《全靠當天喜歡過錯的人2019》
前日我收到一個inbox message， 收到嘅時候，真係笑出聲，冇錯喇，就係我cap出嚟呢個，有人問我今年「全靠當天喜歡過錯的人」點樣慶祝生日，「全靠當天喜歡過錯的人」托我同大家報個平安，佢話「我過得好好」。大家嘅記憶力都好amazing ，記得我個page，仲記得我提及嘅朋友，最變態係佢有東張西望嘅跟進精神，follow up事情嘅發展。咁有心，當然要做返個年度update。
其實我哋2月已經同「全靠當天喜歡過錯的人」舉行生日盛會，但由於今年我哋揀咗間餐廳，我喺度講可能以為特登宣傳間餐廳咁，但呢間餐廳令我哋都有好深嘅體會，咁不如同大家分享下 當日嘅生日盛會.....
餐廳名就唔講喇，我哋去咗一間可以釣魚嘅餐廳慶祝生日......
顧名思義，間餐廳就係俾你釣魚，你釣到魚，就可以食番條魚。去呢度係諗住有個地方一班人又玩又吹水又食野。喺一切都關土地問題事，空間欠奉嘅香港，預咗間餐廳唔係平，預咗要付出金錢買空間。
先講下間餐廳嘅玩法...
你可以唔參與釣魚，直接喺個menu上面 點你想食嘅魚，直接喺menu上面點想食嘅魚，你就要畀正價，參與釣魚，釣到條魚上 嚟，你就可以用七折嘅價錢買條魚食 。
聽到呢度，作為一個精明嘅香港人，你應該明白間餐廳點計條數.....
一間普通餐廳一條魚賣一百蚊，喺呢間釣魚餐廳，menu上嘅一條魚就應該賣100除0.7蚊， 喺魚池釣到嘅魚就會賣一百蚊，冇錯啦，聰明嘅商人會將menu上面嘅魚mark up，魚池入面嘅魚表面上係七折，其實就係普通餐廳嘅原價。作為食客亦都覺得好合理，因為呢間餐廳係包含咗玩樂嘅元素。正如你去冒險樂園掟彩虹，你都明知個公仔係唔值咁多錢，你都不停掟銀落去，因為你知道你唔係單純為咗個公仔，係買成個玩樂過程。
咁釣唔釣到魚呢？
在場有好多細路喺「釣魚台」參與釣魚行動，都失望而回，openrice上面嘅朋友就指出啲魚餌唔夠新鮮，啲魚畀人教育過唔上釣。餐廳在場個個拎住魚竿釣緊魚嘅都係專家，好多人用100% 肯定口吻話啲魚已經畀人餵飽曬，唔會上釣， 亦有人話環境太嘈太光猛，所以啲魚唔上釣。
我覺得另一個好主要嘅原因係，叫香港人去一間餐廳釣魚，你唔係要我企喺度超過半個鐘吖嘛， 大家係期望 用麥當勞點餐嘅速度釣到條魚，可能大家誤會左係去釣魚柳bell。甚至有人高談闊論話；我幫你撈起條魚，你隊個魚鉤同魚餌入 條魚個嘴入面當釣到啦。嗰一刻，所有人都係龍蝦夾 阿嬸，「你個夾係壞㗎」..... 其實成個過程都好好笑，總之大家為左條魚都有犯罪潛能。事實係我哋坐咗喺間餐廳超過兩個鐘，釣到魚嘅人其實得好少，唔多過十個。
朋友話，其實釣到條魚，條魚又唔係唔使錢，間餐廳應該買多啲魚，將個魚池擺滿魚，人人都釣到，人人都要買起條魚，間餐廳先賺得多，反正大家都知道條魚比市價貴架啦。而家個個都釣唔到，間餐廳其實冇著數。
我覺得間餐廳就係知道佢冇咁多客，佢擺到成個「釣魚台」都係魚， 啲魚冇人釣，死左佢會損失慘重，啲魚唔死佢都要餵魚，魚糧都買窮。歸根究底 ，呢個餐廳喺香港經營係好難成功，首先香港人有冇咁嘅時間耐性喺間餐廳度釣魚呢？香港嘅租金咁貴，裝修到間餐廳有空間畀大家釣魚，成本太高，間餐廳俾一枱客用幾個鐘頭釣魚，翻枱率會變得好低，佢賺嘅錢夠唔夠cover 租金裝修食材同養魚呢？
講到呢度，點解我會擔心間餐廳經營生意嘅狀況？我諗只有香港人先會擔心經營生意嘅難處，因為香港人係好明白喺地產霸權之下 ，喺土地問題 之下，生存真係好刻苦，真係食餐飯都食到一份無奈出來。
你係香港人你先明，點解一間餐廳 服務態度會唔好，因為我地冇標準工時，然後你會好體諒佢服務得咁差。點解一間餐廳 成日都好似好想趕你走，因為租貴到佢翻枱都有KPI，點解一間餐廳啲價錢咁唔合理，因為土地問題，你食嘅唔係食物，而係食緊個租。
講到呢度 ，由慶祝全靠當天喜歡過錯的人 ，轉咗個topic去香港生存嘅困難之處。其實今年我哋係訂咗一個「苦戀注定難，我已經習慣」嘅生日蛋糕 畀「全靠當天喜歡過錯的人 」，原來苦戀都冇喺香港地生存咁難，原來生存咁難，我地已經習慣。
當然我唔係要大家夾硬 去幫襯一間經營不善嘅餐廳 ，但當我地要無奈咁體諒生活嘅種種，接受生活質素每況愈下，你就會明我點解食飯都食到份無奈嘅感覺出嚟。
唔明全靠當天喜歡過錯的人係咩一回事，可以追返舊post：
全靠當天喜歡過錯的人 第一回
https://www.facebook.com/…/a.164701523738…/484017198473291/…
全靠當天喜歡過錯的人第二回
https://www.facebook.com/permalink.php?story_fbid=840135899528084&id=164695310405483
PS. 寫生日蛋糕牌嗰位師傅，真係駛出真功夫，方為大師傅，啲字真係好似電腦打出嚟咁靚！蛋糕體都靚過新細明體，好西利。
野場龍蝦竿 在 關於野釣龍蝦的幾個問題 - Mobile01 的八卦
釣竿材質竿尾玻璃纖維居多，碳纖很容易中蝦，但反撥力大，沒控好竿容易斷腳長度看釣場釣點原則上直上直下用捅康的像現在肉粽濕滑，很多人不想跳肉粽，就拿 ... ... <看更多>