世界第一
工作時間：香港
平均壽命：香港
生活費用：香港
鐵路成本：香港
登登登登，香港榮登世界第一，出人頭地，所向披靡，可喜可賀。估唔到，連低處未算低嘅出生率，都可能獨佔鰲頭，點到人唔感動啫。
潛台詞即係，香港人，最勤力，最長壽，最善忘，最逆來順受，最死慳死抵，最享受犧牲小我，最願意真金白銀貢獻商家佬，最想完成起火車軌神聖任務，最討厭生小朋友嘅晚間工作，點到人唔肅然起敬呢。
話唔埋，香港仲有好多第一，籠屋密度，赤貧人口，堅尼系數，老年人拾荒，外來人口團聚，公共醫療輪候時間，南下乞兒滿佈全城，掘金去也，香港人，係咪好自豪？或者好悲涼？
廿一年嚟，衣食住行，生老死葬，朱門狗肉臭，何不食肉糜，落得如此田地，香港人撫心自問，係咪仲未搵到root causes？抑或視而不見，聽而不聞，兜兜轉轉，自欺欺人，起幾多基建，大興土木，都堵塞唔到政治不彰嘅先天缺陷？
以前唔信風水命理紫微斗數奇門遁甲，覺得命運在我手，香港開埠一百七十七年，逢凶化吉，絕處逢生，「東方之珠」名不虛傳，但𠵱家面對呢個敗局，突然之間，隱隠然見到龍脈橫刀一斬，靈龜出海，一去不回頭囉，點到我唔傷感？
我以前講過：「忌懷憂喪志，宜莫忘初衷。」我記得，梗係記得，放心。人人都會遇到挫折困難，都有軟弱時候，喊完之後，又再抖擻精神，抬起頭來，笑過砌過，我心存希望。
