《如果你讀過女校，你就會明》
係呀，我讀女校。我覺得，只要你曾經讀過女校，身上都會殘留住一點「讀過齋校」嘅痕跡，而呢啲痕跡，真係終生揮之不去。
讀過女校嘅女仔都有以下特質...(以下係非常主觀，極不科學嘅自我感受)
● 我哋識得「搬野」，而且好少講「讓女仔先」
讀完女校，入到大學先知，原來拎乜L野都要叫男仔拎，做乜L野之前，都要加句「俾女仔先」。次次我單人拎起千斤重物件，就會有讀男女校嘅女仔出來屌啲仔點解唔幫手，但我想講， 我根本可以「力挺千斤」物件，唔洗人幫。
● 我哋唔會慣性做男仔嘅副手...
讀男女校嘅女仔，慣性俾男仔做leader同主導工作，佢哋見到女仔主動做leader，會覺得呢個女仔aggressive 同逞強。實際上，讀男女校嘅女仔慣性做副手，自我眨低自己嘅能力。「讀女校啲女仔挑剔啲？」，唔係，係我哋無咁易妥協，唔會俾男仔話哂事，有主見啲。
● 我哋「自我完成任務」嘅能力係高啲…
我哋較少「未做就講定『我力有不逮』」，讀男女校嘅女仔較易示弱， 「善用女性嘅優勢」尋求協助。
※※※
大眾都對女校嘅女仔有好多負面而不真實嘅睇法...
● 「女校啲女八婆啲」
根本所有女人都係八婆，讀完女校唔會令「八婆指數」增強。點解你會覺得女校啲女八婆啲，其實係女校女仔數目集中啲，「女校啲女八婆啲」根本係錯覺。其次，讀男女校嘅女仔，會刻意喺男仔面前掩飾佢哋八婆嘅真面目，佢哋骨子裡，與生俱來嘅「八婆指數」一直無減弱過。
● 「女校啲女潑辣啲，講野賤啲，把口衰啲」
我哋唔係潑辣啲，講野唔係賤啲，我哋係直接啲。讀男女校嘅女仔都有諗賤野，我哋唔只諗，仲會忍唔住講出來姐。
※※※
「你哋女校無男仔一定好悶」...
女校嘅世界一定好悶？無啲咁嘅事。讀過女校，你就會知，我哋多姿多采。女校女仔間嘅友誼，男女校嘅女仔唔會明。如果你讀過女校，你懂的。
PS. 讀過女校嘅女特別痛恨扮斯文嘅姣西，喂，我睇穿你啦，仲否認喎，我唔揭穿你扮野，你仲反指摘我粗鄙唔似女仔，我心水清過費玉清，根本你真面目同我一樣咁粗鄙。
