中華民國國民始終斯文 D
星期六下午，香港「黑色暴雨警告」，脆弱的特區機場航空運輸，好似日軍打到來，當堂大亂。
我去台北睇一個畫展，周日最後一天（連許仕仁都去羅馬聽歌劇啦，係咪？），訂了國泰六點四十分機。
點知因為「天氣問題」，班機一再延誤。六點八延到七點半，七點半延到九點三，九點三話要夜晚十一點三，然後話凌晨一點。到了一點，又話延到三點。
好在我夠 Mileage，有幸在商務貴賓室，共九小時，食咗共兩碗雲吞麵、三碟豉油皇炒麵、四杯咖啡。閲讀報告：睇完英文雜誌 The Spectator, The New Statesman, The Economist, 當日金融時報全份，以及個 Lounge 內免費贈閱之「明報」林燕妮專欄。
凌晨兩點半，有一個台灣客，向地勤投訴：「你看現在，外面一點雨也沒有，其他航空公司的班機都開了，就是你們一家，一誤再誤，還說天氣。天氣有什麼問題呀？你們不是欺騙嗎？連華航都飛了嘛？為什麼只有你們這樣子？因為你們機組人員不夠，你們一點責任感都沒有呀⋯」
現在是凌晨四點九。窗外風平浪靜，夜涼如水，就快黎明，仍無飛機影蹤。
我當然好耐心咁，一路閱讀，一路粒聲唔出，揸住免費派發的一枝蒸餾水，面無表情咁等啦。多謝國泰，D 機組人員借風雨罷吓工、玩吓嘢，令好耐冇咁挑燈夜讀通宵嘅我，無端端成晚又學咗一大堆英文 Vocab，我只有感恩。
而個台灣佬（淺藍色戴眼鏡者），就由貴賓室嘈到閘口，仲開始鬧人了喎。
無強國人（唔知在地下橫瞓那位係唔係），所以局勢雖漸喧噪，未有暴力行為。
而我心情平靜。梗係啦，假假地，我都係讀英國文學畢業架嘛，唔通衝埋去大罵「我 X 你媽 B」咩。點可以失禮英女皇呢？
短片：https://goo.gl/Vz9mWX
閲讀報告 在 如何写读书报告Book Review/文章评论书评 - YouTube 的八卦
文字版已发在了公众号“路得学术日志”https://mp.weixin.qq.com/s? ... <看更多>