【洩露國家機密】 東大嶼人工島有條隱藏高鐵？
沙中線又延誤到2022通車，點解? 似乎有好多隱藏鐵路計劃想打尖。
林鄭月娥又將早前在6月暫緩既「明日大嶼」，一意孤行在施政報告繼續強推，成本估計高達6,240億，將會係香港史上最貴嘅基建。但呢個洗錢大計可能只係「起錶價」，事關我哋發現深圳前海展示廳內嘅一幅「粵港澳大灣區交通運輸系統圖」，本身暗藏玄機。
地圖揭露未來計劃會有另一條高鐵線由深圳前海出發，穿過屯門、大嶼山，直插東大嶼人工島地圖上叫「高鐵支線」，長度同而家嗰條深圳北至西九高鐵差唔多。但呢條「高鐵2.0」嘅走線政府文件係從未提過，地圖更將之前因造價太貴而擱置嘅港深西部快速軌道計劃*「復活」，名正言順係政府之前話「運輸基建先行」嘅發展模式，亦都意味著東大嶼定位上都會其實只不過係深圳前海既經濟從屬地，配合人地規劃多過從自己需要出發。
呢份政府發展藍圖若然唔係今次離奇洩露，恐怕完全將香港人蒙在鼓裡。首先特區政府根本晨早知道，係2016年中，當時都仲係發展局局長嘅陳茂波向全國人大委員長張德江介紹香港未來發展大計時，就展示咗個從未向公眾披露嘅「東大嶼人工島發展」模型，有晒具體範圍同擬建鐵路道路（同政府最新出嗰個plan係一樣架）。但當年年尾做嘅《香港2030+》諮詢時，仲只係畫一個好粗略嘅「六角形」俾香港人知，扮到成件事好似「未有計劃」、「要聽大家意見」咁。可見香港嘅發展計劃就要「讓領導先知」，又或者其實可能係「讓領導決定」，最遲知同無得揀嘅係香港市民。
依家政府嘅策略就係隱藏想做嘅基建工程，篤細啲條數氹你落疊，之後再焗你硬食埋其他嘅基建工程，起一大堆鐵路道路，既配合粵港澳大灣區融合大計，又可以「永續」地將香港人嘅錢利益輸送予中國與一眾基建地產商。如果唔阻止呢種車毀人亡既瘋狂起基建邏輯，高鐵通往既將會係一條滅亡之路。
--
* 運房局2014年公佈《鐵路發展策略》，提到曾考慮興建港深西部快速軌道，連接港深兩個機場並中途接駁至洪水橋，但當時已預計成本會超過1,100億港元﹙按2013年價格計算﹚，認為其經濟效益仍有待驗證，於是擱置。
#不能只有我看到 #天機一早洩漏 #連接東大嶼到前海 #方便同胞直達人工島 #一小時生活圈不是夢 #用港人血汗錢陪葬 #國家級任務 #雙鬼拍門
⚔️ 踢爆溶合規劃 月捐支持民間研究
https://liber-research.com/support-us-2/
💪 了解更多: https://liber-research.com/about-us
