//支持本Page請Click入內文，謝謝！//
621即將升級死線日漸接近，我都無法預期究竟當日會係咩嘅一個情景，而我可以做嘅，大概就係響呢日來臨之前，為參與群眾提供一啲心理上嘅準備。
話說響616遊行前後，響網上有兩個瘋傳嘅故仔。第一個係話有個大媽發現四個後生仔戴哂口罩鬼鬼祟祟唔知做乜，之後比個大媽指罵一輪就四散走人，暗指呢四隻就係破壞遊行和平嘅「鬼」（原Post已Delete，希望有網友可以提供Backup Cap圖）；
另一個故仔則為616夜晚，有人以「有圖有真相」、「唔係作故仔」為標題，話現在有個掛住疑似警員證嘅示威者，混咗入群眾搞事，仲話「我估擲磚都係佢地」，然後仲有人吹到又話佢地郁手打市民，總之就係收共產黨錢破壞和平示威。最終當事人現身澄清自己並無做過被指控嘅事，仍被和理非繼續抹黑。
我響度先唔好講究竟和理非係咪有用定無用，而係想提出一個好有趣嘅現象就係，響69夜晚，同612佔領，你響現場係完全唔會有人話呢個係鬼果個係鬼，就算網上有零星堅持要提防黑社會中聯辦又乜又盛，當衝突一開始無耐就全線收聲；點解去到616遊行就會突然間有咁多「鬼故」出現，仲要個個講到親歷其境咁？
第一個原因就係，因為69當晚同612晏晝，在場嘅示威者根本一早預咗要衝，所以邊個如果係「鬼」率先衝擊警方其實係幫咗件事，大家多謝都黎唔切，點會仲走去捉鬼？但616就唔同勒，因為當日同夜晚都係以和理非為主，而佢地嘅主觀意願就係唔想衝、想用和理非感召林鄭撤回方案，所有唔符合佢地路線、想「擅自破壞運動」嘅人，好自然就會當咗佢地係鬼。
然後當你睇番果啲所謂「親眼目睹」、「有證有據」，原來全部都係出於誤會、又或者主觀加盬加醋、再加上以訛傳訛歪曲事實，結果變成今時今日嘅鬼故。更可怕嘅係，呢啲鬼故嘅發起人、傳播人，係完全唔需要承擔任何責任同道歉，仍唔會特別走去阻止呢啲鬼故嘅傳播，當日社民連興起係咁、人民力量興起係咁、本土派興起係咁，魚蛋革命係咁，捉鬼捉到尾，原來9成99都係可悲嘅清算異己手段。
好多人話「各有各做」，但實際上卻係無可能，因為和理非同勇武甚至唔同理念嘅人，想做嘅嘢實在太多重疊嘅地方，一定會觸犯倒對方嘅原則；最理想當然係大家可以彼此了解互相容忍，但事實如果真係可以，香港一早光復咗啦！所以我只能夠講，響621升級當日，大家一定要堅信一樣嘢，抗爭運動從來無鬼，又或者係抗爭運動就算有鬼，佢最多可以做嘅都只係幫政權倒米，而只要你相信有鬼一刻，成個運動就會自動分裂、玩完。
記住，鬼故之所以稱之為鬼故，係因為從來無人真係見過鬼。
至於另外一樣要提防嘅，就係各種陰謀論嘅形成：
之前蕭若元排咗一條片，標題係《612驚天大陰謀》，響入面佢推翻哂之前曾經講過「擲燃燒彈只係黑社會挑釁警方巧合遇上遊行前夕」嘅分析，話其實都係警方陰謀，順帶講埋當日警方係故意任由示威者擲磚、甚至話可以係便衣警察搬磚出黎製話警方鎮壓口實。
至於佢講嘅所謂「證據」係乜？原來就係而家傳到好恆嘅中信事件。首先我真係好想同佢講，呢單嘢響612當日已好多人講，只係傳媒無報，你去到整整一個星期之後先講，足以證明坐響電視前面同親身響現場評論同一件事，係可以有幾大嘅差異；同埋好明顯老蕭身邊都係和理非同聲同氣嘅人，自然亦無可能知道衝擊現場其實發生緊乜事。
但我真正想講嘅卻係，蕭生呢個推論，亦係好典型嘅陰謀論例子。所謂陰謀論，其實好多時都係結果論，亦即係由一開始陰謀者本身已諗定個結果出黎（好似本土派收共產黨錢、邊個衝邊個就係鬼），然後再倒推番個推論過程出黎，所有證據都只為證實呢個結論而服務。
好簡單，就算你無人擲磚，只要警方一清場，同前線抗爭者就必然會有衝突場面，一樣係可以提供倒藉口比佢地去用催淚彈夾殺群眾；又正如好多示威者連些微反抗都無一樣比人打到仆街，仲要比傳媒任影唔嬲、盧偉國話現場有人用鐵枝但一條片都無，咁仲證實唔倒警察鎮壓根本唔需要任何證據，只要佢話有就有，鬼唔鬼根本唔會影響倒佢地最終決定？
陰謀論者為咗證實陰謀論可信，係完全唔會理會佢地之前提出過相反嘅論點，只係一味以結論「拿係咪呢所以一定有鬼」作為掩飾前言不對後語嘅語言偽術。例如老蕭明明之前已講過政府響612佔領之前，一早已決定撤回《逃犯條例》修訂，612佔領根本係多餘；既然係咁，只要林鄭一宣佈人群就算唔散哂最低限度都會走咗一半人成唔倒勢啦，點解仲要多此一舉，先鎮壓犯眾憎然後先至掉番轉頭跪低宣佈「暫緩」同埋向市民致歉？更加唔需要講明明上兩個禮拜先話古惑仔擲汽油彈係為咗起朵、或者同警察有爭執，所以先會故意揸Benz、同次用埋同一架車故意比人知道係佢做嘅。點解而家又可以推翻哂？
當然，你要兜，總可以搵倒理由黎兜，呢個就係陰謀論嘅可怕之處：因為佢嘅所謂推論，其實只係一廂情願嘅創作，所以你永遠無可能完全否定一個創作出黎嘅故事，但如果心水清嘅就會明白，相對黎講，一個陰謀論亦係同時永遠無可能證實嘅，呢個就係重點。
可以相信，呢種陰謀論調響621只會愈來愈多。我響度提醒大家嘅係，我地要熟習呢種陰謀論嘅慣常格式，當一見倒一啲完全無辦法證實嘅「故仔」響網絡流傳，我地就一定要充當起「流言終結者」嘅角色，將呢啲陰謀論扼殺。
陰謀論例子 在 陰謀論例子的影片 第1集 - YouTube 線上影音下載 的八卦
【陰謀論例子】「陰謀論例子」#陰謀論例子,8大JustinBieber恐怖YummyMV的陰謀論真相,【黃標範例】【不能只有我看到系列02】武漢肺炎陰謀論. ... <看更多>