【做兵係唔會有好結果，就算啤啤對馬季幾好都要死】
今晚《降魔的》終於播大結局，趁依家想講返啤啤同馬季既情，因為見到佢地就好似見到你地咁，做兵係唔會有好結果。
上集講啤啤比人塞入車尾箱死左，就算大家好中意佢，覺得佢一定係終極好女朋友又點？馬季見到佢死同見到龍貓死嗰陣既反應都有差別啦，見到啤啤死只係默默流眼淚，佢心裡面根本從來都冇啤啤。仲有點解人地個個有血汗錢甚至特製頸鏈，啤啤就乜都冇？佢既死係最無辜，為左心愛既人而犧牲，最後連拖手機會都冇。
一開始啤啤比馬季以為係石敢當，兩個人自此成為一對歡喜冤家，成日你寸下我，我寸下你。後來啤啤用高薪請左馬季做私人司機，馬季次次都保護佢，加上日見夜見先知馬季並唔係表面睇咁粗魯，相反佢係充滿正義感既男人。
雖然啤啤一直以黎都對馬季有意，不過大家都知其實馬季只係當佢小妹妹，甚至一個普通既女性朋友，就好似些粉講既咁「車上面你地係司機同乘客，落左車你地咩都唔係呀」。可憐啤啤為左馬季可以放棄好多野，包括最緊張既電視台節目，就算要開始錄影、有工作機會、第二日要拍野，佢統統都可以推。之前佢為馬季付出太多，包括走勻成個石硤尾，只為搵一張馬季同親生父母既合照；見到佢咁唔開心，竟然為佢向芷若表明心意，幫心上人溝女；明明怕鬼又堅持留低保護佢肉身；比馬季當出氣袋都冇怨過一句等等...
但馬季冇關心過啤啤，冇理過佢對自己有幾好，大家一齊出身入死過都好，馬季一心只係為左女神。依家啤啤死左，馬季先知喺身邊不離不棄守護自己既人係佢已經太遲。亦都話比港男聽，有時啲野係你既就係你，唔係你既就點努力都冇用。
就好似中意嗰個女仔拒絕左你咁，你心諗做兵起碼都有接觸機會啦，或者對佢好啲就會令佢慢慢有feel。係，一開始試下做兵，係咁做啲野討好佢的確無妨，如果佢真係因為咁中意你，恭喜你！你成功左。之但係如果已經持續好幾個月都冇乜進展既話，你就要諗係咪比人當左係水魚。例如人地平時眼尾都冇望過你，次次唔係有麻煩或者要幫助先搵你，好明顯你已經比人利用緊。佢唔係想比機會你追佢，佢係想用盡你，繼續死lur做兵不但搞到自己辛苦，仲浪費好多時間。
咁但係做兵點先算明智？
1.唔好當自己係地底泥，你都有底線，幫到就幫，幫唔到叫佢自己解決。否則佢以為你乜都say yes，慢慢習慣利用你既感覺。
2.如果你feel到一啲進展都冇，佢冇比過反應你，放棄啦！唔中意就係唔中意
3.唔好用銀彈戰術，就算比你溝到佢，佢都係中意你啲錢咋
龍貓結局 在 [閒聊] 龍貓的結局與心得- 看板C_Chat - 批踢踢實業坊 的八卦