《一個媾MK妹嘅7仔員工》
最近考完Dse之後一直喺屋企無所事事，每一日就係起身上高登、食野、睇波瞓覺。有人話呢段日子可能係人生之中最後一個長假期，所以一定要好好珍惜。但屋企人就唔係咁諗，話我成日喺屋企坐倒不如出去打下工賺下錢，本來都唔想打工，但我個興趣就係影相，特別我鐘意用菲林黎影，對於一個中學雞黎講，菲林負擔都幾重，所以我決定返工賺錢比自己洗。
為咗唔想影響到我日間活動，所以我決定做樓下夜更7-11，我諗住夜更應該無咩野做又無咩人黎買野，應該都幾爽。
但原來唔係，一踏入夜晚，平日好嘈好多人嘅地方一瞬間變得寂靜非常，但卻有一班「夜鬼」、「夜間工作者」仍然默默地工作。
呢份係我第一份暑期工，所以心情都有啲緊張，平時就幫襯得多，呢家身份位置唔同咗，原來返7仔都幾多學問。好再間鋪都有幾個唔錯嘅師兄同芳姐教我，令我好快就上手。
由於間7仔係啲舊式屋邨商場出面，所以一到夜晚就會出現一大堆MK仔同MK妹聯群結黨咁出現。
作為一個稱職嘅毒男，面對MK仔嗰種串串貢同粗口橫飛嘅態度，我有時都會怯一怯，特別佢地黎買煙嗰陣，面對住咁多牌子嘅煙，一時之間真係唔知拎咩煙比佢，有耐性咪話埋你聽邊包係，無耐性隨時屌撚柒你。
師兄強哥就成日叫我唔好怯，如果班MK仔見我怯就會食住上，恰到我盡，特別係佢地好鐘意喺班Friend面前恰黎拎快感。所以當佢地係傻仔唔洗理就得，但講就咁講，始終都淆底。
「明仔!做咩揀返夜更呀!對身體唔好架!」芳姐一邊執報紙一邊說。
「無呀，我想平日啲時間彈性啲，得閒可以出去影下相，咪揀返夜更囉。」其實芳姐話我返夜身體差，佢又何嘗唔係呢。
「出去影相? 有咩好影呀!」芳姐對於我呢門興趣好似唔太理解。我見人少少就偷偷地拎部即影即有相機幫芳姐影返張。芳姐覺得咁快有張相喺手就覺得好神奇，係咁問點解會咁，我就慢慢解釋比佢聽。
「你地啲後生真係識好多野!你都就快做大學生喇!第時幫我個女補習呀!芳姐請你!」
「其實都未放榜.....所以都唔知升唔升到。不過升到我一定會幫你個女補習。」
其實我幾敬佩芳姐，一來佢幾照顧我，二來佢除咗件制服嘅話，同一個師奶無咩分別，平日都係煮飯湊仔做家務，但為左幫補家計，所以同家人食完晚飯後就落黎返7仔，雖然芳姐成日話自己讀書少咩都唔識，但佢係我眼前係一個專業嘅「7仔員工」同一個稱職嘅「好媽媽」。
我幫佢影多張比我留念，用黎比我紀錄夜晚上嘅香港人與事。
望一望隻錶，見到差唔多兩點鐘，我諗「佢地」差唔多出現。
果然，一大班MK仔MK妹嘈嘈貢咁走入黎，然後部份人去雪櫃揀野飲，部份人就揀薯片，一時之間將間店帶來生氣。
而我在意嘅係佢地之中......其中一個MK妹。
夏天岩岩到，佢就已經換哂背心Show哂Bra帶同換上熱褲，我仲留意到佢隻腳踭仲紋咗一個奇怪刺青。
雖然我成日同班Friend講啲MK妹無腦，成日群班MK仔都唔知為咩，書又讀唔成，錢又無，真係諗唔到MK仔有咩可取之處令到班MK妹肯比佢地啪啪啪又對佢地死心塌地.....但事實上我對MK妹有一種難以抗拒嘅吸引力。
師兄強哥可能見我成日眼甘甘望住個女仔，就拍一拍我膊頭同我講:「MK妹，媾不得。」
「此話何解呢師兄?」
「MK妹就表面好似好吸引，但其實同毒蜘蛛無分別，你行近隨時比佢地毒死。」
「但我都見過有人養過毒蜘蛛作為寵物，我相信只要你有心馴服佢，一樣無問題。」
「丫......枉你飽讀詩書，有冇睇過金庸呀!知唔知倚天屠龍記入面殷素素死前同張無忌講咗句咩野呀?」
其中一個比我大小小嘅同事阿健就插把咀埋黎話:「呢個我識!就係抱著無忌講『孩兒呀孩兒呀!你長大之後，要提防女人騙你，越好看的女人，越會騙人。』」
「嗱!阿健呢啲咪醒目囉!正正經經搵返個女仔追喇!MK妹有佢地自己世界，唔岩你架!」
係咩?MK妹真係咁差咩? 我反而欣賞佢地對愛情有份執著，可以咁死心塌地對一個男人，就係呢份情已經嬴過哂好多人，所以識媾一定媾MK妹。但師兄佢地既然咁講都有佢地道理，始終佢人生經歷多我咁多。
說時快，個MK妹已經行到我面前，我即刻嚇到口窒窒。
「兩包醇薄萬。」說罷，身旁成堆MK仔女同時放低堆啤酒同薯片。
我轉身執咗兩包煙比佢，然後快速地將啲野過機，廢事做慢啲都比佢地屌。
「喂!哥仔!可唔可以快啲，我地趕住走呀!」
咁岩強哥又收緊錢，阿健入咗去雪房，我唯有自己頂硬上。
「多謝四百八十蚊。」終於都過哂機，我都鬆一口氣。
呢個時候，個MK仔拎咗張一千蚊比我。
「收你一千，找返五百二十蚊比你」我邊說邊打開個收銀機。
「等等!我有四百八十蚊!」之後個MK就喺銀包到數錢。
我就比返張一千蚊佢，喺到望佢數錢，佢就攤開哂啲錢喺櫃台到數，身邊啲朋友都叫佢快撚啲。
「丫!原來仲差一百蚊，算啦!你都係找返比我。」
之後我就找返五百二十蚊同比埋張收據比佢。佢地成群人就走左，咁就同個MK妹見完面，又要等聽晚。
群MK仔離開咗之後，間7仔又回復一片寂靜。呢個時候強哥行埋黎問我頭先有無收錯錢，話班MK好似古古惑惑咁。
我諗咗一諗，仆街喇。我無收返佢張一千蚊就找咗五百幾蚊比佢，大拿拿五百幾蚊我奶梗野。
「班MK仔扮到咁急，擺明做你。」
之後我即刻打開櫃台門話出去追返班MK仔拎返一千蚊，跑出去期間我真係心有不甘，竟然比班MK仔玩，而且仲要喺
個MK妹面前好似成個傻仔比人玩弄，雖然個心淆淆地，但內心嗰種比人玩嘅谷鳩氣情緒更大。
終於比我係公園發現佢地。
(待續)
**************************************************************
IG: homing0624
