細so佢喺我心目中係一個好有智慧嘅人，我唔係佢同輩，我唔知佢係咪天生做dj嘅人，但佢嘅生活方式，佢建立出嚟嘅生活日常嘅態度，我覺得一個dj就係咁㗎啦。有生活，先可以感染大家嘅生活。細so係一個生活家。
唔係人人有時間就識得咩叫生活，好多人都係有形無實地活著，哩個係一個hashtag嘅年代，好似你識去旅行、飲咖啡、影下靚相就叫有生活咁，唔係咁。唔係佢用嘅嘢係咩裝備，佢架餐有幾靚，係一種態度，一種永遠都會搵啲嘢嚟搞嘅貪玩，做每樣嘢都好認真，又睇落，做每樣嘢都好輕鬆。
同哩位前輩嘅相處其實有好多，我鍾意做完節目留低睇佢做節目，搵佢傾我一啲唔識點實行嘅諗法。佢有啲似師傅，但佢年紀唔似，但係睇住你。係細so教我做music show，我諗佢教咗我⋯⋯15分鐘左右？佢捉住我隻手教我推咪，我當時心諗你當我兩歲學寫字咩，但係唔好理，總之，佢教識咗我吖。
我入行冇耐嘅時候，我想拍片，冇錢買電腦，佢落咗樓下㩒咗舊錢俾我，叫我去買一部，我儲咗成年錢先還得番俾佢，好廢，但我還俾佢嘅時候，佢讚我叻仔，當時我有好難形容嘅成就感。
佢帶我去做舞台劇，嚴格嚟講，佢開咗個舞台劇出嚟，陪我做，教我做，佢想我試多啲嘢，到我自己出嚟搞，叫番佢嚟睇嘅時候，我緊張到考試咁。
我屋企有事，我失戀，我停職，我最愛嘅人離開，我唔講，佢都唔會講啲咩嘢，佢會用一個手勢，一個眼神，問我係咪ok，佢會拍拍我背脊，好似叫我：「行啦！」，佢俾過我好多動力。
佢好有智慧，但唔係好聰明，正確嚟講，係佢冇選擇過聰明。我見過佢做員工，佢認為正確嘅事，佢據理力爭，就算唔係為自己，係為同事，佢永冇手軟。我見過佢做老竇，喺公司鬥一大餐，幫個仔整套halloween 服裝，豪華到喊。我見過佢做人，喺饑饉三十入面流過嘅眼淚。細so係我嘅一個role model，學做男人，承擔責任嘅一個老師，佢冇教我嘅時候，我自修咗好多堂，學習咩叫堅強，佢唔喺哩個地方，我會更加提醒自己，將喺佢身上學到嘅信念、態度，無論喺邊個地方，都會燃燒落去。
作為後輩，我學識嘅係，我唔係要做到咩位，
係要由自己決定要做個點樣嘅人。
饑饉三十 在 「饑饉30」2021精華片段 - YouTube 的八卦
「饑饉30」2020已經順利在3月19至20日舉行。現在就觀看精華片段，重溫四位饑饉之星在30小時挑戰裡的各個難忘時刻！#饑饉30 #饑饉之星#升溫的飢餓#甘苦 ... ... <看更多>