<<奶共屎萊姆扮黃>>
我，屎萊姆，就係嗰個大家所講喺四川生活過幾年，以前喺大陸有公司，拍過好多淘寶開箱嘅YouTuber，篇野有啲長，希望可以阻大家小小時間睇一睇。
交待番少少背景先，我一直都有個遊戲夢，所以2013年我同老婆一齊去左成都，開左間手機遊戲工作室，做過一啲自己中意嘅作品。至於點解喺大陸開而唔喺香港開，簡單黎講係成本問題，無乜錢又想試下學人做遊戲。喺大陸住，淘寶好方便，我又中意買無謂野，所以拍左好多開箱片，同埋喺成都嘅生活片。
2018年有一間香港娛樂公司搵我合作，簽咗比佢地之後，回流香港，有幸參與過電影演出、音樂作品，呢啲對我黎講都係新挑戰，好難但係我好享受去學去試。
作爲土生土長嘅香港人，我好慚愧，我承認以往我都唔太關心政治(2018年喺成都一個座談會度同林鄭影左張相，當時我的確唔清楚佢做左好多出賣香港人嘅事，一如平常咁完左活動影張相)。直到今年反送中開始，6月9日，參與人生第一次遊行，之後第一次運送物資，第一次食TG，第一次屌黑警......其實我認我真係無膽，唔敢上最前線，比起好多好多抗爭者，我做嘅嘢真係微不足道。但我好想同大家講，其實我同好多香港人一樣，都係一步一步咁進化緊。
我知你哋屌我唔敢拍片、遲出聲。我承認喺運動初期（6月-7月中），我的確係因為經理人公司關係，唔敢大力發聲，頂多偷偷Po下Story，我為著我嘅懦弱欠香港人一個道歉：對唔住，我係抵屌嘅。
但中間有一個轉捩點，就係721之後，憤怒到達左一個頂點，就算明知公開表態會影響我喺大陸嘅公司同演藝方面嘅前途，但比起香港民主嘅未來同埋手足們嘅犧牲，我個人嘅利益算乜？我開始出片講嘢。好多人話我拎光環，但我想同好多可能唔熟呢行嘅朋友講：光環真係無得當飯食架！我唔係扮慘，但發聲係的的確確有代價。721條片出左，唔意外咁唔少工作上的合作即刻被取消。我知道有風險有代價，但我真係覺得721係大是大非，作為一個喺網絡上有關注度嘅人，真係接受唔到自己扮睇唔到。
之後繼續發夢、遊行，喺社交媒體Po片聲援......原諒我無喺前線現場拍片，落到街我只係同好多香港人一樣表達訴求。呢段時間亦陸續有大陸網民開始截圖喺微博上大大力咁攻擊我，所以喺9月嘅時候，我同經理人公司停止合作，同時都停左我大陸遊戲公司嘅營運。老實講，我唔係無包袱，尤其係我的的確確喺大陸發展過，有大陸公司、大陸網民既關注。喺呢個環境之下，要發聲比想像中更大壓力，呢個亦都係我6月至7月中點解會掙扎、點解會懦弱。但我想同大家講，當我停止晒經理人公司合作、執左大陸間公司之後，我第一個感覺係：真心如釋重負，因為我終於唔洗再顧前顧後，可以真真正正做返自己，講自己想講嘅嘢。
我知而家係一個充滿恐懼同猜疑嘅時勢，我明大家對我嘅質疑。可能你哋而家仲會有人覺得，因為我無晒大陸合作，所以就要爭取返香港人支持，講咁多嘢都係為左呃LIKE搵食（但點解我會無晒大陸合作？）但我真係好想好想為自己澄清一次，因為我真係當大家係同路人，我真係同大家一齊作戰，就算我做嘅嘢幾咁微不足道都好。但係，當我自己不斷比同路人攻擊，呢種感覺真係好痛苦、好難受，甚至比敵人攻擊難受一千倍。
我個仔正正係6月出世，作爲爸爸，俾仔女最好嘅供書教學係理所當然，但我知道一個有人權保障、民主自由嘅社會先係我作爲爸爸最需要為下一代爭取嘅嘢。
其實我都唔知自己仲有啲咩影響力，如果搞到大家晒時間嚟屌我，我都唔知自己係咪唔講野仲好。但係我諗左好耐之後，我覺得，無論你哋話我扮黃又好、好假嘅肥仔都好，我都想繼續為自己相信嘅信念講嘢、拍片，因為呢個係我自己最卑微嘅渴望同自由。
最後，呢場抗爭過左四個月啦，香港人唔好放棄，無論你係咩崗位，點都要撐住，點要都繼續反抗，直到煲底相見！！！
#我係有賺過大陸錢
#但真係無奶共
#已經無拍淘寶片好耐
#唔好意思呢幾個月我真係爛口左好多
#我會慢慢改善
#有問題隨便問
香港娛樂公司 在 香港娛樂八卦新聞丨黎明公司有大動作！力捧16歲中學生當歌手 的八卦
香港娛樂 八卦新聞丨黎明 公司 有大動作！力捧16歲中學生當歌手，造型卻被指像舞法天女丨. 1 watching now Premiere in progress. ... <看更多>