三十一年減一日
人一世，物一世，死就一世，唔死就大半世，計我話，先有幸福家庭，美滿婚姻，事業基礎才會穩固，現實世界萬中無一。有成功事業，而感情冷寞，或付之闕如，孤孤獨獨，談不上真正快樂；相反，有幸福生活，事業平凡也沒什麼大不了，視乎取捨如何。犧牲幸福，換取成功事業，傻仔一個，喺我心目中，快樂健康親情，永遠排於首位。
我好幸福，又好快樂，皆因有個好好好好嘅好老婆，祝大人同埋我，結婚三十一周年日日快樂。
老婆：唔明三十一周年有乜特別？點解唔慶祝三十一年減一日喎？即係噚日，即係過咗囉。
老公：你道行高過我，我甘拜下風，抵鍚。
老婆：仲等緊啲乜？
君不見，黃河之水天上來，奔流到海不復回。君不見，高堂明鏡悲白髮，朝如青絲暮成雪。人生得意須盡歡，莫使金樽空對月。
李白好似咁講過，細細個好受呢首詩影響，到𠵱家直頭鍾意到癲咗，送畀大家。
有今生有來世
三十一年前嘅聖誕日，我同愛人，即係老婆大人，首次單獨拍拖同行，相識三個月，已經情投意合，再過多三個月，決定儲錢結婚，九個月後，即係拍拖一年另三個月，一九八八年三月十六日，一張婚書，幸福到今日。
有人問：「你老婆有乜好，你鍾意佢啲乜？」咁膚淺嘅問題，唔應該問，因為我唔會鍾意有人問老婆大人：「你老公有乜好，你鍾意佢啲乜？」
兩情相悅，緣定今生，真正嘅愛情唔講package，唔講條件高低，講究心靈相通，心心相印，你心中有我，我心中有你，永遠心甘情願將最好嘅部份，留畀愛人，絲毫唔覺得委屈犧牲。
老婆大人聰明過我，叻過我，識字多過我，靚女過我，樂觀過我，熱心過我，對身邊人好到無得講，我以前廢青一個，每個月賺三千六，竟然睇上我。唔止咁，寧願犧牲自己天份，放棄大好前程，全心全意愛我同埋家人，無佢，我肯定無今日，無佢，我只係一個平庸嘅獨行俠，無佢，我根本唔想做人。
唔介意有人話我肉麻，因為愛可以化解人世間嘅戾氣，愈多人宣揚愈好。無論男定女，十幾歲定幾十歲，事業有成定普普通通，唔應該戇居居將愛收埋喺心入面發霉，而係要時時公開講，茄輪日日打，等愛人睇到感受到享受到濃情蜜意嘅愛，時時刻刻如沐春風，感染身邊人模仿。
四年前結婚周年紀念，連寫老婆大人十一日，𠵱家再cap圖畀大家欣賞。睇完，或者明白，咁真咁可愛咁有趣嘅女人，唔嫁佢，嫁邊個，唔愛佢，我就儍；如果唔明，無所謂，我明就得，老婆大人知道就得。
上天啊，結婚三十年，太短喇，一萬年喇，可以嗎？
後記：
有今生，有來世，愛是化解人世間戾氣的靈丹妙藥，何妨輾轉相傳，以愛的力量，用說話行動感染啟發他人。從今以後，年年上載舊文，提醒大家，只要雙方努力維繫，用心經營，事事尊重，處處包容，人世間確有堅貞不二的愛情，也提提自己，我深深地愛著老婆大人。
老婆：呢啲生活，真係幾寫意。
老公：我都覺，不如索性真係退休囉。
老婆：可以退休，但唔可以唔做嘢。
老公：記得，大人哲理，小人遵命。
老婆：乖乖，扺錫💋💋。
高堂明鏡悲白髮朝如青絲暮成雪 在 【将进酒】唐.李白。君不见，高堂明镜悲白发 - YouTube 的八卦
李白。君不见， 高堂明镜悲白发 ， 朝如青丝暮成雪 。#shorts. ... <看更多>