達記燒臘飯店
今日由灣仔峽道行上半山，嗰條斜路都咪話唔甘，對於啱啱復課嘅我來講真係好有挑戰性。不過原來甘完之後就係一路落斜，所以其實又真係唔係咁辛苦，1小時20分鐘之後已經去到香港仔。
跟住搭兩個二銀錢嘅橫水渡去對面鴨脷洲街市，上到頂樓人頭湧湧，費事同人迫，轉落去鴨脷洲大街搵食。可惜冇乜吸引！
正在諗住轉地頭嘅時候，俾我聞到一陣叉燒味，伸個頭入去嗰間舖一睇，不得了，入面大大隻豬吊咗喺度，咁即係話佢係即燒即賣！唔使問一定好食。
坐低。我叫咗碟燒鵝燒肉飯，朋友叫咗燒鴨叉燒飯。阿姐寫完單轉頭送上兩碗例湯，嘩，係細細個喺大排檔飲嗰啲油鴨骨🐷頭骨煲出嚟嘅湯，再加埋廣東大白菜，真係好好味。
啲飯唔使講都真係好好食，因為佢用嘅係真·燒汁，唔似你其他地方就咁用豉油同糖溝出嚟，所以特別惹味，真係唔同，試過你就明！
埋單，兩碟飯一共$91，如果你下次去香港仔，唔好跟嗰啲食家食乜鬼嘢海鮮哪，去食呢碗燒味飯喇，真係好正！寫寫下都想飛返去飲多碗湯添。
係去趁呢兩日啦，人哋18號之後放五日假呀！呢啲咪就係生活囉。
#何嘉麗callmegaga #何嘉麗 #出街玩 #為食路上 #我個嗅覺對於食好嘢真係好sharp #達記燒臘飯店 #鴨脷洲大街96號地下 #再興行埋一邊喇
