如果「8964」呢組數字係封殺五毛嘅絕招，咁「721」呢組數字就係令藍絲同埋中立撚收聲嘅超必，萬試萬靈，以下係我嘅親身經歷。
有次搭車，個司機係咁發表偉論，又話警察辛苦，又話示威者收咗錢，我打斷佢話柄講咗句：「咁721呢？點解釋？」
司機：「......」本來滔滔不絕嘅佢即時hang晒機。
仲有一次係親戚，話咩警察打份工，唔係示威者搞事都唔會出嚟捉人。
我都係嗰句：「咁721呢？」
親戚窒一窒，跟住講：「咁警察都有唔啱嘅。」然後好快就行開咗。
藍絲仲有好多層次，之前有位國內同事喺工作嘅whatsapp group咁樣講：「整天說721，都過去了，何必經常提？」
我打返句：「日本侵華也這麼多年了，為甚麼你們仍然提起？」
然後，佢再無回應。
呢班人提起721都會走夾唔唞，因為駁唔到，睇住兩個軍裝施施然走咗，睇住報警冇人理，睇住警黑一家親搭晒膊頭，個個都想扮睇唔到，個個都想不了了之。
比較有新意係荷蘭叻，佢話721唔係恐襲，係毆鬥......可能佢中文唔好啦，毆鬥一詞，係有互相出手嘅意思，而當晚721所有嘅畫面已經話咗畀全世界知，係無辜市民一面倒捱打，用毆鬥呢個詞語根本唔恰當，顛倒是非，一味耍無賴，所以佢已經唔可以稱為藍絲，用人渣嚟形容會貼切啲。
721，就係黑警嘅罪證，就算之後捉返一百萬個賊，佢哋都係黑警，一日黑警，一世黑警，遺臭萬年。
以後每個月嘅21號，世世代代嘅香港人都會記得黑警嘅所作所為，你哋唔使旨意洗白。
