢一直沉默。
根據遊戲規則，下一步係我哋一齊行出房，扔咗張「誠實紙」落垃圾筒，然後當咩事都冇發生，鬆一口氣，大家從此信任大家。
「咁係咪玩完呢個Game⋯⋯？」我試探一下口風。
「Game係玩完，但懲罰⋯⋯」女朋友答。
「懲罰？唔係話唔嬲㗎咩？」我。
「嬲同懲罰係兩回事，我一啲都唔嬲，但照可以懲罰你。」女朋友。
「妳玩晒啦咁！」我。
「你仲勁啦，有人𡃶你喎！」女朋友。
我知道再講落去一家我輸蝕，於是問：「咁妳想罰我咩？」
「拎你電話畀我！」平時女朋友好鍾意Check我手機，但我次次都唔畀。
「唔好啦⋯⋯」但我冇得揀，於是慢慢咁遞畀佢。
「密碼係咩？」佢問。
「0921。」
我以為佢會坐低慢慢睇，點知佢拎完，衝咗出房，直出埋大門。
我即刻跑出去，點知佢用個鎖，鎖咗鐵閘。
「條鎖匙喺屋入面其中一度，自己搵啦！我留咗啲提示畀你。」佢一路講一路同我揮手拜拜：「我會慢慢睇你電話，希望冇其他嘢呃住我啦～」
「⋯⋯」
喺無助嘅困境中，「誠實遊戲」已經完結。
但成件事竟然變咗「密室逃脫」⋯⋯
仲有我手機入面啲秘密⋯⋯
【誠實遊戲（完）】
***睇下仲有冇人想睇之後嘅【俾女朋友搶手機 要我玩密室逃脫】
***1500 likes 200個share 就繼續
***想睇落去，留言：「F5」
讚好莎比亞睇故事
