《細細個鍾意悟空，大個咗就鍾意比達》
記得細細個好鍾意悟空，
但係大個咗就鍾意比達。
點解呢？
可能始終小朋友天真爛漫，好憧憬悟空呢種人。
溫柔善良好人好打。
�平時黑髮扮平民；�發嬲金髮做MK，
粗中有細，好完美。
細個覺得好完美，所以鍾意；
大個覺得完美得濟，所以卻步。
因為你發覺呢種咁完美嘅人自己唔會係，�世上亦少有。
�「悟空」變咗一種超現實嘅存在，
漸漸就無咗嗰份親切感。
呢個時間，比達呢粒種子就開始慢慢萌芽。
比達嘅一生好簡單...喺我眼中就係俾人拎嚟融合...
正確講法係俾悟空拎嚟融合。
佢唔算好人，甚至一開始係奸角。
佢唔算勁，最擅長都係威一集半集之後被秒殺。
由於經常懶醒扮機警，更被人封為「柒達」。
著名對白有：
「我就係超級比達呀！」->被虐打
「可惡嘅格古洛！！」->睇住悟空虐打人
「我堂堂一個撒雅星既王子，居然會輸比一個低級戰士..」->被悟空虐打
「XXX(對手名)，哼！我勸你都係慳返啖氣暖肚啦！因為你好快就會俾我打敗架啦！」->被瘋狂虐打
呢堆對白有個共通點，就係多數一講完，
比達就會俾人打到飛起。
總而言之，佢自大、任性、食莊子軟飯、矮、M字額。
睇落去無樣好，但呢個時候望下自己...
依喂...你又覺得比達更似一個活生生嘅人生。
因為佢完全表達咗咩叫「天意弄人」。
孤高嘅王子，贏在起跑線偏偏家道中落；�
相信自己能力再加無比努力，但又存在一個自己超越唔到嘅天才；
�討厭地球人但愛上一個地球女人，仲要落地生根；
�關心杜拉格斯但唔識表達，令父子關係有一點距離。
比達嗰種難堪、不忿、沮喪，你喺悟空身上搵唔到；
但係喺自己嘅人生路上隨處可見。
你終於明白點解《龍珠》入面，�最要面嘅比達流嘅眼淚比悟空多。
�因為比達經歷嘅嘢，往往滲透住現實嘅矛盾，所以特別親切。
近年重睇《龍珠》，
以前你會笑爆佢；呢家你會可憐佢。
以前你想悟空「威到盡」、今日你想比達「威返次」。
不得不承認，我已經「移情別戀」。
或者，由比達一出場要侵略地球，�到最後為咗保護地球佢願意犧牲自己。
呢啲就係我哋人生上嘅首尾呼應。
夠哂矛盾、夠哂無奈、
亦夠哂真實。
ps. 未追晒龍珠超，希望佢有威返次啦！
＝＝＝＝＝＝＝＝＝＝＝＝＝
PS. 呢排寫咗叫《不存在的職業》(已完結)嘅小系列故事，冇嘢做時可以望下：https://goo.gl/xh4bbt�
有時間可以加埋IG!(冇咩嘢睇，但多私人感受)
https://www.instagram.com/cheungson88/
(ID: cheungson88)
#舊文重修
超級比達 在 超級比達 的八卦
[Dokkan Battle][龍珠爆裂激戰][極限超難關21-30]9分內Clear!超級比達&EZA M達測試! · [DokkanBattle][龍珠爆烈激戰][抽卡]卡勁又柱靚! 超級比達60抽! · 【龍珠爆裂激鬥 ... ... <看更多>