人大咗，難免成日想當年。
上回講到啲讀者話自己嚟足五年，
令我又諗返起當時第一年搞書展嘅7況。
當年，因為唔知有幾多人會嚟幫趁，
同時又係第一年參展，所以只申請咗一格。
一格係一個咩概念？
今年我哋有六格，一格即係今年攤位嘅六份一。
擺完貨之後，夾硬Set埋部收銀機，老鼠都冇位行入嚟。
於是當年我哋個攤位，係完全冇位畀讀者行入去的。
你要嚟買書，就要抬頭望下個Menu，
（嗰陣得十本八本書）然後講出你想要嘅書，
排隊，畀錢，攞書走人，就係咁簡單。
冇錯，就好似你去買珍珠奶茶咁樣樣。
由於嚟幫趁嘅讀者懶係絡繹不絕咁，
基本上啲讀者係完全逼近唔到埋去Counter買珍珠奶茶。
我見有啲讀者見多人，開始想走人，
於是就開始咗嗌咪生涯。
主要內容，係廢up同調戲讀者；
主要目的，就係希望啲等緊買珍珠奶茶嘅讀者唔好悶到走咗。
一邊簽書一邊嗌下咪，一嗌，就嗌足七日。
呀唔係，係一嗌，就嗌足三年。
曾經畀我調戲過嘅人有好多，
估唔到其中一個係未在毛記做嘅路人Dickson，
呢樣嘢佢都係上年先話返畀我知。
直至第四年，即係上年，個攤位加到去五格，
空間足夠容納讀者，再冇人因為迫唔到入攤位而走人，
我開始戒掉廢up，封咪…專心簽書。
呀當年d嗌咪相，我一張都冇。
呢四張，係我倒立跪喺到求個讀者send返畀我的。
冇眼袋的我。
上兩張 － 第一年，一格
下兩張 － 第二年，兩格
