[懲罰系列] 上水 舊墟 鳳鳴居
自疫情開始，上水既水貨客不斷減少，昔日喼來喼往既上水舊墟，終於回復返昔日既寧靜，而亦令我放心係上水好好享用晚膳。
如果講到北區既黃店，鳳鳴居算得上係呢度既一線，而我試完之後，亦覺得無中到伏，亦慶幸佢唔係走高檔路線既餐廳，價錢相對地大眾化，味道亦不俗，所以尚算個人推薦既餐廳之一。
先講野食，二人同行基本上可以食既野都好有限，咁當然要試下佢地既招牌雞麵，我叫左個醉香雞湯米粉，而女友就叫左個姬松茸雞湯米粉，我地另外加左個春卷。個麵其實都幾好食，特別係米粉比較索到味，雖然唔知佢落左咩調味料啦，但有雞味之餘又唔會太咸，兩碗都係，而醉香個隻既酒味都好突出，但如果唔太好酒既朋友呢，就比較建議食姬松茸雞湯麵，一來無酒味，二來個雞味係會再突出d (因為酒味某程度上cover左雞既味)，而d雞肉都尚算滑嫩，當然絕對未達Perfect級數啦。
至於個春卷呢，就炸得好通透，好脆口，個餡以芋頭為主，但又唔似食芋角咁膩，如果夠肚餓，一碗麵加個春卷都OK，而野飲既選擇都幾多，除左一般既港式水吧飲品，佢地仲有菠蘿青檸冰呢類特別少少，又比較開胃既飲品可以揀，大家都不妨去試下。
2人最後埋單$148，以同類餐廳而言唔算平，但質素係返度，所以以性價比而言都叫做唔錯，一定好過比超過一個double既價錢去食d唔好食既黃店西餐多多聲，至少我呢篇食評係對鳳鳴居作出正評，唔會有人懷疑我去左藍店，哈！
食物: ★★★☆
價錢: ★★★☆
環境: ★★★
服務: ★★★☆
性價比: ★★★☆
黃店西餐 在 《食好西系列》黃店正宗 荃灣高質家庭式西餐廳 - YouTube 的八卦
荃灣#香港美食# 黃店 追蹤IG獲得更多美食資訊：CITIZEN_LEE_FOOD 一名香港小市民，主要周圍食好野掃街。希望紀錄低日常食過嘅野，及向大家介紹美食及 ... ... <看更多>