【中學冇拍拖係人生一大遺憾！因為學生時期咩都係最正】
細個成日話想做大人，但出到黎做野先知道中學最幸福。嗰段時間唔係太多功課做，唔使好似初初搏入名校幼稚園咁讀咁多興趣班，最熟既朋友又喺呢6年識到，做有最重要係....只有中學你先會享受到學生拍拖既快感。
有日睇中左束住馬尾既欣欣，佢笑嗰下好甜美...純白色既校服下面透左條白色底裙。雖然佢同你一樣只係14、5歲，但女仔始終比較早熟，身材顯然易見。你地開始傾偈，夜晚睇下佢msn有冇上線，一上線就打句歌詞「願明天 能不再為妳痴纏」引佢注意，有時傾偈傾到2、3點都唔訓，仲日日比呀媽威脅剪左條上網線。
嗰陣既日子好青春，就算屋企人講明唔比你拍拖，你喺班房都會偷偷地約佢喺特別室見面，然後放學同佢去自修室，隔住蓋喺膝頭既冷衫摸佢大脾。而佢又會特登去睇你既西瓜波比賽，準備定礦泉水同毛巾，好似少女漫畫既情節咁，喺中場休息為你抺汗打氣。喺佢眼中，你就係佢既一切，拍拖反而成為你地努力讀書既動力，去自修室既次數都愈來愈頻密。
唔記得左你地因為咩事鬧交，喺走廊見到面會唔出聲，然後面都紅曬咁低頭快步走過。其實你不知幾想攬住佢同佢講聲sorry，不過年少氣盛，你以為佢喺你心目中唔太重要，因為人生不知有幾多條女啦！結果嗰次碰面變左最後一次次見面，直至畢業都冇再聯絡。依家過左10年，成24歲先知道原來嗰陣既欣欣先係最正，中學生時期拍拖既回憶係以後都唔會再出現返。
中學生正正係青春期時期，對你地黎講咩都想試，咩都好新奇，就算大學先初戀都唔會比到呢種感覺。當個人成熟左，做每件事多左好多考慮，唔會再好似以前咁勇、咁夠薑。以前大家冇乜錢，放學走去強記度拮魚蛋同買撈麵食，依家要openrice搵間靚餐廳食飯；以前喺去M記過日晨，依家會喺cafe打卡；以前佢會直接屌你「乜你仲唔溫書架」，依家佢都會直接屌你「乜你仲唔努力啲搵工架」。
仲有我成日比喻大學同社會係非洲大草原，喺中學可以見到既異性好少，男仔既話略為清理bb毛、用水gel頭就可以成為男神；女仔既話用少少遮瑕、電負離子已經變成女神。所以喺動物園裡面你另一半仍然好安全，唔使怕突然比人搶走，因為一搶走你啲馬仔就會有排佢受。大學唔係咁玩，喺大草原裡面有好多奇珍異獸，就算你用個籠鎖住佢，佢都可以掙脫出黎。可能上一秒佢同你講好愛你，下一秒已經見到佢同萬獸之王交配緊。社會仲衰，專食有另一半既人添！
諗返起以前.....你唔知係成熟定太幼稚，你會覺得佢係你結婚對象，所以不惜一切同呀媽嘈，覺得出到黎做野就會離開屋企自己住。直到依家真係出黎做野，反而覺得愛情太複雜，留返喺呀媽身邊都係最幸福。
