前幾日同細佬食飯，我先知佢上一段戀情原來都幾傷心同受氣，因為個女仔嘅媽咪嫌佢冇錢冇樓，而佢哋其實都係住喺長沙灣嘅公屋......
成日話有錢人睇唔起窮人，但真實嘅社會係窮人更加睇唔起窮人。
佢前女友仲有個阿哥，做健身教練，搵唔到錢嗰隻，周不時問個妹借錢，但你又唔好以為佢阿哥咁廢就冇say喎，有次佢出門時丟低一句：「搵個男朋友仲老過我。」又唔可以話佢錯既，廢人都有權發表意見架嘛。
佢阿媽為咗有多啲人附和自己，將阿女個男朋友冇錢冇樓嘅背景，向身邊每一個三姑六婆講晒，呢班唔知頭唔知路嘅甲乙丙丁又真係好意思畀意見：「嘩，冇樓點得呀？」、「咁你要勸下個女喎」、「使唔使我同你個女講下呀？」、「個男仔咁樣唔掂喎，你畀佢哋拍拖呀？」
而其實呢班二打六係連我細佬都未見過，唔知佢做咩工作，唔知佢收入幾多，唔知佢對個女朋友幾好。
有好多人講嘢同埋畀意見都係不負責任，人哋嘅未來唔關佢事，但就好鍾意說三道四，唯恐天下不亂，丟低一句不知所謂嘅教訓同埋睇法，然後拍下屁股就走。
我哋唔可以滿足世界上所有人嘅標準，就算你係百分百完美，呢班屎忽鬼都會雞蛋裡挑骨頭，或者乜都唔知就妄下評論，不過你還拖只會有失身份，畢竟其他人係點唔需要在乎，只要在乎你身邊嘅另一半就夠喇。
另外，唔好遷怒你嘅伴侶，因為佢嘅一己之力並唔足以將班低等動物一夜之間變聰明，屋企人唔諒解，三姑六婆把口唔收，佢係冇得揀，亦都控制唔到，若然畀阿豬阿狗影響到兩個人嘅感情，咁就正中佢哋下懷，對住壞心腸嘅人無需要動氣。
兩個人一齊開開心心，甜甜蜜蜜，已經係最好同埋最有力嘅反擊。
阿豬媽意思 在 媽媽請吃飯（阿豬媽）아줌마阿豬媽在韓文是非常親近的阿姨的 ... 的八卦
... <看更多>