【無咩事 唔好番大陸】
自從最近開始，過關番大陸都有公安查手機、查袋，政治審查已經唔足以形容手段嘅卑鄙，愛國五毛仲有咩好講？係國家恐怖主義嘅威脅手段一環。
做議員辦事處，近日不少街坊分享過關經歷。結論始終係：冇乜嘢真係唔好番大陸。但假如真係逼不得已要做，綜合網上資訊，想喺度整理下要注意事項。
1. 唔一定後生先捉去查——有街坊話佢過境嘅時候見你後生、去玩look、着黑衫先特登扣查，事實係唔一定。因為有過關嘅抽查方式就係撈一輪人被叫入去，有位auntie一路嘈關我乜事都無用；有人講過中老年、着得似商務客比較低機率被抽，事實係唔一定，要過就要有被抽查嘅準備。
2. 空白機（清水機）唔等如冇事——已經唔止一個人fact checked。佢見你手機乜都冇只會引起更大疑心，開始盤問你「平日點溝通」、「係咪有去示威所以心虛」。[1]
3. 洗晒部機啲資料亦唔等於安全——佢會逐個相簿包括已刪除的相片都會拎出黎睇，佢哋指引應該係要求負責公安睇晒事主所有相片。有人就係喺已刪除相片被發現反送中資料，結果遭長時間扣留。
真要應對的話，建議大家拎返以前部電話出嚟，裝返啲一般apps（推薦mytv super夠維穩；蘋果立場就算好支持但要過關就真係避免喇..），相簿自己過濾一次，六月之後嘅相擺啲無關痛癢嘅入去，總之俾人睇落係一部普通香港人用嘅手機。
袋就自己執清楚佢，如果見到有紙會逐張睇，唔好留低任何招致話柄嘅物品。其他嘢iPad嗰啲唔好帶，夜長夢多。
大家唔好以為係臨時措施——綜合資料，西九龍、深圳灣、皇崗、羅湖所有關口而家都已經有專櫃專門處理，唔好心存僥倖。
請記住返咗中國大陸，香港基本上好難有途徑幫到你。雖然好多個案都係遭長時間拘留，輕則一兩個鐘，重則大半日，但你睇到英國領事館職員被屈嫖妓，又有一單上手扣腳鐐拷問[2]，實在唔能夠排除共產黨對付人可以去到咩地步。（曾經真係有人搵過我哋辦事處求助，當時頂多都係尋求入境處協助[3]但最後都冇辦法搵到當事人，係當事人被放返出嚟聯絡家人先至解決事件）。我相信入境處嘅同事都盡咗力，但真係冇包單一個入咗大陸境內嘅人，我哋有制度從公安手中知道佢嘅處境。呢個係我地生活地方的可悲，我亦都呼籲記者有機會的話，追問港人大陸過關的問題。
所以重複多次，而家時勢，返大陸過關可以好危險。唔係危言聳聽，係好多人都有真切經歷。加拿大領事館都證實員工暫停番大陸公幹[4]。我當然覺得呢啲事情係非常離譜，證明左佢哋對待香港人係敵我鬥爭，乜嘢同胞，都係虛偽。
如果有相關經歷嘅網友有資料補充，歡迎pm。
---------------
[1] 《不如我同大家講下依家過大陸關係點》｜ https://bit.ly/2PbWMfH
[2] 深拘港人 上手扣腳鐐拷問｜https://bit.ly/2KQRBh9
[3] 入境處外遊協助｜https://bit.ly/31YQIsA
[4] 《明報：加媒：加拿大駐港領館暫停職員往內地公幹》｜https://bit.ly/2ZbNXr0
非中資手遊推薦 在 [問題] 真的有人會在意玩的是中資手遊嗎？ - 看板C_Chat 的八卦
相關內容