由Newsgroup，Openrice到今天，加埋寫咗十九幾年，當初在newsgroup 食版出第一個post的時候，可能有些讀者還未出世。
無相到有相，有相到拍片，時代不斷向前，走慢一點也怕被淘汰。以前寫食評，抱著純分享的心態，從沒想過去到現在的地步，叫做在紙媒有個地盤，網路上叫做有點名氣，有些人就覺得一本萬利，做個blogger好好揾，兼不時可以唔使錢食好西的機會。
稿費只能當零用錢，而我又冇商業文（業配文），連個blog裡面一個廣告都冇落，試食又唔會有錢收，相比其他商業味重的blogger，打開個blog唔係online travel agency ，就係其他廣告，我真係冇乜錢途。
今年講明減少出席試食活動，留返啲時間跑下步，同朋友見下面，你知有時出去試食，難免要同一啲自己不喜歡的人同場，這是我不能控制的。
（當然，試食文很多人不喜歡看，這是事實。）
眼見有不少同行，由早試到晚，由新界試到澳門，樂此不疲，自己唔夠班冇份去，就埋怨别人唔帶佢去，唉，食咁多免費餐，終有獲利回吐的一天，你估仲係十八廿二，食極唔肥的日子？
有人覺得我好癲，去兩個星期旅行，仲保持差不多一日一篇文，而且並非試食文，又唔係被PR們追數，咁搏做乜？寫落自己blog，冇錢㗎喎。
我反問：(咁你寫第一篇文果陣，係抱住咩心態？）
而家就話好多剛出道的blogger/vlogger/Instagramer，擺明想紅做個真KOL，狂買fans做靚條數去R著數，以前邊有諗呢啲嘢？
看著奶茶的掛杯，Joy with Passion，只要你沒有忘記初心，你仍然會有那份熱情。
但是，還有多少人會記得？
又或者有人會話我：（你去到而家呢個位，梗係講埋呢啲風涼話啦。）
咁阿叔我今年已經幾十歳，真係唔驚你。
