坦白講，話唔失望就呃你嘅。
近日嘅新聞，大家都有眼睇，一間標誌性嘅香港航空公司內外受壓，結果，做出咗一啲決定。
失望，除咗因為聞到嗰陣身不由己嘅味道之外，更多嘅係感情分；諗番起人生第一次搭飛機，就係CX。細個嗰陣自己一個飛嘅話，係會有地勤帶住你過關兼陪到你去閘口；上到機，啲crew見你小朋友自己一個，又會特別照顧你，嗰陣嘅服務真係好好。大個咗，無論做嘢定去玩，有得揀我都盡量揀番佢哋。我知，我知喺CX買張long haul J夠喺其他airline坐頭等、我知大把航空公司嘅嘢好食好多、我知好多啲機又新又靚service又好；但有啲嘢，喺第二度搵唔到，而又無其他嘢可以取代嘅 -
就係嗰份「香港味」。
以前出trip，一走就起碼一頭半個月；風景再靚嘅地方及唔上維港夜景、再好嘅酒店都唔夠屋企張床咁舒服，所以每次做完嘢都歸心似箭，只係想極速走人；搞完security check，過埋海關，行到機口就有人用親切嘅廣東話greet你、有你熟悉嘅香港報紙、inflight entertainment有最新港產片 - 感覺就好似早咗十幾個鐘返屋企咁，思鄉病情稍稍舒緩。有段時間，佢哋長期喺世界航空公司排名位居前列，我居然會覺得開心；諗深一層，其實又好似唔多關自己事，後來先知點解。個情況有少少似香港運動員喺國際性比賽攞獎牌，又或者本土演員攞大型影展影帝咁；以香港做基地嘅公司威水喎，作為港人，覺得與有榮焉都唔出奇。香港一個彈丸之地，出過奧運金牌得主、有康城影帝、有間世界排頭幾位嘅航空公司，香港人，好嘢。
後來嘅事，我諗大家都好清楚嘞：炒輸期油，排名下跌，因航之名不逕而走，喺入面做嘅朋友個個都嗌辛苦；但係，我都仲係希望盡量揀番佢哋。冇錯，碗白飯有時係硬嘅、舊牛扒經常都接近well done、hotline次次都要等好耐；好似有啲犯賤，但嗰種香港味道，真係冇嘢代替得到。
利申，我的確幫CX拍過兩次宣傳片，但係呢個真係唔係廣告嚟，純粹有感而發；一間代表住自己屋企嘅航空公司，遭遇恰似今日香港，令人無法子唔感慨。記得上年仲因為爭十零分DM唔到而「哎吔」咗一聲；作為一個小小嘅gold member，只係希望喺好多年之後，香港人嘅航空公司依然係香港人嘅航空公司；香港，依然係香港人嘅香港。
「香港人加油，萬事小心。」
#WeAreHongKong
#香港人加油
*****
即日起，fb同ig分途廣播：www.instagram.com/vinceng88
香港夜景世界排名 在 2022香港夜景排名，在PTT/Dcard/Yahoo上討論推薦的熱門 ... 的八卦
香港 嘅夜景真係好靚，去過世界各地嘅一線城市，講到Cityline 嘅排名，香港一定係頭三甲！咁你哋又覺得邊個城市嘅Cityline 同維港有得Fight？ ... <看更多>