(非傻豬事)
喺我初入職時，同事提醒我久唔久就會有一對母女到診所求醫，而佢哋都唔可以正確咁講到自己嘅名或覆診卡號，因為年紀稍大嘅媽媽一早已經有啲老人病，而女兒…係智力障礙的，保持喺約十歲嘅階段。
有日朝早，一個滿頭白髮嘅老婆婆企喺診所門外等開門～
我:婆婆，醫生冇咁早返到啊，你要唔要食個早餐先再過嚟呀？
老婆婆冇回應我，望向另一邊，大嗌:喂，女呀！唔好玩啦，開門啦，返嚟啦！
我望向老婆婆望嘅方向，見到一個同樣滿頭白髮嘅婆婆行得唔太穩咁急步走過嚟～
老婆婆伸手揚揚手指示意拖住，佢倆就十指緊扣一齊行入診所…
我:婆婆，你哋有冇覆診卡啊？
佢哋冇理到我，老婆婆只顧住同玩到大汗疊細汗嘅女抹去臉上嘅汗珠～
嗰刻，我知道佢哋應該係姑娘提過嘅嗰對母女。我去翻查排版並問阿女:妹妹，你係咪XXX呀？
佢臉上掛住小孩般嘅笑容，雙眼都擠成一條線，說話有啲含糊不清:係呀～
我望住老婆婆講:婆婆啊，醫生冇咁快返㗎，我同你哋登記咗㗎啦，你哋要唔要去食早餐先？
老婆婆大概聽唔到我講嘢，只係低頭一手十指緊扣，一手來回撫摸女兒嘅手～
等呀等，等呀等，醫生返嚟了～老婆婆拖住女兒跟住醫生入診症室，醫生一邊穿上醫生袍，一邊問:婆婆，今日點呀？邊度唔舒服呀？
老婆婆:我想同個女申請入院舍，佢哋話要註冊醫生填呢份表～
醫生:係呀，你終於肯俾佢入院舍啦？
老婆婆:我自己知自己事，睇唔得佢耐啦，我走咗都要搵人照顧佢。
醫生:都好嘅，佢有人照顧，你又輕鬆啲～呢份表要去照肺嘅，你哋一陣去化驗所照肺呀，報告就兩三日左右有，到時就可以填份表㗎啦～
老婆婆:好啦，唔該醫生
老婆婆拖住女兒行出診症室～
我:婆婆，呢張紙係俾你去化驗所嘅，你而家去就得㗎啦，聯絡電話係咪XXXX-XXXX呀？份報告到咗，我會打電話通知你㗎～
老婆婆:我可唔可以即刻拎報告㗎？
我:冇咁快有㗎～
老婆婆「哦」一聲後就拖住女兒一齊離開診所…
兩日後報告返到嚟，醫生:寶豬，你打電話俾阿婆話佢知拎得份報告，可以返嚟啦～
我打電話到老婆婆留嘅手機號碼，「你所打嘅電話暫時未能接通，請你遲啲再打過嚟啦」…
我:醫生，電話唔通啊～
醫生:又係咁啊～唔緊要啦，同佢keep住份xray先啦，你放喺嗰個箱度得啦～
我揭開一份又一份嘅xray，報告上嘅名字全部一樣，全部都係屬於婆婆的，我問:點解呢個婆婆(女兒)咁多xray喺度冇拎嘅？
醫生:個阿婆隔六七個月就會嚟一次，成日都話諗通咗要申請個女入院舍，次次照完肺就冇咗影，應該係唔捨得啦！佢由身體好好講到而家行都行唔穩啦！佢講過「只要自己仲有力，都要貼身照顧個女」，做人阿媽成世人就係為咗照顧個女，俾我都唔捨得啦！
呢箱xray，係老婆婆對女兒嘅不捨，對女兒盡心盡力照顧嘅證據…就等呢箱充滿愛嘅xray繼續封塵吧～
隔咗冇耐，一個陌生嘅婆婆帶住婆婆(女兒)到診所，再冇十指緊扣…
婆婆:姑娘，佢之前係咪喺度做咗身體檢查㗎？
我:唔好意思，請問你係佢邊位啊？
婆婆:我係佢家姐～
我:哦？唔好介意我多口問，平時照顧開佢嘅婆婆呢？
婆婆眼框紅了:我媽過咗身啦…佢走前交帶咗阿妹要入院舍嘅事…
我望住一直低頭望住自己對手，一直自己搓著自己雙手嘅婆婆(女兒)，我鼻都酸了:嗯，麻煩你等等啊…佢之前係做咗照肺，有份填入院舍嘅表格～你坐坐先～
媽媽，辛苦你了，多謝你。
食個早餐 在 吃个早餐去新房子里看看，居然走错门了，看到的一幕让我很不 ... 的八卦
谦谦君子日记认证：前中原银行股份有限公司职员. ... <看更多>