繼 Janice、Jill、Janice Man同JW之後，唔知係咪風水關係，黎明 Amusic 旗下今年再推J字頭女新人：JC
同衛蘭出道一樣，先出聲，不出樣。聽咗佢第一首派台歌【說散就散】，唔想誇張，但的確有少少驚艷，主要有五個原因：
１）第一句把聲已經引人入勝；
２）曲風岩我聽；
３）把聲同唱功，實不相瞞，有少少Alicia Keys影子（唔想誇張，但真係有少少似）；
４）佢岩岩考完DSE，得18歲，已經唱到咁！咩來頭？
５）香港樂壇死氣沉沉咗太耐，好耐無一個新人令人咁有期待嘅感覺。
JC 第一個樂壇專訪，就獻咗比KJ娛樂台（亦係本台首個訪問，多多指教。）
：：：：：：：：：：：：：：：：：：
「大家好，我係今年嘅樂壇新人JC，今年18歲，啱啱考完dse，終於可以同大家『見面』，好開心。」啱啱先考完DSE，得18歲，究竟佢係點入行呢？「講起個過程都幾長。我本身有學唱歌，機緣巧合之下，參加咗Amusic嘅比賽，然後收到電話，就咁入咗行（好似係）。」呢個「唔見樣」出道方式，黎明之前係衛蘭身上都用過，JC自己又見過明仔未呢？「哈哈…見過一面咁多，但感覺佢都幾和善，雖然係天王，但冇咩架子幾nice，同埋冇咩皺紋，keep得幾好，仲好高。」黎明魅力真係連18歲妹妹仔都被迷到。
唔見樣出道，JC自己又鍾唔鍾意？「我覺得呢個方式，可以令人專心聽我唱歌，唔會focus錯係其他地方，例如樣貌、身材等等，同埋有啲神秘感，吸引啲人去聽，都唔錯呀。」其實外國有啲歌手都唔係好出樣，例如澳洲歌手Sia、日本樂隊Greeeen，JC又會唔會效法佢地長期都唔露面？「其實長期唔露面嘅可行性，係香港嚟講的確唔大，始終係一個人口密集嘅地方，加上有強大嘅高登網民，要令我現真身，確實係唔難嘅。」哦！原來怕咗高登仔！咁各位高登仔，J住把聲先啦，好快有樣睇。
講番佢隻歌，其實曲風比較少見，點解會揀呢種genre？「呢首歌其實有啲似外國嘅R&B，的確同平時聽到嘅廣東歌唔同，可能本身首歌個tone會strong啲，而唔係一般廣東歌較為peaceful。作為一個聽眾，都會想聽多啲唔同類型嘅歌，既然我有機會，當然想唱啲特別啲嘅歌，比大家耳目一新嘅感覺。」雖然係首國語歌，但JC覺得，音樂係一種共同語言，只要有比感情，樂迷都會感受到佢內心既意思。
云云樂壇，JC最欣賞嘅歌手，原來係阿Joyce 鄭欣宜：「我覺得佢真係好勇敢去行岀一步，同人講做歌手唔一定要樣靚身材正，實力先係首要，比咗好多香港女仔好大嘅inspiration，唔一定要瘦先靚。就算係名模好似Tyra Banks咁，佢地都好健康，唔鼓吹『slim is beauty』呢個風氣，有自信，會自愛，你就係女神。我當然都好想好似Joyce咁，以自己嘅力量，去改變世界一啲負面價值觀，成為一個好榜樣。」
JC好有抱負，但好多人都話香港樂壇無得做，甚至連Leon都話只會出單曲，唔會出碟。JC就曾經因為香港樂壇嘅情況而沮喪過：「而家多咗好多音樂選擇，所以大家都聽多咗唔同種類同語言既歌 。但我認為一切都只係取決於質素。呢排好多有心人去produce好多有heart嘅歌，同埋近年發生好多事，令好多香港人支持本地音樂，所以長遠嚟講，我覺得香港樂壇有希望！」
咁不如快啲同大家見面啦！「我都好希望可以快啲同大家見面，因為可以方便做更多野，例如慈善活動、拍戲、主持等等，挑戰自己，所以我好期待正式露面嘅一日。」
其實我無咩留意今年有咩新人，但JC得18歲，唱功已經好過好多現役歌手，真心睇好佢，祝你順利！
#JC #Amusic
https://www.youtube.com/watch?v=xuWp3i_97oM
香港樂壇已死原因 在 整天都說「香港樂壇已死」⋯⋯但你知道為什麼嗎 ... - YouTube 的八卦
為何 香港 樂壇會衰落？｜整天都說「 香港樂壇已死 」⋯⋯但你知道為什麼嗎？｜作為 香港 人，又如何令它重生？｜一位90後青年的看法｜中文字幕（CC）｜JER ... ... <看更多>