作為一個由連尼加+加斯居尼年代開始做英L嘅人嚟講，實在有太多嘢想寫，但係由於好眼瞓，再加上聽朝仲想睇NBA，而家就簡單講幾句先啦。
美斯，球會級錦標同個人榮譽幾乎乜都贏過晒，偏偏國家隊嘅冠軍就由出道開始等到尋日；阿根廷，先終於唔駛再做亞軍廷。
唔計奧運，阿根廷等一個大賽冠軍，等咗28年。
阿根廷嘅守門員馬天尼斯，喺阿仙奴坐到籮柚都變形之後轉投維拉，終於證明到身價；到幫埋阿根廷捧盃，佢係足足用咗十年時間。要用十年，先證明到畀所有人知自己唔係某啲球迷口中嘅廢龍、佢係一個有級數嘅龍門。
尼日利亞國家籃球隊，2012倫敦奧運輸73-156畀美國 — — 足足輸83分；2016年再碰頭，都輸44分。
尋日，佢哋喺熱身賽，贏美國90-87。
CP3，打咗16年NBA，轉到嚟太陽，今年先第一次打入總決賽。
太陽本身等入總決賽，都等咗28年，而佢哋場數領先緊2-0。
修夫基，1996年歐洲國家盃射失12碼，英格蘭四強出局；到以領隊身份帶領代表隊，結局相同。期間相隔咗四分一個世紀，足足25年。
英格蘭，對上一個大賽冠軍，係1966年贏世界盃，到而家55年。
地球上面幾十億人，總有人贏在起跑線，總有人一出世就係人生勝利組，不過，唔多。感激呢個世界上仲有體育；體育一早話畀我哋知，勝利同成功，往往係屬於一直堅持、一直冇放棄嘅人。
唔好誤會，冇人保證堅持一定會成功，呢個世界冇嘢保證成功；惟一可以肯定嘅，係每遇上挫折就放棄嘅話，一定會失敗。
堅持呢樣嘢，一啲都唔好玩，仲可能好辛苦，更加可能會失敗多好多好多次。
每當覺得堅持辛苦嗰陣，諗下輸，輸，仲慘過堅持；只要堅持，就永遠都仲有機會。
呢啲，就係體育同運動教識我嘅事。
作為球迷，真係好希望、好希望英格蘭下次可以行埋最後嗰一小段路。
新場：https://mewe.com/p/ngkahim
我挨之：www.instagram.com/vinceng88
陀地新地盤：https://content-blogchannel.hktvmall.com/zh/media/content_partner/CP00008/
小怪獸s嘅成長記錄：https://www.youtube.com/channel/UCNV_i17rTpUCiG7aIxlA_PA
