【這是一個快樂的故事】
尋晚睇完新聞，再一次徹夜難眠。本來諗住落街買個宵夜順便冷靜一下，行到半路喺天橋見到位著住黑衫嘅少女。見佢傾住電話行路拐下拐下咁，好自然聯想到佢之前去完邊度嚟。所以就趁目光對上一刻向佢報以微笑，佢都簡單點咗下頭回應。
意外嘅係，到我買完宵夜回程嘅時候，居然又俾我見到佢坐咗喺樓下公園嘅一張長椅上面。因為附近再冇其他人，所以我哋理所當然再有眼神接觸。當刻我下意識就問：「點解妳坐喺度唔返去嘅？」
少女聽完無奈咁搖搖頭，然後講：「我想等屋企人瞓晒先……費時又嗌交。」
「嗌交……因為夢遊完？」
「嗯。」
「咁……」雖然驚自己太多事。但諗咗諗，最後都係開口問：「妳肚唔肚餓？我啱啱買咗宵夜……有冇興趣？」
「其實……」少女尷尬一笑，「真係有少少餓。」
我哋就係咁開始一段奇妙嘅對談。行近啲睇，少女大概係二十出頭，如無意外應該係大學生。回想當年，我好似佢呢個年紀嗰陣，放暑假一定係瘋狂出去玩，或者留喺有冷氣嘅地方打機打牌，每日都過得無憂無慮。但呢刻，望住少女嘅側臉，明明係稚氣未脫，卻好似已經飽經過風霜一樣。而事實，大概都係咁。
喺我打開宵夜包裝嘅時候，少女開始娓娓道來：「其實我屋企人向來反對我出去，所以初初都係呃佢哋話去跑步。本身真係冇諗住留好耐，但去到現場就忍唔住想幫手……你知喇，現場情況咁緊張，基本上係分秒必爭，邊有時間可以覆電話喎？」
「咁都真係幾大獲……」聽到呢度，我好似已經想像到佢屋企人嘅反應。
「冇事冇事，我已經覆返佢哋喇。只係唔想面對面嘈，所以先喺呢度坐陣……」
「咁妳隻腳……點解會整親嘅？」
「哦，頭先班速龍好似癲咗咁衝埋嚟見人就打。我喺後排轉身走嘅時候唔小心扭咗一扭。其實唔算好嚴重，但為咗唔想成為負累，所以就提早走咗……」
「我睇直播都見到呢個畫面，好彩當時冇人踩人咋……」
「但唔少前線手足都俾人拉咗。」講到呢度，少女雙眼不禁泛起淚光，睇得出佢係非常自責。
但呢份自責同無力感根本係非戰之罪。當對方已經係殺紅咗眼，瘋狂咁用催淚彈、橡膠子彈同海棉彈嘅時候，示威者根本就只可以挨打。
之後係短暫嘅沉默。我哋兩個一邊慢慢咁食、一邊喺度睇網上面嘅直播同片段。當我哋睇到天水圍嘅一眾街坊團結一致咁鬧走守喺地鐵站嘅警察嘅時候，少女難得咁咧嘴一笑，繼而感觸咁講：
「雖然唔知成件事之後會點發展，但我始終深信呢個係快樂嘅故事。」
「吓？」我聽完有啲錯愕。
明明現況已經係黑暗到極點、絕望到冇得更絕望，同「快樂」兩字根本係沾唔上邊。
「我唔係指呢一刻。」大概係注意到我嘅反應，少女嘗試解釋清楚：「我係講緊將來，好耐好耐之後──當我同自己嘅仔女，或者子孫提返呢件事嘅時候，一定係一個快樂嘅故事。」
跟住，佢就好似如數家珍一樣，開始講返呢個半月「見證」過嘅事。
「我喺一連串嘅示威同抗爭行動，見到香港人堅韌不屈嘅勇氣。對住強權同警察嘅濫暴，我哋依然絕不退縮。」
「記唔記得立法會齊上齊落單嘢？我喺嗰一刻，見識到真真正正嘅人性光輝。」
「當然仲有連儂牆，只要一叫幫手就有八方支援，我見到香港人嘅齊心同創意。」
「到沙田嗰日，我喺現場睇住班街坊向我哋投物資、到夜晚佢哋又一齊鬧走警察。嗰日，我終於體會到乜嘢係鄰里街坊之間嘅人情味。」
「然後到今晚，我又見到有手足幫助受到催淚彈影響嘅途人……明明自己都未必顧得掂，但佢哋都係選擇幫人先。」
「新城市廣場嗰晚，都係有發生過類似嘅事。」我終於忍唔住插嘴：「唔知由幾時開始，示威者先變咗幫人嘅一方。」
「嗯……呢五十日，我就好似上咗一堂好寶貴嘅課。雖然香港人真係失去咗好多，但喺呢場運動裡面，我哋都搵返好多過去已經忘記咗嘅嘢。而我肯定我哋最後會贏，咁將來……對下一代嚟講，呢個就會係快樂嘅故事。」少女用勇敢而又堅定嘅眼神講。
當少女啟程返去嘅時候，我望住佢纖細嘅背影，彷彿可以見到一個巨大嘅決心。呢種對未來嘅盼望，係由整整一代人親手築成，堅不可摧。
然後，作為一個作者嘅老毛病。我當時亦都不自禁咁想像到一個畫面──見到未來嘅少女，指住播緊過去示威片段嘅電視，自豪咁同自己嘅女講：「妳睇下，媽媽當年係有份企喺嗰度，為香港人嘅自由而戰。」
今日，我哋依然會憤怒、仍然會悲傷、不時會沮喪。
但我哋只係將快樂暫時儲起，留喺勝利之後，再好好開懷大笑一場。
香港人加油。
五大訴求，缺一不可。
香港地網上落單 在 【沙田友獨享】外賣app拓新界服務foodpanda提供美食速遞 ... 的八卦
全球最大網上美食外賣速遞平台foodpanda，早已經在香港提供服務，最近亦把服務範圍 ... 於指定的15 間餐廳落單訂購美食。foodpanda將每星期更新餐廳數目，為區內客. ... <看更多>