《鎗火》中的「默契」
—
成日有人話《鎗火》係「男人的浪漫」，咁到底乜嘢係「男人的浪漫」？具體啲去講，就係果種不發一言嘅默契。
—
互不相識，或者就算識都完全唔熟嘅五個人，因為要保護黑幫大佬而聚頭，平時有人係代客泊車，有人係酒吧睇場，有人係馬伕，有人係髮型師，有人鍾意玩跳舞機。到出事果陣臨危受命，原來有人係神槍手，有人係槍械專家，有人係「鬼見愁」，有人係最當紮嘅古惑仔。「大隱隱於市」，市井嘅表皮之下原來臥虎藏龍，好有武俠小說嘅味道。
—
因為要做保鏢，所以隨時會有危險。《鎗火》最好睇嘅地方係，「槍戰」突如其來，又突然結束，無事前嘅計劃，每個人都要隨機應變。就好似一幕經典嘅荃灣廣場槍戰，五個人各司其職，有人負責護送大佬，有人負責引敵人注意，有人負責射死對手，有人負責睇水，好型。而如果你對槍械「戰術」有基本認識嘅話，睇睇我揀嘅果幅圖，幾個人企喺不同位置，有各自自己嘅COVER，手槍嘅指向各異，無CROSSFIRE，包到自己隊友嘅盲點。
—
唔需講任何說話，默契自然出現，呢個就係「男人的浪漫」。而喺之前之後嘅比人從天台狙擊，樹木大戰，五個人都係各司其職，有人揸車走，有人哩喺BANNER後面打快攻，有人聲東擊西，有人從後偷襲，所有嘢心領神會，無人係MVP，只有團隊合作嘅成果。
—
電影中後期發現原來王天林係黑幫仇殺嘅策劃人，原因係「分贓唔勻」，佢唔滿意自己分唔到應該嘅果份。有共同利益嘅時候，槍口對外，好不威風；而當有利益衝突嘅時候，大難臨頭各自飛。有時候唔係你話事，你嘅背後又有更龐大嘅勢力操縱住你嘅一舉一動，五個人面對勾義嫂呢個死罪，又會點樣處理？
—
保護大佬要默契，而結局嘅發展都要默契。電影嘅最後，最少三個人夾埋做咗場戲，包括黃秋生嘅槍殺，吳鎮宇嘅怒射，同埋呂頌賢嘅借醉扮死，試圖去呃大佬真係殺咗阿信。能夠突破利益衝突嘅，係人與人之間嘅感情。你話有無夾定？我就話無喇，一個眼神就識做啦！
