今日有個大肚同事食飯時睇手機播片，傳嚟《願榮光歸香港》，另一位男同事即刻插嘴：「唔好再播歌，唔好再唱歌，大家係咪以為日日loop首歌就會贏呀！點解唔行出嚟呀！」
部分同事表示贊同，而大肚嗰位同事就好down，之後同我講咗句：「大肚點出嚟著gear？其實唔係各有各做咩？首歌都凝聚到好多人㗎，我上星期去產前母乳餵哺班，成班人同埋Miss一齊唱，啲媽媽行唔到啫，爸爸都可以感受到然後幫我哋行。」
我安慰佢：「唔使灰心，各有各做嘛，歌一定要唱，冇抵觸㗎，有BB唔好咁激動呀，注意身體。」
「可能係嗰位同事表達能力差啫，佢唔係想割席嘅。」－－－我其實唔止一次喺背後幫佢辯護，因為有個同事嘅屋企人係做first aid，今次運動都有出去幫手，個個講起嗰陣都讚好，唯獨是嗰位同事又嚟料：「屌，first aid畀人打死都唔抵可憐，成日做左膠。」
屋企人做first aid嗰位同事面色一沉，之後冇再提起喇。
又有一次，某位好senior嘅同事去發夢，佢買咗成袋麥當奴拎去前線派，返嚟提咗句：「嗰日發夢買咗好多包，見班小朋友都好願意拎，我好想keep住咁做。」
一如既往，嗰位同事又嚟料：「咪再叫人小朋友啦，同埋唔好買麥當奴呀，佢哋唔鍾意食，要買就買華御結！」
Senior同事向我呻：「點買華御結呀？當日附近都冇，30幾度壽司同手卷好易壞㗎！我都係出一分力啫，咁都要屌？」
我又loop一次：「可能係嗰位同事表達能力差啫，佢唔係想割席嘅，坦白講，我開始有啲懷疑佢有冇上過前線？好多朋友都有修養，唔會嫌棄別人一番心意。」
然後，嗰位同事又周圍發炮轟啲冇出嚟嘅人，但係據我嘅理解，有啲人唔係冇出嚟，而係唔想畀你知道佢出咗嚟。我公司就有一個好靜嘅女仔，佢幾乎冇表過態，fb冇任何發夢相，但係某次發夢，我竟然夢到佢，單拖，一條女，喺夢中我哋對望咗一眼，點點頭再各自行，醒咗冇再提起。
嗰位同事好似要求每個人要著晒gear，然後喺fb post張相證明，最後我忍唔住問佢同team另一個人：「呀邊個次次都好激動，唱歌又屌，first aid又屌，買麥記又屌，發完夢冇post相又屌，可能真係勇武，好熱血。」
佢條team個同事答我：「勇佢老母，條友連續兩個星期都上咗大陸按摩飲喜茶，同我條team個大佬，仲有坐房嗰兩件廢老上去㗎！唔好話前線，條友連現場都冇去過呀！」
哦，原來係得把口。
每個人都有自己嘅範疇，我唔識畫畫，文宣幅圖我設計唔到，但我可以寫文share，大肚同事行唔到，我可以幫佢行，最重要係兄弟爬山，各有各做，不割席，不分化。
